ՀՀ բարձր տեխնոլոգիական արդիւնաբերութեան նախարար Վահագն Խաչատուրեանը հոկտեմբերի 11-ին ընդունել է Հայաստանի Հանրապետութիւնում Իրանի Իսլամական Հանրապետութեան արտակարգ եւ լիազօր դեսպան Աբբաս Բադախշան Զոհուրիին։
«alikonline.ir» - ՀՀ բարձր տեխնոլոգիական արդիւնաբերութեան նախարար Վահագն Խաչատուրեանը հոկտեմբերի 11-ին ընդունել է Հայաստանի Հանրապետութիւնում Իրանի Իսլամական Հանրապետութեան արտակարգ եւ լիազօր դեսպան Աբբաս Բադախշան Զոհուրիին։
Նախարարը ողջունել է դեսպանին, ընդգծել երկու երկրների միջեւ դարերի խորքից եկող բարեկամական յարաբերութիւնները, ապա՝ անդրադարձել Իրանի հետ նախարարութեան ունեցած ծրագրերին եւ համագործակցութեան ընդլայնման հնարաւորութիւններին։
«Արմէնպրես»-ի փոխանցմամբ՝ ինչպէս յայտնում են ՀՀ բարձր տեխնոլոգիական արդիւնաբերութեան նախարարութիւնից, նախարարը կարեւորել է երկու երկրների միջեւ արդէն իսկ հաստատւած վստահելի գործընկերային յարարաբերութիւնները եւ նշել, որ այժմ անհրաժեշտութիւն կայ յստակեցնելու անելիքները եւ ներդրում ունենալ, որպէսզի գործարար շրջանակները երկուստեք կարողանան առաւել ակտիւ համագործակցել։
Դեսպանը շնորհակալութիւն է յայտնել ընդունելութեան համար, կարեւորել ձեռք բերւած պայմանաւորւածութիւնների եւ ծրագրերի իրականացման համար սահմանւած ժամկէտների յստակեցումը: Համագործակցութիւնն առաւել ակտիւացնելու նպատակով՝ Աբբաս Բադախշան Զոհուրի նաեւ առաջարկել է մասնակցություն ունենալ անցկացւող ոլորտային ցուցահանդէսներին, փոխադարձ աշխատանքային այցելութիւններ կազմակերպել ոլորտի մասնագէտների, պատւիրակութիւնների, միջբուհական եւ գիտական կառոյցների միջեւ։
Անդրադարձ է եղել հոկտեմբերի վերջին Երեւանում նախատեսւող DigiWeek-2021 միջոցառմանը, որի շրջանակներում տեղի կունենայ նաեւ Digitec ցուցահանդէսը։ Նշւել է, որ իրանական կողմին արդէն իսկ մասնակցութեան հրաւէր է յղւել եւ իրանական ներկայացուցչական պատւիրակութեան մասնակցութիւնն այդ միջոցառմանը ողջունելի կը լինի։
