Հա

Քաղաքական

12/10/2021 - 12:15

«Քաղաքական իշխանութեան յաջորդ թիրախը Դաւիթ Տօնոյեանից յետոյ Օնիկ Գասպարեանն է»․ Նայիրի Յոխիկեան

Քաղաքական իշխանութեան յաջորդ թիրախը Դաւիթ Տօնոյեանից յետոյ Օնիկ Գասպարեանն է՝ Yerkir.am-ի հետ հարցազրույցում ասաց լրագրող, փորձագէտ Նայիրի Յոխիկեանը՝ անդրադառնալով Իրազեկ քաղաքացիների միաւորում ՀԿ նախագահ Դանիէլ Իոաննիսեանի գրառմանը՝ իբրեւ թէ «Հադրութը գրաււեց բանակի որոշ պաշտօնեաների ու գլխաւոր շտաբի բացարձակ անկոպիտենտութեան արդիւնքում», իսկ «Նիկոլ Փաշինեանը վաղուց է յայտնի է սխալ մարդկանց վստահելու խասյաթով (յիշէք գոնէ Վանեցեանին), Դաւիթ Տօնոյեանին, Օնիկ Գասպարեանին ու բանակի ղեկավարութեանը իր անտեղի վստահելը շատ թանկ նստեց բոլորիս վրայ»։

«alikonline.ir» - Քաղաքական իշխանութեան յաջորդ թիրախը Դաւիթ Տօնոյեանից յետոյ Օնիկ Գասպարեանն է՝ Yerkir.am-ի հետ հարցազրույցում ասաց լրագրող, փորձագէտ Նայիրի Յոխիկեանը՝ անդրադառնալով Իրազեկ քաղաքացիների միաւորում ՀԿ նախագահ Դանիէլ Իոաննիսեանի գրառմանը՝ իբրեւ թէ «Հադրութը գրաււեց բանակի որոշ պաշտօնեաների ու գլխաւոր շտաբի բացարձակ անկոպիտենտութեան արդիւնքում», իսկ «Նիկոլ Փաշինեանը վաղուց է յայտնի է սխալ մարդկանց վստահելու խասյաթով (յիշէք գոնէ Վանեցեանին), Դաւիթ Տօնոյեանին, Օնիկ Գասպարեանին ու բանակի ղեկավարութեանը իր անտեղի վստահելը շատ թանկ նստեց բոլորիս վրայ»։

Նայիրի Յոխիկեանը վստահ է, որ շատ մօտ ապագայում՝ ամիսների ընթացքում, գուցէ շաբաթների, Օնիկ Գասպարեանը կը յայտնւի թիրախում։

«Մանաւանդ որ, այդ պատերազմական գործողութիւնները քննող յանձնաժողովը պիտի սկսի աշխատել, Օնիկ Գասպարեանին պիտի հրաւիրեն յանձնաժողովում հարցաքննութեան, եւ ի՞նչ պիտի լինի, պիտի սկսեն Օնիկ Գասպարեանին թիրախաւորել այնպէս, որ հէնց նա՛ է գլխաւոր մեղաւորը ռազմական գործողութիւնների ժամանակ տեղի ունեցած այդ բոլոր խնդիրների»,- պարզաբանեց լրագրողը։

Եթէ անգամ Օնիկ Գասպարեանը՝ ԳՇ պետ եղած ժամանակ բարձրաստիճան սպայակազմի հետ չպահանջէր Նիկոլ Փաշինեանի հրաժարականը, Յոխիկեանի համոզմամբ, Նիկոլ Փաշինեանը, միեւնոյն է, կը մեղադրէր նրան կամ մէկ ուրիշի, քանի որ Փաշինեանը սովոր է բոլորին մեղադրել եւ քաւութեան նոխազ փնտրել։

«Ի վերջոյ, դուք տեսնում էք, որ հանրութեան մէջ աստիճանաբար մարդիկ հասկանում են՝ ինչ է տեղի ունեցել, մարդիկ շատ լաւ են սկսում հասկանալ, նոյնիսկ այն մարդիկ, ովքեր մինչեւ հիմա Նիկոլ Փաշինեանին պաշտպանել են, այդ մարդիկ հասկանում են, սկսում են գիտակցել, որ իրենք խաբւել են, իսկ հայրենիքը գործարքով վաճառւել է»,- ասաց Նայիրի Յոխիկեանը։

Եւ ո՞վ պիտի դրա համար պատասխանատւութիւն կրի. եթէ ոչ իրական մեղաւորը, ապա մարդիկ, որ իրական մեղաւորի դէմ են դուրս եկել՝ նշեց նա։

«Հետեւաբար, մենք առաջիկայ ամիսներին գործ ենք ունենալու կոնկրետ մարդկանց թիրախաւորման հետ եւ չեմ բացառում, որ սկսեն արդէն հայրենիքի դաւաճանների փնտրել, գտնել, ամէն ինչ կը հեռացնեն Նիկոլ Փաշինեանից, այնպէս կանեն, որ Նիկոլ Փաշինեանը սուրբ է, եւ նրան պարզապէս խաբել են»,- ասաց լրագրողը։

Այս գործընթացով փորձում են Նիկոլ Փաշինեանի ձեռքերը մաքրել ոչ միայն Հադրութը, այլեւ Շուշին յանձնելու արիւնից, քանի որ եթէ Հադրութը պաշտպանւած մնար, թշնամին չէր կարողանայ հասնել Շուշի։ Յոխիկեանը համոզւած է, որ Շուշիի ճանապարհը պաշտպանւել է մեր զօրքի, կամաւորականների անձնական նւիրւածութեան, ոչ թէ համակարգւած պաշտպանութեան շնորհիւ։

«Շուշիի անկման ճանապարհը» ֆիլմում Նայիրի Յոխիկեանը զրուցել է Հադրութից մինչեւ Շուշի մարտական գործողութիւններին մասնակցած շատ-շատ մարդկանց հետ, յատկապէս բարձր սպայակազմի հետ, եւ բոլորը միաբերան ասել են, որ սա կազմակերպւած նահանջ էր, կազմակերպւած յանձնում էր։

«Իսկ առանց Հադրութը յանձնելու՝ թշնամին որեւէ ճանապարհ չունէր Շուշի հասնելու։ Թշնամին սկզբում փորձեց Բերձորի՝ Լաչինի ուղղութեամբ, չյաջողւեց, այդտեղ բաւական մեծ ջարդ կերաւ։ Յետոյ փորձեց դէպի Մարտունի-Ճարտար ուղղութեամբ, այսինքն, Վարանդա-Ֆիզուլիից մտնել դէպի Մարտունի, շարժւել դէպի Ճարտար եւ այդպէս շարունակ, էլի չստացւեց, Մարտունու ճակատամարտը այս 44-օրեայ պատերազմի գլխաւոր ճակատամարտներից մէկն էր, որն արժանի է յիշատակման, եւ Մարտունու ճակատամարտի մասին պէտք է նաեւ լուրջ աշխատութիւններ լինեն, թէ ինչպիսի հերոսութիւններ են արել մերոնք՝ առանց քաղաքական իշխանութեան թոյլտւութեան։ Միակ տարբերակը մնացել էր Հադրութը»,- բացատրեց Նայիրի Յոխիկեանը։

Եւ յանկարծ Հադրութը, որը շատ լաւ պաշտպանւում էր, Հադրութի հրամանատարութիւնը՝ գնդապետ Սերգէյ Շաքարեանը, ով նաեւ հադրութեցի էր, ադրբեջանցիներին ջարդու էր, յանկարծ անակնկալ Հադրութը յանձնում են եւ թշնամին մարշով հասնում է Շուշի։

Նայիրի Յոխիկեանը նաեւ պատմեց, թէ ինչպէս է Փաշինեանի մերձաւոր օլիգարխներից մէկն իրեն ասել, որ Սերգէյ Շաքարեանն իր զօրախմբով ջարդում էր Հադրութի տակով դէպի Շուշի գնալ փորձող հազարաւոր ադրբեջանցիների ու թշնամու հարիւրաւոր տանկեր. «բա դա մարդ ա՞․․․»,- ասել էր օլիգարխը։

«Նիկոլ Փաշինեանը եւ նրա խունտան շատ լաւ հասկանում են, որ հնարաւոր չէ մարդկանց աչքից թաքցնել իրողութիւնը, մարդիկ տեսել են, ովքեր չեն տեսել՝ լսել են, գիտեն, աստիճանաբար աւելի ու աւելի են համոզւում, որ Հադրութ, որից յետոյ արդէն Թաղավարդ, յետոյ Զարդանաշէն, Սղնախները, Քարին Տակ եւ ապա Շուշի, այդ ամբողջ ճանապարհը լուրջ պաշտպանութեամբ չի յանձնւել, յանձնւել է կազմակերպւած նահանջով, թէպէտ զինւորականութիւնը եւ կամաւորականները դիմադրութիւն ցոյց են տւել, բայց համակարգւած գործողութիւններ չեն եղել, խրամատներ չեն փորւել, այսինքն, պաշտպանական համակարգ չի ստեղծւել, եւ դա կարող էր արւել միայն գերագոյնի հրահանգով»,- ասաց Նայիրի Յոխիկեանը։

Նա նշեց, որ Նիկոլ Փաշինեանը եւ նրա խունտան լաւ են հասկանում, որ ի վերջոյ մարդկանց աչքից դա հնարաւոր չէ ծածկել, այդ պատճառով իրականութիւնն այլ կերպ են ներկայացնում, ասում են՝ այո, իհարկէ, Հադրութը լաւ չի պաշտպանւել, Շուշին յանձնւել է, բայց դա Նիկոլը չի արել, դրա մեղաւորը, ասենք, Օնիկ Գասպարեանն է, Դաւիթ Տօնոյեանն է, եւ միւսները։

«Իհարկէ, ես մեղադրում եմ ե՛ւ Օնիկ Գասպարեանին, ե՛ւ Դաւիթ Տօնոյեանին եւ զինւորականութեան միւս հրամանատարութեանը, որովհետեւ եթէ դու տեսնում ես, հասկանում ես, որ գերագոյն գլխաւոր հրամանատարը դաւաճանում է երկրին, դու պէտք է նախ եւ առաջ արգելափակես այդ մարդուն, եւ երկրի կառավարումը քո ձեռքը վերցես։ Ոչ թէ անես այն, ինչ քեզ հրահանգում են, յետոյ ասես՝ դաւաճանեցին»,- ասաց Յոխիկեանը։

Նա նշեց, որ այս առումով է մեղադրում, բայց եթէ անգամ նրանք մեղաւոր են, Հադրութն ու Շուշին յանձնելը ա՛յդ մարդկանց նախաձեռնութիւնը չի եղել, այլ, ամենայն հաւանականութեամբ, գերագոյն հրամանատարի, որին խաբելն, ի դէպ, այդքան էլ հեշտ չէ։

 

Աննա Բալեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։