Հա

Քաղաքական

23/10/2021 - 10:30

«Վերահաս վտանգների դէմն առնելու ճանապարհը համահայկական միասնութեամբ ազգային դիմադրութիւն առաջացնելն է»․ Արմէն Ռուստամեան

ՀՅԴ Բիւրոյի նախագահ, ՀՀ ԱԺ «Հայաստան» խմբակցութեան պատգամաւոր Արմէն Ռուստամեանի ելոյթը «Հայաստանին եւ Արցախին սպառնացող վտանգները եւ դրանց յաղթահարման ուղիները» թեմայով կլոր սեղանի ժամանակ:

«alikonline.ir» - ՀՅԴ Բիւրոյի նախագահ, ՀՀ ԱԺ «Հայաստան» խմբակցութեան պատգամաւոր Արմէն Ռուստամեանի ելոյթը «Հայաստանին եւ Արցախին սպառնացող վտանգները եւ դրանց յաղթահարման ուղիները» թեմայով կլոր սեղանի ժամանակ:

Տարածաշրջանային կայունութեանն ու խաղաղութեանն առերեւոյթ միտւած նորօրեայ գործընթացում Հայաստանը կանգնած է ճակատագրական երկընտրանքի առջեւ, այն է՝

Խաղաղութիւն շնորհիւ Հայաստանի ուժեղացման, թէ ի հաշիւ Հայաստանի թուրքացման։

Հարաւային Կովկասի տարածաշրջանում դերակատար երկրների շահերի բախման եւ բեւեռացման որպէս հետեւանք՝ կատարւում է ազդեցութեան գօտիների նոր վերաբաշխում։

Աւանդաբար այսպիսի գործընթացում անմիջական մրցակցութիւնը ծաւալւում է Ռուսաստանի եւ Թուրքիայի միջեւ, ինչը դրսեւորւում է միաժամանակ, թէ նրանց ունեցած գրեթէ նոյն յաւակնութիւններով նոյն տարածքների նկատմամբ, թէ իրավիճակային բնոյթ ունեցող ընդհանուր հակառակորդների ի յայտ գալով։

Թէ ինչպիսի տեսք կունենայ մեզ համար տարածաշրջանի աշխարհաքաղաքական նոր քարտէզը կախւած է նրանից, թէ մինչեւ որտեղ կը հասնի Թուրքիայի ծրագրերի նէոօսմանական ռազմավարական խորութիւնը։

Սակայն իրականութիւնն այն է, որ սա մարտահրաւէր չէ միայն Հայաստանին ուղղւած, այլ Թուրքիան իր ռազմավարական շահերի գօտի է հռչակել շուրջ 70 պետութիւն, որտեղ բնակւում են թրքալեզու ժողովուրդներ։ Իսկ այն երկրները, որտեղից կարող են բխել սպառնալիքներ նէոօսմանական ծրագրերին թիրախաւորւած են որպէս պանթուրքիզմի խոչընդոտներ։ Ահա ռազմավարական այս մակարդակի վրայ է, որ դրսեւորւած է Հայաստանի հետ այս կամ այն չափով աշխարհաքաղաքական շահերի եւ սպառնալիքների ընդհանրութիւն ունեցող երկրների շրջանակը։ Այս շրջանակն ի դէպ տարածաշրջանում ներառելով անմիջական դերակատարներ Ռուսաստանին եւ Իրանին տարածւում է դէպի արեւելք՝ մինչեւ Չինաստան եւ Հնդկաստան, իսկ դէպի արեւմուտք՝ մինչեւ միջերկրածովեան աւազան։

Եւ հէնց այս երկրների ռազմավարական շահերից նաեւ չի բխում, որ Հայաստանը կորցնի իր աշխարհաքաղաքական նշանակութիւնը եւ պանթուրանական աքցանի մէջ ընկնելով՝ յայտնւի վերջնականապէս այսպէս կոչւած «աշխարհաքաղաքական պարկում»։

Այդ «պարկից» Հայաստանը հանող եւ աշխարհաքաղաքական «գծի» վրայ պահողը այսօր Սիւնիքն է։

Սա է Հայաստանի թուրքացման աշխարհաքաղաքական հետեւանքը, երբ աշխարհին այլեւս ոչնչով հետաքրքիր չես, իսկ պետութեան նոմինալ գոյութիւնը պայմանաւորւած է բացառապէս Թուրքիայի բարեհաճութեամբ։

Սա թոյլ չտալն է նաեւ Սիւնիքով ու Արցախով Հայաստանի, որպէս աշխարհաքաղաքական գործօնի պահպանման եւ ամրապնդման ներկայ սերնդի պատմական առաքելութիւնը։

Քանզի ակնյայտ է, որ նէոօսմանիզմը, որպէս ռազմավարութիւն որդեգրած Թուրքիան խաղաղութեան, տնտեսական կամ այլ ոլորտներում փոխգործակցութեան անւան տակ սովորաբար թաքցնում է իր քաղաքական էքսպանսիա իրականացնելու եւ տւեալ տարածքում լիարժէք վերահսկողութիւն հաստատելու բուն նպատակը։ Օրինակները քիչ չեն եւ հէնց մեր անմիջական հարեւանութեամբ։

Այսպիսով կարելի է արձանագրել, որ թուրքացումը իր տարաբնոյթ դրսեւորումներով թուրքական այսպէս կոչւած «փափուկ ուժի» մարտավարութեան էութիւնն է, որի նպատակն է տարբեր ոլորտներում փոխգործակցութեան անւան տակ հասնել տւեալ երկրի Թուրքիայից առաւելագոյն կախւածութեան եւ պանթուրանական ծրագրերի անխափան իրագործման։

Այսպիսով, Հայաստանի Հանրապետութիւնը աշխարհաքաղաքական այս վերդասաւորումների բարդագոյն ժամանակահատւածում կանգնած է վերստին թուրքացման սպառնալիքը չէզոքացնելու եւ մեր սերունդների անժամանցելի իրաւունքները պահպանելու հրամայականի առջեւ։

Քանզի թուրքացման գնով ստացած խաղաղութեան լաւագոյն արդիւնքը դա ազգային բովանդակութիւնից զուրկ, սեփական կենսական շահեր չունեցող եւ թուրքական բարեհաճութեանը յանձնւած պետութեան առերեւոյթ գոյութիւնն է։

Այսինքն՝ յանուն խաղաղութեան թուրքացման վերջնարդիւնքը անփուսափելիօրէն հայոց անկախ պետականութեան փլուզումն է։

Հայկական անկախ պետականութեան փլուզմանն է յանգեցնելու նաեւ Արցախի հայաթափումը։ Հայաստանի անկախութիւնը ձեռք է բերւել արցախեան ազատամարտի պայմաններում եւ հիմա այս վերջին պատերազմից յետոյ դժւար չէ պատկերացնել, թէ ինչ կը մնար Հայաստանի անկախութիւնից, եթէ չլինէր արցախեան ազատամարտի մեր յաղթանակը։ Այդ յաղթանակը Հայաստանի այս կառավարութիւնը այսօր վեր է ածել պարտութեան եւ անմիջապէս, որպէս հետեւանք ստացել է խնդիր, թէ ինչպէս պահպանել Հայաստանի անկախութիւնը եւ տարածքային ամբողջականութիւնը։

Հետեւաբար չտեսնել փոխկապակցւածութիւնը Արցախի հայկականութեան եւ Հայաստանի ինքնիշխանութեան՝ նշանակում է գնալ երկուսն էլ կորցնելու ճանապարհով։

Հայաստանի թուրքացումը եւ Արցախի հայաթափումը այս պատերազմից հնարաւորինս արագ առաւելագոյնը ստանալու թուրք-ադրբեջանական տանդեմի գլխաւոր նպատակն է։

Ուստի Հայաստանին եւ Արցախին սպառնացող անմիջական վտանգը հէնց դա արձանագրող հնարաւոր ամբողջական կապիտուլեացիան է։ Այս վտանգն աւելի իրական է դառնում գործող վարչախմբի մինչ օրս դրսեւորած ժողովրդի թիկունքում ժողովրդի ճակատագիրը որոշելու հակաօրինական գործելաոճի պայմաններում։ Գաղտագողի, կատարւած փաստի առաջ կանգնեցնելու միջոցով ժողովրդին կործանարար զիջումներ պարտադրելը այս վարչախմբի անխախտ ձեռագիրն է դարձել։

Այսպէս եղաւ, երբ պատերազմը շարունակելու կործանարար հետեւանքերը թաքցւեց յաղթական պաթոս առաջացնելու միջոցով։

Այսպէս կարող է լինել հիմա, երբ կենսական զիջումներ ենթադրող հերթական կապիտուլեացիոն գործընթացը խլացւի տարածաշրջանում խաղաղութեան նոր դարաշրջան բացելու վարչախմբի ամպագոռգոռ եւ ոչ պակաս պաթետիկ կոչերով։

Ժողովուրդը չի կարող թմբիրի մէջ սպասել մինչեւ ամէն ինչ իր թիկունքում աւարտին հասցւի, երբ անցած կը լինեն անշրջելիութեան բոլոր հանգրւանները։

Իսկ որ արդէն ստեղծւում են անշրջելի վիճակներ, վկան՝ սահմաններում տիրող իրավիճակն է։

Զորօրինակ գոյութիւն չունի սահմանազատման եւ սահմանագծման մասին որեւէ վերջնական համաձայնութիւն կողմերի միջեւ, բայց Ադրբեջանն արդէն մեր իսկ թողտւութեամբ դիրքեր գրաւելով, կանխորոշում է սահմանազատման հետագայ ընթացքը։

Վերահաս այս վտանգների դէմն առնելու ճանապարհը համահայկական միասնութեամբ ազգային դիմադրութիւն առաջացնելն է։

Դիմադրութեան պլատֆորմը պէտք է ձեւաւորել Հայաստանի թուրքացման եւ Արցախի հայաթափման սպառնալիքների ամբողջական գնահատման եւ դրանց յաղթահարման մարտավարական յստակ սկզբունքների մատնանշման հիման վրայ։

Ներկայացւող հարցաշարը կոչւած է ծառայելու հէնց այս խնդրի լուծմանը։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։