Հա

Քաղաքական

20/10/2021 - 12:10

«Երբ արեամբ շաղախւած հողը ձրի տալիս են, մատաղ սերնդի արժանապատւութիւնն է խոցւում»․ Վիգէն Աւագեան

Վտանգը Արցախից արդէն փոխադրել ենք Սիւնիք, Սիւնիք նշանակում է մեր շնչերակը դէպի Հարաւ, սա Հայաստանի ներկային եւ ապագային սպառնացող մեծ վտանգ է՝ Yerkir.am-ի հետ հարցազրոյցում ասաց Բէյրութի «Վանայ ձայն» ռադիոկայանի տնօրէն Վիգէն Աւագեանը։

«alikonline.ir» - Վտանգը Արցախից արդէն փոխադրել ենք Սիւնիք, Սիւնիք նշանակում է մեր շնչերակը դէպի Հարաւ, սա Հայաստանի ներկային եւ ապագային սպառնացող մեծ վտանգ է՝ Yerkir.am-ի հետ հարցազրոյցում ասաց Բէյրութի «Վանայ ձայն» ռադիոկայանի տնօրէն Վիգէն Աւագեանը։

«Սա միայն ճանապարհի հարց չէ, այդ ճանապարհով անցնող տնտեսութեան հարց է, որով պիտի շնչեր Հայաստանը դէպի Հարաւ Հիւսիսից իր ճամփան ապահովելու համար, այդ ճանապարհը գնում է նաեւ դէպի Արցախ՝ ռազմավարական ուղի է, մեծ նշանակութիւն ունի, հետեւաբար, ադրբեջանցիների մուտքը Կապան եւ դէպի Հայաստանի մարզեր լուրջ խախտում է ինքնիշխանութեան, որի դիմաց զարմանում ենք յատկապէս Սփիւռքի մէջ, թէ ինչո՞ւ աղմուկ չի բարձրանում»,- ասաց Վիգէն Աւագեանը։

Եթէ այլ երկրներում նման բաներ պատահէին, նւազագոյն ոտնձգութիւնը կատարւէր, մարդիկ կը դիմէին ՄԱԿ-ին, տարակուսեց նա, մինչդեռ մեր պարագայում կառավարական մակարդակով որեւէ արձագանգ չկայ, ժողովուրդն էլ կարծես հաշտւած է եւ ընդհանուր հոլովոյթ է կարծես՝ տեւական զիջումների, պարտւողականութեան, որ այսօր յանձնեցինք այս, վաղը պիտի յանձնենք այն, փոխարէնը, սակայն, ոչինչ չստանալով։

«Թշնամին գոհացնելու ընթացքը մինչեւ ո՞ւր կրնայ հասցնել, այս պարտւողականութիւնը, նահանջականութիւնը մեզի ո՞ւր կրնայ հասցնել․ անկախ նրանից, որ հող ենք տալիս, մենք հողից աւելի արժանապատվութիւն ենք տալիս, ազգային հպարտութիւն ենք տալիս»,- նկատեց նա։

Իւրաքանչիւր նահանջի քայլ, Վիգէն Աւագեանի խօսքով, անկախ հողաշերտի արժէքից, բարոյական եւ ազգային իմաստով մեծ վնաս է հասցնում մեր մատաղ սերնդին։

«Մեր այն դպրոցականներին, մեր նորահաս սերնդին, որ անցնող 30 տարիներին սովորել էր, որ հայը յաղթական ժողովուրդ է, այն սերունդը, որ սովորել էր, որ բեկորների, աշոտների, թաթուլկրպէեանների արեամբ ազատագրւած հողը սրբազան է, եւ այսօր, երբ տեսնում է այդ սրբազան հողը, արեամբ շաղախւած հողը, որի համար ինքը սովորում է, որ այդ հողի համար պիտի քրտինքը թափի, եւ եթէ պէտք լինի՝ մի օր էլ արիւնը թափի, այդ հողի այսպէս ձրի տալը, անհատոյց տալը իր ազգային արժանապատւութեանը մեծ հարւած է հասցնում, ազգային հպարտութիւնն է խոցում։ Եւ հպարտութիւնը, արժանապարտւութիւնը վերականգնելը, հաւատացէք, շատ աւելի դժւար եւ վտանգաւոր է, քան հողը․ թերեւս, հողը հնարաւոր լինի վերականգնել, բայց արժանապատւութիւնն ու հպարտութիւնը վերականգնելու համար տասնամեակներ են պէտք»,- ասաց Վիգէն Աւագեանը։

Ընդհանուր ապազգային տեղեկատւական համակարգ է գործում, որ մեզ մղում է՝ հաշտւելու իրականութեան հետ, նշեց նա, պիտի հաշտւենք նոյեմբերի 9-ի համաձայնութեան հետ, պիտի հաշտւենք Հադրութի կորստի հետ, պիտի հաշտւենք Շուշիի կորստի հետ, պիտի հաշտւենք այսինչ գիւղի կամ ճանապարհի կորստի հետ, լաւ, մինչեւ ե՞րբ։

«Մինչեւ ո՞ւր այդ հաշտւողականութիւնը․ ինքնին մեր ազգային տենչերի, երազանքների իրականացման դէմ է։ Մենք ժողովուրդ ենք, որ ձգտում ենք ազատ, անկախ, միացեալ Հայաստանի, կերազենք միացեալ Հայաստանը եւ այդ ազատ, անկախ, միացեալի ճամբի վրայ մենք հանգրւաններ ենք կերտել, զոհողութիւններ ենք արել՝ ազատագրելով Արցախը, կերտելով հզօր Հայաստան, հզօր Արցախ, բայց ահա 3 ու կէս տարի է՝ կը տեսնենք, յատկապէս վերջին 1 տարին՝ ինչպէս մեր տասնամեակների ձեռքբերումները յօդս ցնդեցին, եւ մեր նւաճումներից բացի մեր ազգային երազանքներն են, որ մեզանից հեռանում են, այնտեղ է, որ մենք մեծ հարւած ենք ստանում, երբ տեսնում ենք մեր երազանքների չքացումը»,- նշեց Վիգէն Աւագեանը։

Լիբանանի «Վանայ ձայն» ռադիոկայանի տնօրէնն ասաց՝ դրսից իրենք խորը մտահոգութեամբ են հետեւում Հայաստանի քաղաքական իրադարձութիւններին, յատկապէս, ազգային անվտանգութեան հետ կապւած հարցերին։

«Համայն հայութիւնն այսօր աշխարհով մէկ շատ լաւ գիտի, թէ այն, ինչ արցախեան պատերազմում կորցրինք, դրա հետեւանքների շարունակութիւնն է, որ կրում ենք այսօր։ Ճակատամարտը վերջացաւ, բայց պատերազմը վերջացած չէ եւ, փաստօրէն, թշնամին կանգնած է դռան շեմին՝ հայրենիքի շեմին եւ մենք դրան խորը մտահոգութեամբ ենք հետեւում»,- ասաց նա։

Վիգէն Աւագեանը փաստեց, որ մտահոգ են, որովհետեւ «սահմանագծում», «սահմանազատում» ասւած խօսքերը, որ անցած ամիսներին լսեցին, եւ որոնք կատարւեցին ինչ-ինչ խորհրդաւոր պայմաններում, իրենց համար տարօրինակ թւացող իրականութիւններ էին։

«Սահմանագծում, սահմանազատում կատարւում է միջպետական համաձայնութիւններով, համապատասխան մարմիններով եւ բանակցութիւններով, ո՛չ Գուգլով, ո՛չ գիւղացիներին սպանելով։ Նաեւ մէկ այլ իրողութիւն․ այս սահմանները ճշտելու հարցը, երբ ազերիները աւելի համարձակ եւ լկտի քայլեր են անում, գալիս է այն իրողութիւնից, թէ ով եւ ինչպէս է այդ սահմանները ճշտել։ Որպէս պատմական գիտութիւններին ծանօթ մարդ մենք գիտենք, թէ Խորհրդային Հայաստանի ժամանակւայ այս սահմանները միջազգային ընտանիքի կողմից ընդունւած, ճանաչւած, իրաւական հիմք ունեցող սահմաններ չէին, կային Խորհրդային Միութեան սահմանները, որոնց մէջ կային ազգային ինքնութիւներ, որոնց համար դրւած էին վարչական սահմաններ, այդ սահմանները վարչականօրէն ճշտւած սահմաններ էին, եւ գալ ու ասել՝ Խորհրդային Հայաստանի ժամանակ սահմաններն այս էին, պիտի վերադառնանք այստեղ եւ այս անցակէտը մերն է, այս ճամբան մերն է՝ վտանգաւոր է»,- ասաց Վիգէն Աւագեանը։

 

Աննա Բալեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։