Հա

Քաղաքական

22/10/2021 - 13:10

«Թուրքիան Սիրիայի հետ եւս բարեկամութեան անւան տակ սերտեց ներքին տկար կէտերն ու պատերազմ հրահրեց»․ Զարմիկ Պօղիկեան

Թուրքիան հնարաւոր չէ դաշնակից համարել, որովհետեւ տակաւին հայատեաց քաղաքականութիւն է վարում, Ադրբեջանը նոյնպէս՝ Yerkir.am-ի հետ հարցազրոյցում ասաց Սիրիայի «Գանձասար» թերթի գլխաւոր խմբագիր Զարմիկ Պօղիկեանը՝ Հայաստանի հետ Թուրքիայի խաղաղասիրական մտադրութիւնները համեմատելով Սիրիայի բացասական փորձի հետ։

«alikonline.ir» - Թուրքիան հնարաւոր չէ դաշնակից համարել, որովհետեւ տակաւին հայատեաց քաղաքականութիւն է վարում, Ադրբեջանը նոյնպէս՝ Yerkir.am-ի հետ հարցազրոյցում ասաց Սիրիայի «Գանձասար» թերթի գլխաւոր խմբագիր Զարմիկ Պօղիկեանը՝ Հայաստանի հետ Թուրքիայի խաղաղասիրական մտադրութիւնները համեմատելով Սիրիայի բացասական փորձի հետ։

«Նախքան սիրիական պատերազմը Թուրքիան փորձեց բարեկամական յարաբերութիւններ հաստատել Սիրիայի հետ եւ յաջողեց։ Սիրիան այդ դռները լայն բացեց Թուրքիայի դիմաց, այնքան յարաբերութիւնները լաւ էին, որ նոյնիսկ անցագրային դրոյթը վերցւեցաւ շրջան մը՝ ազատօրէն կերթեւեկէին Սիրիա-Թուրքիա սահմանով։ Բայց այս բոլոր խաղաղասիրական մօտեցումը Սիրիայի պետութեան կողմից Թուրքիան լաւապէս օգտագործեց եւ լաւապէս սերտեց Սիրիայի ներքին տկար կէտերը եւ օգտագործեց նրա դէմ պատերազմ հրահրելու, ներքին դրւածքը քայքայելու, նոյնիսկ տնտեսութիւնը քայքայելու համար»,- ասաց Զարմիկ Պօղիկեանը։

Նա վկայեց, որ իրենք ականատեսը եղան Հալէպի գործարանների քանդւելուն եւ փոխադրւելուն Թուրքիա, հիւսիսային շրջանի մէջ քրդերի դէմ պատերազմելու պատրւակով Թուրքիան գրաւեց տարածքները, հանքային հարստութիւնները գողացաւ, այս բոլորն արեց այն Թուրքիան, որը նախքան պատերազմը Սիրիայի հետ բարեկամական յարաբերութիւններ մշակած երկիր էր։

«Ասել կուզեմ, որ խաղաղասիրական կոչերին այնքան էլ պէտք չէ հաւատալ, պէտք է մեկնել երկրի ազգային շահերից եւ պատմութիւնից միշտ դասեր քաղել»,- ասաց Զարմիկ Պօղիկեանը։

Թուրքիան տարիներ ի վեր ոչ մի ձեւով չի փորձել Հայաստանի՝ անգամ նւազագոյն իրաւունքները ճանաչել, նոյնն էլ Ադրբեջանը, ասաց նա, մենք գիտենք, թէ Ադրբեջանում ինչպիսի հայատեաց քաղաքականութիւն էր վարւում նախքան պատերազմը եւ այս օրերին։ Այնպէս որ, նրա համոզմամբ, Հայաստանի ազգային շահերից ելնելով՝ պէտք է Իրանի, Յունաստանի, Հնդկաստանի, այլ դաշինքների հետ յարաբերութիւնները սերտացնել եւ այդ դաշինքները կազմել։

«Անշուշտ սա չի նշանակում, որ Թուրքիայի հետ յարաբերութիւններ պէտք չէ ստեղծել, փակել այդ դուռը բոլորովին, ոչ, բայց այդ յարաբերութիւնները պէտք է լինեն Հայաստանի շահերը նկատի առնելով, ազգային, պետական շահերը նկատի առնելով, եւ ոչ թէ ամէնը ոտնակոխ անելով»,- ասաց նա։

Զարմիկ Պօղիկեանն ընդգծեց, որ Թուրքիան ոչ մի դէպքում չի կարող միջնորդի կամ խաղաղարարի դեր կատարել Արցախեան հակամարտութիւնում, ասաց՝ Արցախի պատերազմում Թուրքիան դերակատարութիւն է ունեցել եւ Ադրբեջանի կողքին է կռւել, զինեալ ահաբեկիչներ է Սիրիայից տեղափոխել Արցախ։

«Սիրիայում մեզ համար յստակ էր, թէ ինչպէս է Թուրքիան վճարում ահաբեկիչներին, քանի որ նա դերակատարութիւն է ունեցել այդ պատերազմում, չի կարող միջնորդի դեր կատարել»,- ասաց նա։

Սիւնիքով Ադրբեջանին դէպի Նախիջեւան միջանցք տրամադրելու հեռանկարն էլ նրա համար յուսադրող չէ, ընդգծում է, որ միջանցքին զուգահեռ Ադրբեջանը խօսում է նաեւ սահմանների փոխադարձ ճանաչման, իր տարածքային ամբողջականութեան ճանաչման մասին։

«Սա նշանակում է, որ իր նպատակը միայն միջանցքը չէ, այլ իր տարածքային ամբողջականութեան ճանաչումը, որի հետեւանքով էլ ամբողջովին կը կորցնենք Արցախը, կը կորցնենք Հայաստանի սահմանամերձ շրջաններից տարածքներ»,- ասաց նա։

Հայստաանի այսօրւայ վիճակը համեմաելով Սիրիայի հետ, Զարմիկ Պօղիկեանն ասաց, որ համաշխարհային ուժերը փորձեցին ամէն գնով քայքայել Սիրիան, տարածքներ գրաւեցին, որոշ շրջաններ եղան, որ Սիրիայի պետութեան գերիշխանութեան տակ եղած տարածքները շատ քիչ էին։ Բայց աստիճանաբար, հակառակ բոլոր ճնշումներին եւ ներքին պառակտումներին, Սիրիայի պետութիւնը վարեց ազգային քաղաքականութիւն, ամէն գնով իր շահերը պաշտպանեց՝ լինի դիւանագիտական յարաբերութիւններ ստեղծելով, բանակն ուժեղացնելով, տարբեր դաշինքներ հիմնելով իր շահերին համընկնող երկրների հետ, յստակօրէն ճշտելով իր թշնամիները, ինչը չենք տեսնում Հայաստանի պարագայում։

«Սիրիան պատերազմելով իրաւունք ձեռք ձգելու յանդգնութիւնը ունեցաւ, բանակը զինեց, երկրի առաջին պաշտպանողը միշտ բանակն էր, եւ աստիճանաբար կարողացաւ յաղթահարել բազում դժւարութիւնները։ Եթէ նախկինում 70/100-ի յարաբերակցութեամբ տարածքները պետական վերահսկողութեան տակ չէին, ապա այսօր կարող ենք ասել 20/100-ի յարաբերակցութեամբ, աստիճանաբար զինեալները յանձնեցին իրենց զէնքերը»,- ընդգծեց Զարմիկ Պօղիկեանը։

 

Աննա Բալեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։