Ն.Ս.Օ.Տ.Տ. Գարեգին Բ Ամենայն հայոց կաթողիկոսը արտահերթ խորհրդարանական ընտրութիւնների առիթով հանդես է եկել ուղերձով, որում ասւում է․
«alikonline.ir» - Ն.Ս.Օ.Տ.Տ. Գարեգին Բ Ամենայն հայոց կաթողիկոսը արտահերթ խորհրդարանական ընտրութիւնների առիթով հանդես է եկել ուղերձով, որում ասւում է․
«Սիրելի ժողովուրդ,
Մեր հայրենիքի համար վճռական օրւայ շեմին ենք: Արտահերթ խորհրդարանական ընտրութիւններին մասնակցութեամբ որոշելու ենք մեր երկրի գալիքի կերտման ուղին: Մենք ամէնքս ուզում ենք ապրել խաղաղ ու անվտանգ, կայուն զարգացող երկրում, հեռու ցնցումներից ու պառակտումներից եւ կառուցել մեր արժանապատիւ ու բարօր կեանքը ազգաշահ ու հայրենաշէն ձեռքբերումների վրայ։
Այսօր՝ մեզ պատուհասած ծանր կորուստների պայմաններում, առաւել քան երբեւէ, մենք պարտք ու պատասխանատւութիւն ունենք մեր անկախ պետականութեան պահպանման ու ամրապնդման, մեր հայրենիքի զօրացման համար։ Պատասխանատւութիւն ունենք մեր զոհւած նահատակների լուսավառ յիշատակի, մեր ներկայի ու գալիքի, մեր սերունդների առջեւ։ Ի Հայաստան, յԱրցախ եւ ի սփիւռս, մեր ժողովրդի առջեւ յառնած է հրամայականը՝ թօթափելու յետպատերազմյան եւ նախընտրական օրերին ստեղծւած լարւածութիւնը, վերահաստատելու համերաշխութիւնը։
Նաեւ կենսական անհրաժեշտութիւն է, որ յետընտրական շրջանում մեր երկրի ներքին կեանքն ընթանայ հանդարտութեան եւ ողջախոհութեան մթնոլորտում։ Երբեք եւ ոչ մի կերպ չեն կարող արդարացւել ազգը պառակտող գործողութիւնները եւ հասարակութեան մէջ թշնամանքի սերմանումը, բռնութեան ու հաշւեյարդարի կոչերը, բախումներ հրահրելը: Հայրապետական Մեր յորդորն է, սիրելի ժողովուրդ, զերծ մնալ ատելութեան խօսքից, անհանդուրժողականութիւնից, դրսեւորել զգօնութիւն, օրինահարգութիւն եւ նոր փորձութիւններով չվտանգել հայրենական մեր կեանքը։ Մեր պատմութեան նոր էջը կերտենք հաւատքով ու լաւատեսութեամբ, սիրով ու միասնականութեամբ։
Միշտ յիշենք, որ Հայաստանում կայուն իրավիճակով, մեր ամուր պետականութեամբ է նաեւ պայմանաւորւած Արցախի ապագան, արցախաբնակ մեր քոյրերի ու եղբայրների հիմնախնդիրների յաղթահարումը։ Այս գիտակցութեամբ, այս ոգով ու յանձնառութեամբ մասնակցութիւն բերենք ընտրութիւններին, անտարբեր չմնանք մեր երկրի վաղւայ օրւայ հանդէպ, որպէսզի մեր ազգային ու հայրենական անդաստանում տեղ չգտնեն նեղութիւններ ու տառապանքներ, նոր արհաւիրքներ, որպէսզի միասիրտ ու միախորհուրդ յաղթահարենք ներքին ու արտաքին մարտահրաւէրները, կառուցենք հզօր ու պայծառ հայրենիք՝ խարսխւած մեր ինքնութիւնը պայմանաւորող ազգային ու հոգեւոր մեր արժէքների վրայ։ Այս ընթացքով ի զօրու կը լինենք առատացնել տէրունական օրհնութիւնը մեր կեանքում եւ Հայաստանում ու Արցախում մարմնաւորել մեր ժողովրդի բարօրութեան ու առաջընթացի լուսաւոր տեսիլքները։
Սիրելիներ, աղօթենք միասնաբար, որ առկայ ճգնաժամի յաղթահարման բոլոր ջանքերը Աստծոյ ողորմութեամբ պսակւեն բարի արդիւնքներով։ Հայցենք, որ Ամենախնամ Տէրը Իր շնորհների եւ օրհնութեան ներքոյ պահի ու պահպանի մեր Հայրենիքն ու աշխարհասփիւռ մեր ողջ ժողովրդին, պարգեւի իմաստութիւն ու զօրութիւն, խաղաղ ու ապահով կեանք Իր ամենախնամ Սուրբ Աջի հովանու ներքոյ։
Աստծոյ սէրը, օրհնութիւնն ու ողորմութիւնը մեր հայրենիքին ու մեզ ամէնքիս. Ամէն»։
