Հա

Քաղաքական

19/10/2021 - 13:10

«Մենք ամէն օր մտածում ենք այս իշխանութեանը հեռացնելու մասին». Քրիստինէ Վարդանեան

Parliamentmonitoring.am-ի հարցազրոյցը «Հայաստան» խմբակցութեան պատգամաւոր Քրիստինէ Վարդանեանի հետ:

 

«alikonline.ir» - Parliamentmonitoring.am-ի հարցազրոյցը «Հայաստան» խմբակցութեան պատգամաւոր Քրիստինէ Վարդանեանի հետ:

 

- Ձեր խմբակցութեան պատգամաւորներից Արթուր Սարգսեանը, որը կալանքի տակ էր, օրերս ազատ արձակւեց, Ձեր կարծիքով՝ ինչի՞ արդիւնքում դա հնարաւոր դարձաւ:

- Այո, նա մեր քաղբանտարկեալ գործընկերներից մէկն էր, որ անազատութեան մէջ էր եւ հիմա ազատ է արձակւել: Նա յաջորդ շաբաթ կը միանայ մեր խորհրդարանական աշխատանքներին:

Այնպէս չէ, որ այս ազատ արձակումն օդից ընկաւ: Մենք ծրագրել ու իրականացրել ենք բոլոր քաղբանտարկեալ ընկերների պաշտպանութիւնը, ինչը պէտք է անել նրանց՝ օր առաջ ազատւելու համար: Սա ընդդիմութեան վերջին ամիսների աշխատանքի նւազագոյն արդիւնքն էր:

Մեր հասցէին ուղղորդւած մեղադրանքներ են հնչում, թէ ընդդիմութիւնից կան քաղբանտարկեալներ, բայց նրանց ազատ արձակելու պահանջով ցոյցեր չկան փողոցում: Ես ուզում եմ ասել, որ այս ընդդիմութիւնը տարբերւում է միւսներից պատասխանատւութեան զգացումով ու նրանով, որ գործում է՝ առաջնորդւելով արդիւնաւէտութեան չափորոշիչով: Ցուցադրելու համար ոչ մի բան պէտք չէ անել:

Մեր միակ օրակարգը այսօր Հայաստանի անվտանգութեան հարցն է, եւ մենք իրաւունք չունենք այդ օրակարգը շեղել, օրինակ, փողոցում ակցիա անելով:

 

- Ասացիք, որ ձեր միակ օրակարգը Հայաստանի անվտանգութեան հարցն է, այսինքն, վարչապետի հրաժարականի պահանջը առկախւո՞ւմ է:

- Ո՛չ, ո՛չ: Հայաստանում թիւ մէկ խնդիրը անվտանգութեան խնդիրն է: Այս իշխանութիւնը ոչ միայն չի կարող լուծել այդ խնդիրը, այլեւ աւելի է վտանգում իր գործողութիւններով, հետեւաբար, այս իշխանութեան օր առաջ հեռացումը անվտանգութեան խնդիրները լուծելու առաջին քայլն է:

Մենք մեր օրակարգում որեւէ փոփոխութիւն չունենք եւ չենք էլ կարող ունենալ, որովհետեւ ամէն անգամ իր գործողութիւններով իշխանութիւնը հաստատում է իրեն տրւած բոլոր գնահատականները:

 

- Ընդդիմութիւնը մասնակցում է խորհրդարանի աշխատանքներին, հարցեր տալիս կառավարութեանը, բայց յաճախ է հնչում հարցը, թէ ինչո՞ւ ընդդիմադիրները Փաշինեանի աչքերին նայելով՝ չեն պահանջում նրա հրաժարականը:

- Ճիշտն ասած՝ դրա մասին անընդհատ խօսւում է: Եթէ չեմ սխալւում՝ վերջին հարցուպատասխանի ժամանակ էլ Աննա Մկրտչեանը՝ «Պատիւ ունեմ» խմբակցութիւնից, խօսեց դրա մասին:

Մենք իշխանութիւնից պահանջում ենք անյապաղ հեռացում, եւ մեր պահանջը չի փոխւել: Իսկ հարցուպատասխանները փորձում ենք օգտագործել այս իշխանութեան իրականացրած ծրագրերի բուն նպատակը հնարաւորինս պարզ ժողովրդին ցոյց տալու համար:

Եւ, վերջապէս, չեմ պատկերացնում, թէ հարցուպատասխանի ժամանակ հրաժարականի պահանջ հնչեցնելը ինչպէս կարող է օգնել ընդհանուր գործին:

 

- Ձեզ քննադատողները նկատի ունեն՝ արմատական վարքագիծ չէք դրսեւորում:

- Այո, ճիշտ է, որ մարդիկ մեզ ձայն են տւել այս իշխանութեանն օր առաջ հեռացնելու համար եւ հիմա պահանջում են կոնկրետ արդիւնքներ: Այդ բոլոր մարդկանցից նեղանալ չի կարելի, եւ պէտք է նրանց ցանկութիւնը ընդունել ի գիտութիւն:

Բոլորին պէտք է կարողանանք բացատրել, որ ամէն օր աշխատում ենք այդ ուղղութեամբ: Բայց մենք սխալւելու իրաւունք այլեւս չունենք, եւ պէտք է մեր ամէն գործողութիւն լինի կշռադատւած, ու ամէն յաջորդ գործողութիւն նախորդի հետ պէտք է ունենայ տրամաբանական կապ:

Ես դէմ եմ, որ ընդդիմութիւնն անի ցուցադրական, որեւէ տեղ չտանող քայլ՝ պարզապէս անելու համար: Զուտ ցոյց տալու համար որ ինքը արմատական է: Ես ինքս ընդդիմութիւնից ոչ թէ արմատական, այլ արդիւնաւէտ քայլեր եմ պահանջում: Ընդդիմութիւն ասելով՝ նկատի ունեմ մեզանից: Ոչ թէ արմատական կամ ոչ արմատական, ոչ թէ կոպիտ կամ մեղմ, այլ՝ արդիւնաւէտ քայլեր: Այստեղ է, որ մենք պէտք է լինենք խելամիտ ու կշռադատւած: Մեզ չեն ների այդ հարիւր հազարաւոր մարդիկ, եթէ մեր օրակարգը չիրականացնենք:

 

- Դուք ասացիք՝ էլ սխալւելու իրաւունք չունենք: Հասկացե՞լ էք՝ որն էր ձեր սխալը:

- Մեզանից շատերն ասել են՝ մեզ չի յաջողւել իրականացնել իշխանափոխութիւն: Կրկնում եմ՝ մենք ունենք պատասխանատւութեան բարձր զգացում. մենք չենք կարող առաջնորդել մի գործընթաց ու պատասխանատու չլինել դրա համար: Մենք, իհարկէ, հասկանում ենք, որ ունեցել ենք թերացումներ, սխալներ, որոնց հետեւանքով նաեւ չի յաջողւել առայժմ իրականացնել իշխանափոխութիւն: Մենք մարդկանց հետ շատ անկեղծ ենք:

 

- Նախորդ շաբաթների ընթացքում ձեր խմբակցութիւնից հնչեցին յայտարարութիւններ՝ փողոցային պայքար սկսելու մտադրութեան մասին, բայց ձեր ուժին փողոցներում չենք տեսնում: Ո՞ր փուլում է գործընթացը:

- Նախ՝ էլի վերահաստատում եմ, որ մենք ամէն օր ոչ միայն մտածում, այլեւ աշխատում ենք այս իշխանութեանը հեռացնելու ուղղութեամբ: «Հայաստան» խմբակցութիւնում բոլորս մեզ համար արձանագրել ենք՝ այս ճգնաժամը խորհրդարանով չի հանգուցալուծւելու, հետեւաբար, փողոցում պայքարը դառնալու այս իշխանութեան հեռացման գլխաւոր հանգրւաններից մէկը:

Մենք մեր ընտրողներին, համակիրներին պէտք է փոխանցենք, որ չկայ մէկը մեր խմբակցութիւնում, որը կարծում է, թէ այս ճգնաժամը հանգուցալուծւելու է խորհրդարանում: Լուծումը խորհրդարանից դուրս է, ու մենք արդէն աշխատում ենք դրա համար:

Մարդիկ պէտք է հասկանան՝ այն փորձը, որի մասին մենք խօսում ենք, բաւական մեծ նախապատրաստական աշխատանք է ենթադրում, բացատրական հանդիպումներ է ենթադրում: Մենք խնդիր ունենք արդիւնաւէտ աշխատելու:

Այո, Հայաստանի Հանրապետութիւնում կան շուրջ 400 հազար քաղաքացիներ, որոնք մեզ հետ միասին կիսում են նոյն գնահատականները, բայց կան նաեւ մէկ միլիոն քաղաքացիներ, որոնց գնահատականներն այլ են, եւ նրանք չէզոք են եղել այս գործընթացներում: Հէնց նրանց դերակատարութիւնն է որոշիչ լինելու:

Մեզ ձայն տւած շատ քաղաքացիներ բարկանում են, թէ ինչու ենք ամիսներ շարունակ կրկնում նոյնը: Ես նրանց կարող եմ պատասխանել՝ մենք խնդիր ունենք եւս մի քանի հարիւր հազար քաղաքացու բացատրել եղածը, յետոյ կատարւողը եւ յետոյ միայն՝ ինչ է մեզ սպասւում: Իրականութիւնը բացատրելու խնդիր ունենք, որ այդ մարդիկ գան, կանգնեն մեր կողքին, որ միասին փոխենք իրավիճակը:

 

- Ձեր խմբակցութեան որոշ անդամների մարզային այցելութիւններն այդ բացատրական աշխատանքների համատեքստո՞ւմ են:

- Այո, ես էլ իմ գործընկերների հետ եղել եմ Աբովեանում: Եւ երբ խօսում էի նախապատրաստական աշխատանքների մասին, հէնց այդ այցերը նկատի ունէի:

Մենք սկսել ենք մեր ակտիւ հանդիպումները քաղաքացիների, մարզերի բնակչութեան հետ: Մարդիկ, մեր համակիրները պահանջում են կտրուկ գործողութիւններ եւ ասում են՝ այլեւս սպասել հնարաւոր չէ:

Մի էսպիսի տպաւորութիւն կարող եմ փոխանցել՝ Հայաստանում անհրաժեշտ ազգային դիմադրութեան կորիզը ձեւաւորւած է, աւելին՝ դիմադրութեան մթնոլորտը կայ: Ընդդիմութեան գործն այս պարագայում անհրաժեշտ կերպով այդ գործը կազմակերպելն է: Դա հսկայական աշխատանք է, որը պէտք է անենք պատւով: Եւ խնդիրը հէնց դա է՝ իրաւունք չունենք մսխելու այդ ռեսուրսը:

 

- Ազգային դիմադրութեան մասին յայտարարել էր ՀՅԴ ԳՄ ներկայացուցիչ Իշխան Սաղաթելեանը եւ կոչ էր արել միաւորել արտախորհրդարանական ընդդիմադիր ուժերին: Այդ կոչին հետեւող գործիչներ եղա՞ն, եւ, ընդհանրապէս, կա՞ն արձագանգներ:

- Այո, դա հրապարակում էր համազգային դիմադրութեան մասին, եւ շատ կարեւոր շեշտադրումով էր այդ հրապարակումը՝ ուղղւած ընդդիմադիր դաշտում գործող մեր շատ գործընկերներին: Միմեանց հարւածելով ու միմեանցից դժգոհելով՝ դժւար թէ կարողանանք դրական լուծումներ բերել օրակարգ: Միմեանց թիրախաւորելը կարող է երկարաձգել իշխանութեան կեանքը:

Մեր բոլորի գործողութիւնները պէտք է միտւած լինեն այս իշխանութեանը օր առաջ հեռացնելուն:

Իշխան Սաղաթելեանի կոչն ուղղւած էր ընդդիմադիր դաշտում գործող բոլոր գործիչներին. եթէ խորհրդարանական ընդդիմութեան գործելաոճը օբիեկտիւ եւ սուբիեկտիւ պատճառներով դժգոհութիւններ է առաջացնում, ապա իրենք ազատ են իրենց գործողութիւններն իրականացնելու, իրենց օրակարգն առաջ տանելու համար:

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։