Հա

Քաղաքական

12/09/2021 - 11:30

«Այդ ամէնը խելքին մօտ չէ, բարոյական էլ չէ». Շիրակի թեմի առաջնորդը՝ սեպտեմբերի 21-ի գունագեղ միջոցառման մասին

168.am-ի հետ զրոյցում Շիրակի թեմի առաջնորդ Միքայէլ արքեպիսկոպոս Աջապահեանն անդրադառնալով Նիկոլ Փաշինեանի կողմից կազմակերպւող միջոցառմանը՝ նկատեց.

«alikonline.ir» - Սեպտեմբերի 8-ին ՀՀ կառավարութեան նիստի ժամանակ Նիկոլ Փաշինեանը յայտարարել է, որ Հայաստանի անկախութեան 30-ամեակին՝ սեպտեմբերի 21-ին, Հանրապետութեան հրապարակում տեղի է ունենալու «մասշտաբային եւ գունագեղ տօնակատարութիւն»։

«Այս տարի ՀՀ անկախութեան 30-ամեակն է, եւ մեզ յայտնի հանգամանքների բերումով մեր տրամադրութիւնը տօնական համարել չի կարելի, բայց մենք որոշում ենք կայացրել, որ ՀՀ անկախութեան 30-րդ տարեդարձը պէտք է պատշաճ ձեւով նշւի: Եւ ուզում եմ ասել, որ սեպտեմբերի 21-ին Երեւանի Հանրապետութեան հրապարակում տեղի է ունենալու մասշտաբային եւ գունագեղ տօնակատարութիւն, եւ այդ տօնակատարութիւնը, իհարկէ, առաջին հերթին նւիրւած է լինելու ՀՀ անկախութեան, ինքնիշխանութեան, անվտանգութեան եւ Արցախի համար իրենց կեանքը զոհած մեր նահատակների յիշատակին»,- ասել է Նիկոլ Փաշինեանը։

168.am-ի հետ զրոյցում Շիրակի թեմի առաջնորդ Միքայէլ արքեպիսկոպոս Աջապահեանն անդրադառնալով Նիկոլ Փաշինեանի կողմից կազմակերպւող միջոցառմանը՝ նկատեց.

«Իհարկէ, այդ ամէնը խելքին մօտ չէ, բարոյական էլ չէ, եւ տօնակատարութիւն տերմինը չի ներդաշնակւում՝ ի յիշատակ դեռեւս մէկ տարին չլրացած զոհերի, ընդ որում, ցաւօք, պարտութեամբ աւարտւած հերոսների, բացարձակ ներդաշնակում չկայ։ Այս իշխանութիւններից որեւէ խելքին մօտ բան սպասելը, կարծում եմ՝ խելքին մօտ չէ»։

Հարցին՝ հասարակութիւնն այդ օրը կը գնա՞յ գունագեղ միջոցառմանը, Շիրակի թեմի առաջնորդը պատասխանեց՝ գնացողներ էլ կը լինեն, չգնացողներ էլ։

«Իհարկէ, գնացող կը լինի, բա եթէ ներկայիս իշխանութիւններին 600 հազար մարդ ձայն է տւել, անշուշտ, նաեւ կը գնան Հանրապետութեան հրապարակ»,- յաւելեց նա։

Ինչ վերաբերում է Նիկոլ Փաշինեանի՝ նախընտրական քարոզարշաւի ժամանակ հոգեւորականներին թիրախաւորելուն եւ նրանց կոռումպացւած համարելուն եւ հարցին՝ յունիսի 20-ից յետոյ իրեն իշխանութիւնը թիրախաւորե՞լ է, Միքայէլ արքեպիսկոպոս Աջապահեանը պատասխանեց, որ որեւէ թիրախաւորում չի եղել, սակայն պասիւ թիրախաւորում եղել է։

«Մեր դիմումը երկար ժամանակ եղել է անպատասխան, սակայն ակտիւ որեւէ թիրախաւորում չի եղել։ Դէ, մենք տարբեր դիմում ենք ուղարկում կառավարութիւն՝ մեր խնդիրների հետ կապւած, եւ բաւականին երկար տեւեց, մինչեւ մէկ խնդրի դրական պատասխանը ստացանք։ Մինչդեռ այդքան երկար չպէտք է տեւէր այդ դրական պատասխան ստանալը»,- շեշտեց նա։

Սրբազանը նաեւ անդրադարձաւ Լոսի Քիսոյի՝ Քրիստինէ Հալաջեանի «պահանջին», որ Գիւմրիից պէտք է հանւի Հայրենական պատերազմին նւիրւած յուշարձանը։

«Որ պահանջում է, պէտք է հանենք, բա ի՞նչ պէտք է անենք, չենթարկւե՞նք։ Սա, իհարկէ, կատակ էր, ու պէտք չէ ամէն անլուրջ արտայայտութեան լուրջ վերաբերւել, դրանով մարդիկ կարծում են, թէ իրենք լուրջ են։ Ամէն անմտութիւն պէտք չէ քննարկել կամ մեկնաբանել, ի՞նչ կարիք կայ»,- եզրափակեց Շիրակի թեմի առաջնորդը։

 

Զւարթ Խաչատրեան

 

Յարակից լուրեր

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։