Հա

Քաղաքական

09/08/2021 - 13:25

«Փաշինեանը կամաց-կամաց յետ է կանգնո՞ւմ խոստումներից». քաղտեխնոլոգը խօսել է սահմանի լարումից

Քաղտեխնոլոգ Արմէն Բադալեանը Sputnik Արմենիայի եթերում անդրադարձել է այն հարցին, թէ ինչ նպատակների կարող է ծառայել այսպէս կոչւած Զանգեզուրի միջանցքը եւ ինչպէս կարող է իրականացւել հաւանական դեմարկացիան եւ դելիմիտացիան Հայաստանի ու Ադրբեջանի միջեւ։

«alikonline.ir» - Քաղտեխնոլոգ Արմէն Բադալեանը Sputnik Արմենիայի եթերում անդրադարձել է այն հարցին, թէ ինչ նպատակների կարող է ծառայել այսպէս կոչւած Զանգեզուրի միջանցքը եւ ինչպէս կարող է իրականացւել հաւանական դեմարկացիան եւ դելիմիտացիան Հայաստանի ու Ադրբեջանի միջեւ։

Բանակցային գործընթացում, որը տեղի է ունեցել 2020թ. նոյեմբերին ՀՀ վարչապետ Նիկոլ Փաշինեանի, ՌԴ նախագահ Վլադիմիր Պուտինի եւ Ադրբեջանի նախագահ Իլհամ Ալիեւի միջեւ, ինչպէս նաեւ 2021թ.-ի յունւարեան քննարկումների ժամանակ հնարաւոր է, որ շօշափւած լինեն այլ հարցեր, այդ թւում նաեւ «Զանգեզուրի միջանցքի» հարցը, ու թէեւ ՀՀ իշխանութիւնն ասում է, որ խոստումներ չի տւել միջանցքի առթիւ, բայցեւայնպէս, այդ խօսքը չենք կարող ընդունել որպէս 100-տոկոսանոց ճշմարտութիւն, քանզի ՀՀ իշխանութիւնն արդէն ցոյց է տւել, որ պատերազմի ընթացքում եւ դրանից յետոյ մի բան ասել է, բայց արել հակառակը։ Sputnik Արմենիայի հետ զրոյցում նման կարծիք յայտնեց քաղաքագէտ Արմէն Բադալեանը։

«Չի բացառւում, որ փակ քննարկումների ժամանակ Փաշինեանը խնդրած լինի ՌԴ-ի եւ Ադրբեջանի նախագահներին, որ իր վրայ ուժեղ ճնշում չգործադրեն, որ ինքը կարողանայ պաշտօնը պահել եւ դրա փոխարէն միջանցք տրամադրել Ադրբեջանին։ Չի բացառւում նաեւ, որ հիմա Փաշինեանը սկսել է կամաց-կամաց յետ կանգնել իր խոստումներից, ինչի արդիւնքում էլ Ադրբեջանը սահմանային լարւածութիւն է սանձազերծել` պահանջելով կատարել այն, ինչ խոստացւել է նախապէս»,- ասաց քաղտեխնոլոգը։

Բադալեանի կարծիքով` միջանցքը հետաքրքրում է ոչ միայն Ադրբեջանին, որպէսզի անմիջական ցամաքային կապ հաստատւի Թուրքիայի հետ, այլեւ Արեւմուտքին, որն իր հերթին կարող է այդ միջանցքի շնորհիւ դուրս գալ դէպի Միջին Ասիա` թուլացնելով Ռուսաստանի դիրքերը, ուստի այդ պատճառով էլ աջակցեց Փաշինեանի իշխանութեան վերարտադրմանը։

Քաղտեխնոլոգի համոզմամբ` տեսնելով, թէ ինչպիսի իշխանութիւն է այսօր Հայաստանում, որը պատրաստ է ամէն ինչ զիջել իշխանութիւնը պահելու համար, որի պատկերացմամբ ժողովրդավարութիւնը գերադասելի է անվտանգութիւնից, Ադրբեջանը ստիպելու է, որ իրեն վերադարձնեն ժամանակին Հայաստանի տարածքում եղած անկլաւները։ Պատահական չէ, որ Տաւուշի մարզի սահմանամերձ գօտում արդէն տեղակայւել են ռուս սահմանապահները, քանզի չի բացառւում, որ այդտեղ մեկնարկեն սահմանագծման աշխատանքները։

Յիշեցնենք, որ Արցախեան 44-օրեայ պատերազմից յետոյ էլ, երբ խօսւում էր Սիւնիքում սահմանազատման աշխատանքների հետեւանքով որոշ տարածքներ զիջելու մասին, վարչապետ Նիկոլ Փաշինեանը յայտարարել էր, որ Սիւնիքի այն տարածքը, որն այսօր գոյութիւն ունի, արձանագրւած է 2010 թ. ԱԺ կողմից հաստատւած «ՀՀ վարչատարածքային բաժանման մասին» օրէնքով։

ՀՀ մարդու իրաւունքների պաշտպան Արման Թաթոյեանն իր հերթին քանիցս ահազանգել է, որ ՀՀ պետական սահմանը չի կարող որոշւել վարչատարածքային բաժանման մասին օրէնքով։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։