Հա

Քաղաքական

11/09/2021 - 13:12

Երբ չկայ հայեցակարգ

Վերջերս խորհրդարանում վարչապետ Փաշինեանը ասել է, որ Հայաստանի իշխանութիւնները, ի տարբերութիւն Ադրբեջանի ղեկավարութեան, չունէին ղարաբաղեան խնդրի կարգաւորման հայեցակարգ:

ԱՐԱՄ ԱԲՐԱՀԱՄԵԱՆ

 

Վերջերս խորհրդարանում վարչապետ Փաշինեանը ասել է, որ Հայաստանի իշխանութիւնները, ի տարբերութիւն Ադրբեջանի ղեկավարութեան, չունէին ղարաբաղեան խնդրի կարգաւորման հայեցակարգ:

Եթէ խօսքը Քոչարեանի, Սարգսեանի եւ իր մասին է, ապա այդ պնդման հետ դժւար է վիճել: Հայեցակարգ կար մինչեւ 1998 թւականը, եւ այն ձեւակերպւել էր արցախեան առաջին պատերազմի ժամանակ. մենք գրաւում ենք նախկին ԼՂԻՄ-ի շուրջ գտնւող շրջանները, որպէսզի հետագայում դրանց մի մասը վերադարձնենք Ադրբեջանին՝ Ղարաբաղի՝ միջազգայնօրէն ճանաչւած կարգավիճակի դիմաց:

Տէր-Պետրոսեանի այդ մօտեցումը աջակցութիւն չգտաւ նրա թիմի մի մասի, ինչպէս նաեւ Հայաստանի քաղաքացիների մեծ մասի մօտ: Դրանից յետոյ եւ առայսօր հայեցակարգ իսկապէս չկայ: Ասել, որ լուծումը պէտք է բաւարարի Հայաստանի, Արցախի եւ Ադրբեջանի ժողովուրդներին՝ հայեցակարգ չէր, պարզապէս գեղեցիկ ձեւակերպում էր, լաւագոյն դէպքում՝ բարի ցանկութիւն, որը չիրականացաւ: Ադրբեջանն, ի վերջոյ, գտաւ լուծում, որը հիմնականում բաւարարում է իրեն եւ ամենեւին չի բաւարարում մեզ:

Հիմա էլ են Հայաստանի իշխանութեան ներկայացուցիչները պարբերաբար խօսում Ադրբեջանի եւ Թուրքայի հետ յարաբերութիւնները կարգավորելու մասին: Ի տարբերություն «ուռա-հայրենասէրների»՝ ես գտնում եմ, որ դա կենսական անհրաժեշտութիւն է: Բայց այժմ էլ, ըստ էութեան, չի ասւում, թէ ինչպիսի հայեցակարգի հիման վրայ է դա տեղի ունենալու:

Ճանաչելո՞վ այդ երկրների տարածքային ամբողջականութիւնը, թէ՞ վերապահումներ անելով այդ հարցում: Ընդունելո՞վ, որ Արցախի Հանրապետութիւնից մնացել է մի փոքրիկ կտոր, թէ՞ չհամաձայնելով այդ իրողութեան հետ: Մենք պաշտօնապէս համարո՞ւմ ենք Շուշին եւ Հադրութը օկուպացւած, թէ՞ ոչ: Թուրքիայի հետ պիտի ստորագրւի 2009-ի ցիւրիխեան արձանագրութիւնների նման մի փաստաթո՞ւղթ, թէ՞ մշակւեն բոլորովին այլ գաղափարների վրայ հիմնւած բանաձեւեր:

Սովորաբար, երբ չկայ հայեցակարգ, իշխանութիւնները նման հարցերը «ցրում են» հետեւեալ նախադասութիւններով. «Այդ ամէնը պէտք է որոշւի բուն բանակցութիւնների ժամանակ»: Կամ՝ «մեր մօտեցումը հիմնւած է ազգերի ինքնորոշման սկզբունքի վրայ»: Բայց արդեօ՞ք Թուրքիան եւ Ադրբեջանը, որոնք, ինչպէս պարզեցինք, հայեցակարգ ունեն, պատրաստ են բանակցութիւններ վարել այդ սկզբունքի շուրջ: Եթէ պատրաստ չեն, իսկ մենք պատրաստ չենք իրենց պայմաններին, ապա արդեօ՞ք բանակցային վիճակը սկզբունքօրէն նոյնը չէ, ինչ 1998-2018 թւականներին՝ այն տարբերութեամբ, որ պատերազմում յաղթած կողմերը հիմքեր ունեն էապէս կարծրացնելու իրենց դիրքորոշումը: Իսկ եթէ այդպէս է, ապա արդեօ՞ք այսօրւայ կարգավիճակն իր մէջ չի պարունակում նոր պատերազմի վտանգ:

 

Aravot.am

 

Յարակից լուրեր

  • Չբարձրաձայնւող երկխօսութիւնը
    Չբարձրաձայնւող երկխօսութիւնը

    Խօսքն իշխանութիւնների եւ քաղաքացիների չբարձրաձայնւող երկխօսութեան, կամ, եթէ ուզում էք՝պայմանագրի մասին է: Օրինակ, մի քանի տասնամեակ առաջ եւրոպացիներին հարցրին՝դո՞ւք համաձայն էք զիջել ձեր պետութիւնների ինքնիշխանութեան մի մասը, բայց փոխարէնը բարձրացնել ձեր բարեկեցութեան մակարդակը: Կամ ռուսաստանցիներին Պուտինն առաջարկեց՝ դուք ուզո՞ւմ էք, որ սահմանափակւեն քաղաքական ու տնտեսական ազատութիւնները, բայց դուք աւելի լաւ ապրէք: 

  • Չնմանւել իշխանութիւններին
    Չնմանւել իշխանութիւններին

    Այն, որ Ազգային ժողովում կրքեր են եռում, նորմալ է. իհարկէ, աւելի լաւ է չբղաւել կամ իրար չվիրաւորել, բայց դրա մէջ էլ ոչ մի արտառոց բան չկայ՝ ոչ մեր, ոչ էլ աշխարհի որեւէ այլ խորհրդարանի պրակտիկայում: Իշխանաւորների կեցւածքի մէջ նոյնպէս որեւէ արտասովոր բան չկայ. կոմունիստների, ՀՀՇ-ականների (իշխանութեան 3-րդ տարուց սկսած), ՀՀԿ-ականների նման, նրանք փքւած են, ինքնագոհ, քննադատութեան եւ իրենց մատչելիութեան համար ամէն կողմից արգելքներ դնող:

  • Որքա՞ն մտածող մարդ կայ Հայաստանում
    Որքա՞ն մտածող մարդ կայ Հայաստանում

    «Ես Փաշինեանին շատ եմ սիրում ու յարգում», - երէկ ինձ խոստովանեց մի ծանօթ: «Շատ էլ լաւ էք անում,- պատասխանեցի,- իսկ ինչո՞ւ էք այդքան սիրում ու յարգում»: Զրուցակիցս մէկ րոպէ մտածեց ու յետոյ ասաց. «Որովհետեւ մնացածներին տանել չեմ կարողանում»:

  • Հայաստանում հիբրիդային ռեժիմ է
    Հայաստանում հիբրիդային ռեժիմ է

    Դասական աւտորիտարիզմի դէպքում ամէն ինչ պարզ է: Կայ Պուտին, կան Կրեմլում նրա կողքը հաւաքւած մարդիկ, կան նահանգապետեր, գեներալներ, ԿԳԲ, ոստիկանութիւն, մահակներ, աւտոմատներ, գրաքննութեան պայմաններում աշխատող դաշնային հեռուստաալիքներ:

  • 54 տոկոսը «փակեց» Արցախի խնդիրը
    54 տոկոսը «փակեց» Արցախի խնդիրը

    Փաշինեանին վստահութեան մանդատ տալով, մեր քաղաքացիների 54 տոկոսը հերթական անգամ «մերժեց նախկիններին», պարզ է, եւ դրա մասին շատ է խօսւել: Բայց միայն «նախկինները» չէ, որ մերժւել են. կասկածի տակ է դրւել այն հիմքը, որի վրայ ստեղծւել է Երրորդ Հանրապետութիւնը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։