Արցախի ԱԳՆ-ն յայտարարութիւն է տարածել Թուրքիայի նախագահի՝ Շուշի կատարած այցի կապակցութեամբ։
«alikonline.ir» - Արցախի ԱԳՆ-ն յայտարարութիւն է տարածել Թուրքիայի նախագահի՝ Շուշի կատարած այցի կապակցութեամբ։
Յայտարարութիւնում ասւում է․
«Ադրբեջանի նախագահ Իլհամ Ալիեւի ու նրա ընտանիքի ուղեկցութեամբ Թուրքիայի նախագահ Ռեջեփ Թայիփ Էրդողանի եւ նրա ընտանիքի անդամների այցը Արցախի պատմական մայրաքաղաք Շուշի, որը Թուրքիայի եւ Ադրբեջանի կողմից աւերւել է 1920 եւ 2020 թւականներին, միջազգային իրաւունքի կոպտագոյն խախտման, մարդատեացութեան, ցեղասպան ու ահաբեկչական քաղաքականութեան վառ դրսեւորում է։
Արցախի Հանրապետութեան արտաքին գործերի նախարարութիւնը խստօրէն դատապարտում է նման այցերը Արցախի օկուպացւած տարածքներ՝ դրանք դիտարկելով որպէս սադրանք, ծաւալապաշտական եւ ծայրահեղական ծրագրերի շարունակման յայտ։
Միջազգային հանրութիւնը պէտք է դատապարտի Թուրքիայի սադրիչ գործողութիւնները, քանի որ նման այցելութիւնները, դրանց ընթացքում Անկարայի եւ Բաքւի կողմից հնչեցւած գաղափարները, յայտարարութիւնները, ձեռք բերւած պայմանաւորւածութիւնները եւ միջնադարեան նւաճողական քաղաքականութեան փառաբանումը լուրջ սպառնալիք են միջազգային եւ տարածաշրջանային անվտանգութեան համար, մարտահրաւէր՝ ողջ քաղաքակիրթ մարդկութեանը, հարւած՝ բոլոր այն կազմակերպութիւնների եւ կառոյցների հեղինակութեանը, որոնց անդամակցում է Թուրքիան»։
