Հա

Քաղաքական

23/09/2021 - 08:30

«Առանց Հայաստանի Արցախը չի կարող գոյատեւել». Դաւիթ Իշխանեան

ՀՀ անկախութեան 30-րդ տարեդարձի կապակցութեամբ, Արցախում՝ «Հայաստանի Հանրապետութիւն» օրաթերթի սեփական թղթակիցը հանդիպել է ԱԺ պատգամաւոր, ՀՅԴ Արցախի ԿԿ անդամ Դաւիթ Իշխանեանին եւ փորձել նրանից ստանալ հետաքրքրող հարցերի պատասխանները:

«alikonline.ir» - ՀՀ անկախութեան 30-րդ տարեդարձի կապակցութեամբ, Արցախում՝ «Հայաստանի Հանրապետութիւն» օրաթերթի սեփական թղթակիցը հանդիպել է ԱԺ պատգամաւոր, ՀՅԴ Արցախի ԿԿ անդամ Դաւիթ Իշխանեանին եւ փորձել նրանից ստանալ հետաքրքրող հարցերի պատասխանները:

 

- Ի՞նչ խորհուրդ ունի Ձեզ համար ՀՀ անկախութեան 30-ամեակը:

- Անկախութեան 30-ամեայ յոբելեանի առիթով նախ իմ շնորհաւորանքներն եմ փոխանցում աշխարհասփիւռ հայութեանը: Ընդհանրապէս անկախութիւն հասկացութիւնը եւ անկախութեան գաղափարը իւրաքանչիւր անձի եւ իւրաքանչիւր քաղաքացու մօտ պէտք է խոր արմատներ ունենայ: Այստեղ էականը ՀՀ անկախութեան 30-ամեայ յոբելեանը չէ, կարեւորն այդ գաղափարի արմատաւորումն է: Որքանո՞վ է այն արմատաւորւած մեր հասարակութեան եւ քաղաքացիների ներաշխարհում: Իմ պատկերացմամբ, մենք դեռեւս ունենք լուրջ անելիքներ եւ եթէ անկախութեան գաղափարը խոր արմատներ ունենար, ապա մենք այսօրւայ իրավիճակում եւ այսօրւայ կացութեան մէջ չէինք լինի:

 

- Իրաւական եւ պատմական ի՞նչ հանգամանքներ նպաստեցին Հայաստանի անկախութեան վերականգնմանը:

- Հայաստանի խորհրդային Հանրապետութեան գոյութեան 70 տարիների ընթացքում անկախութեան գաղափարը չէր մարել մեր ժողովրդի մէջ: 1920-1991թթ. Հայաստան իրականում անկախ չէր, իսկ 1991թ. կերտւած ՀՀ անկախութիւնը տրամաբանական գործըթնաց էր՝ Արցախեան ազատագրական պայքարի ֆոնի վրայ եւ աշխարհաքաղաքական իրադարձութիւնների յորձանուտում: Այն ուներ իր իրաւական հիմքերը եւ իրաւական նախադրեալները: Օգտւելով հէնց այդ իրաւական հնարաւորութիւններից, ինչպէս Խորհրդային Միութեան միւս բոլոր հանրապետութիւնները, Հայաստանը յայտարարեց իր անկախութեան մասին:

Մեր ժողովրդի մօտ այդ դարաւոր երազանքը մշտարթուն էր դեռեւս Անիի կործանումից, Բագրատունեաց թագաւորութեան անկումից ու Կիլիկեան հայկական պետութեան կորստից յետոյ, պարզապէս դարերի ընթացքում խամրել էր ու նորից առկայծեց 19-րդ դարավերջին եւ 20-րդ դարասկզբին: Ազատագրական պայքարի արդիւնքում 1918թ.-ին մենք կերտեցինք անկախ պետութիւն: Ցաւօք, այն շատ կարճ կեանք ունեցաւ: 1991թ. ՀՀ անկախութեան հռչակումով հնարաւորութիւն ունեցանք որպէս անկախ պետութիւն հանդէս գալ միջազգային մակարդակում:

 

- Հայաստանի անկախութեան հռչակումն ի՞նչ ազդեցութիւն ունեցաւ Արցախի կեանքում, երկրում իրադարձութիւնների հետագայ զարգացման, ժողովրդի պայքարի ու անվտանգութեան ապահովման տեսանկիւնից:

- Արցախեան ազատագրական պայքարը եւ ՀՀ անկախութիւնը միմեանց հետ փոխկապակցւած են: Մենք այսօր չէ, որ այս մասին բարձրաձայնում ենք, միշտ էլ ունեցել ենք այդ գիտակցումը, որ Արցախեան ազատագրական պայքարի հիմնական ողնաշարը ՀՀ է, Հայաստան պետութիւնն է եւ առանց Հայաստան պետութեան, առանց նրա գործուն աջակցութեան Արցախը չի կարող իր երազանքներն իրականացնել:

Այսօր այդ առանցքը խախտւած է, բայց 30-ամեայ պատմութեան ժամանակահատւածում մենք ունեցանք բաւականին լուրջ նախադրեալներ եւ հնարաւորութիւններ այլ ճանապարհով ընթանալու եւ այլ իրավիճակ ունենալու: Ցաւօք սրտի, այսօր կացութիւնն այլ է: Մէկ անգամ եւս պէտք է արձանագրել, որ Արցախի հիմնահարցի լուծումը եւ հայ ժողովրդի երազանքների իրականացումը դեռեւս կէս ճանապարհին է եւ այստեղ Հայաստան պետութիւնն ու Հայաստանի Հանրապետութիւնը, որպէս հայ ժողովրդի նպատակների եւ իղձերի արտայայտիչ, պարտաւոր են տէր կանգնել եւ միացեալ Հայաստանի գաղափարի դրօշակակիրը դառնալ:

 

- Ստեղծւած բարդ ռազմաքաղաքական իրավիճակում ինչպէ՞ս էք պատկերացնում Հայաստանի եւ Արցախի հետագայ ճակատագիրը, ապագան, եւ ո՞րն է արտաքին ուժերին, մասնաւորապէս՝ թշնամի երկրներին դիմակայելու գլխաւոր բանալին:

- Այսօր վտանգւած է ոչ միայն Արցախի, այլ նաեւ Հայստանի Հանրապետութեան ճակատագիրը՝ որպէս սուվերեն, ինքնիշխան պետութիւններ: Արցախի ճակատագրի մշուշոտ իրավիճակի հանգուցալուծման հիմնական բանալին ՀՀ հզօրացման եւ ՀՀ քայլերի մէջ է: Արցախն իր հերթին կարեւոր դերակատարութիւն ունի համահայկական տիրոյթում, նաեւ համաշխարհային հանրութեան մօտ ինքնուրոյնութեան դրսեւորման առումով: Բայց իմ հասկացողութեամբ եւ իմ պատկերացումներով, հիմնական ողնաշարը եւ հիմնական յենասիւնը ՀՀ է եւ առանց Հայաստանի Արցախը չի կարող իր գոյատեւումն ապահովել:

Տարբեր տեսակէտներ կան Արցախը Ռուսաստանի կազմում ներառելու, այլ իրաւաքաղաքական կարգավիճակ ունենալու առումով, բայց ակնյայտ է, որ Արցախի ապագայի հիմնական օրակարգը ՀՀ հետ վերամիաւորումն է: Վերամիաւորման գաղափարը, որպէս ռազմավարական նպատակ, պէտք է լինի հիմնական օրակագային հարցը, հարցերի հարցը: Պէտք է կարողանանք համատեղ ուժերով, ջանքերով դիմակայել այն նոր ազդեցութիւններին, որ փորձում են մեզ պարտադրել հրաժարւելու Արցախի հիմնահարցից՝ Ադրբեջանի, Թուրքիայի կամ արտաքին որեւէ այլ ուժի կողմից:

Միասնական օրակարգի հարցին պէտք է ցուցաբերւի միասնական մօտեցում եւ կունենանք 1988թ.-ին որդեգրւած նպատակների իրականացում, որի առաջին հանգրւանը կարելի է համարել 1991 թ. անկախութեան հռչակումը:

 

Զրուցեց՝ Դաւիթ Միքայէլեանը

«Հայաստանի Հանրապետութիւն» օրաթերթ

 

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։