Հա

Քաղաքական

21/09/2021 - 08:25

«Պէտք է կանխել Հայաստանի թուրքացումը». ՀՀ ԱԺ փոխխօսնակի յայտարարութիւնը

ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ փոխնախագահ Իշխան Սաղաթելեանը յայտարարութիւն է տարածել` անդրադառնալով վերջին զարգացումներին․

«alikonline.ir» - ՀՅԴ Հայաստանի Գերագոյն մարմնի ներկայացուցիչ, ՀՀ ԱԺ փոխնախագահ Իշխան Սաղաթելեանը յայտարարութիւն է տարածել` անդրադառնալով վերջին զարգացումներին.

Սիրելի՛ հայրենակիցներ,

Երէկ թշնամական Թուրքիայի ղեկավարից տեղեկացանք, որ Հայաստանի վարչապետի պաշտօնը զբաղեցնող անձը միջնորդաւորւած կերպով նրանից հանդիպում է խնդրել։ Արհամարհելով դիւանագիտական նրբութիւնները՝ Էրդողանն այդ մասին յայտարարեց եւ ի ցոյց դրեց Հայաստանի ղեկավարութեան նկատմամբ իր հրամայական ու անյարգալից կեցւածքը։ Յատկանշական է, որ թուրքական նախորդ նախապայմաններին արդէն հրապարակաւ գումարւել է նորը՝ Սիւնիքի միջով թուրքական աշխարհն իրար կապող միջանցքի տրամադրումը։ Էրդողանի կողմից միայն այդ նախապայմանի յիշատակումը, ինչպէս նաեւ ՀՀ կառավարութեան գործունէութեան ծրագիրը բաւարար հիմքեր են տալիս ենթադրելու, որ Հայաստանին պարտադրւող թուրքական այլ նախապայմանները՝ Հայոց Ցեղասպանութեան միջազգային ճանաչումից հրաժարումը, Հայաստան-Թուրքիա ներկայ սահմանի դէ իւրէ ընդունումը եւ Արցախից հրաժարումը, Հայաստանի իշխանութիւնները բաւարարել են։

Հայաստանի՝ միակողմանիօրէն տարածաշրջանային խաղաղութիւն հաստատելու ինքնահռչակ եւ անհեռանկար գաղափարներով տարւած իշխանութիւնն, իր ղեկավարով հանդերձ, ակնյայտօրէն չի հասկանում, թէ իրենցից ինչ են ներկայացնում պանթուրքական անթաքոյց նկրտումներով առաջնորդւող ժամանակակից Թուրքիան եւ դրա նախագահը, որը տարւած է օսմանեան սուլթանների երբեմնի վարքով։

Բայց Էրդողանն ու մեր ժողովրդի թշնամիները շատ յստակ պէտք է հասկանան՝ Հայաստանի վարչապետի պաշտօնը զբաղեցնողին չի՛ կարելի նոյնացնել հայկական պետութեան հետ։ Այո, հայ ժողովուրդն ապրում է իր պատմութեան դժւարագոյն ժամանակներից մէկը, բայց դա չի նշանակում, որ հայ ժողովուրդը հրաժարւելու է իր անժամանցելի իրաւունքներից եւ, տեղի տալով ադրբեջանաթուրքական սպառնալիքներին, հարցականի տակ է դնելու մեր պետութեան գոյութիւնը։

Մեր ժողովրդի պատմութեան նախորդ դարը ազգային վերածննդի բացառիկ օրինակ ու դաս է։ Կարճ ժամանակում ցեղասպանւած ժողովուրդն ի զորու եղաւ իր մէջքը շտկել եւ անհաւանական ջանքերով հարիւրամեակների ընդմիջումից յետոյ պետութիւն ստեղծել, արւեստ ու մշակոյթ զարգացնել, Արցախ ազատագրել։

Սիրելի՛ հայրենակիցներ, մենք համախմբւած կերպով պէտք է մերժենք այս՝ չարիքի իշխանութեան առաջ բերած կործանարար օրակարգը եւ կանխենք Հայաստանի թուրքացումը. սեղանին է դրւած հայկական պետականութեան գոյութեան հարցը, եւ մենք համակերպւելու, նահանջելու իրաւունք չունենք։

Յ.Գ. Յիշեցնեմ, որ պատերազմի ընթացքում ՆՓ-ն Արցախի նկատմամբ սանձազերծւած ագրեսիան որակում էր ադրբեջանաթուրքական ահաբեկչութիւն. հետաքրքիր է՝ ի՞նչ փոխւեց, այլեւս ահաբեկիչ չե՞ն:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։