Հա

Քաղաքական

20/11/2021 - 12:50

3 իրավիճակ, կամ ո՞ւմ է ձեռնտու մանդատներից հրաժարւելը

Հասարակութեան ընդդիմադիր հատւածները Փաշինեանի աղէտաբեր իշխանութեան հրաժարականին հասնելու գործողութիւնների քննարկման շրջանակներում առաջ են քաշում նաեւ խորհրդարանական ընդդիմութեան կողմից մանդատները վայր դնելու եւ դրանով խորհրդարանական ճգնաժամ առաջացնելու տարբերակը: Փաստենք, որ այդ առաջարկն այս կամ այն ինտենսիւութեամբ քննարկում են հիմնականում ուղղորդւած եւ ընդդիմութեանը դիտաւորութեամբ հեղինակազրկելու գործին լծւած անձինք կամ ինչ-որ միաւորումներ:

ՎԱՀԷ ՍԱՐԳՍԵԱՆ

 

Հասարակութեան ընդդիմադիր հատւածները Փաշինեանի աղէտաբեր իշխանութեան հրաժարականին հասնելու գործողութիւնների քննարկման շրջանակներում առաջ են քաշում նաեւ խորհրդարանական ընդդիմութեան կողմից մանդատները վայր դնելու եւ դրանով խորհրդարանական ճգնաժամ առաջացնելու տարբերակը: Փաստենք, որ այդ առաջարկն այս կամ այն ինտենսիւութեամբ քննարկում են հիմնականում ուղղորդւած եւ ընդդիմութեանը դիտաւորութեամբ հեղինակազրկելու գործին լծւած անձինք կամ ինչ-որ միաւորումներ: Այդուհանդերձ, ընկնելով նրանց տեղեկատւական հոսքերի մէջ կամ կրելով ստեղծւած ծանրագոյն իրադրութեան հոգեբանական ազդեցութիւնները, իրապէս ազնիւ ու առողջ ընդդիմադիր շրջանակներ եւս երբեմն հնչեցնում են այդ առաջարկը:

Ստորեւ ներկայացնում ենք հնարաւոր բոլոր իրավիճակները, որոնք կառաջանան, եթէ, օրինակ, խորհրդարանի «Հայաստան» եւ «Պատիւ ունեմ» ընդդիմադիր խմբակցութիւնների բոլոր պատգամաւորները վայր դնեն մանդատները, այնուհետեւ օրէնքով իրենց տրւելիք մանդատներից հերթով հրաժարւեն նաեւ նոյնանուն դաշինքների ցուցակների, համապատասխանաբար, 153-րդ եւ 230-րդ թեկնածուները: (Յիշեցնենք` երբ ասում ենք մանդատներից հրաժարւել, պէտք է նկատի ունենալ, որ դրանցից պէտք է հրաժարւեն ոչ թէ միայն գործող պատգամաւորները, այլ նաեւ ցուցակի բոլոր թեկնածուները):

Իրավիճակ առաջին

Որեւէ բան տեղի չի ունենայ: Խորհրդարանը կը շարունակի իր աշխատանքը՝ առանց ընդդիմադիր խմբակցութիւնների մասնակցութեան: Փաշինեանն իրեն յատուկ մեթոդներով եւ եղանակներով կը յայտարարի, որ ոչ մի կազուսային իրավիճակ չկայ, եւ խորհրդարանը կը շարունակի իր բնականոն աշխատանքը: Մի քանի իրաւաբաններ կամ սահմանադրական իրաւունքի մասնագէտներ էլ (բնականաբար՝ յատուկ յանձնարարութեամբ) կը շտապեն մասնագիտական տեսակէտներ յայտնել, որ նման դէպքերում խորհրդարանին ոչինչ չի սպառնում եւ այլն, եւ այլն:

Իրավիճակ երկրորդ

Փաշինեանը կը յայտարարի խորհրդարանը ցրելու եւ արտահերթ խորհրդարանական ընտրութիւններ նշանակելու մասին: Այս դէպքում գրեթէ չի բացառւում, որ Փաշինեանի թիմը, վերստին կառչելով իշխանական լծակներից, վարչական մեքենայի, ուժայինների միջոցով վախեցնելով, սպառնալով, զանազան մեթոդներով խաբելով, մոլորեցնելով ու կաշառելով, վերստին վերընտրւի (ՏԻՄ ընտրութիւններին տեղի ունեցողը դրա վառ ապացոյցն է):

Իրավիճակ երրորդ

Փաշինեանն արագօրէն կը ստանայ ԿԸՀ մեկնաբանութիւնը նման դէպքերի համար: «Փաշինեանական» այդ մեկնաբանութիւն-կանոնակարգով, որը Սահմանադրական դատարանը եւս արագօրէն կը մեկնաբանի որպէս Սահմանադրութեանը չհակասող ընթացակարգ, արագօրէն խորհրդարան կը մտնեն ընտրութիւններին առաւելագոյն քւէ ստացած յաջորդ երկու ուժերը: Յիշենք դրանք՝ Գագիկ Ծառուկեանի գլխաւորած «Բարգաւաճ Հայաստան» ու Արամ Զ. Սարգսեանի գլխաւորած «Հանրապետութիւն» կուսակցութիւններն են, որոնք, համապատասխանաբար, ստացել են 3.95% եւ 3.03% քւէ: Արդիւնքում՝ խորհրդարանում կունենանք նոր ընդդիմութիւն:

Քննարկեցինք երեք հնարաւոր իրավիճակ: Մեր ընդդիմադիր քաղաքացին կարող է ընտրել երեքից ցանկացածը՝ համոզւելով, որ դրանցից որեւէ մէկը ոչ միայն չի նպաստում իշխանութեան դէմ պայքարին, այլեւ` ճիշտ հակառակը, կարող է լաւագոյն նւէրը լինել Փաշինեանի թիմի համար:

Խորհրդարանական ընդդիմադիր մանդատների կամ դրանք կրող գործիչների դէմ պայքարն իրապէս ոչինչ չտւող եւ, ընդհակառակը, խորքի մէջ Փաշինեանին ծառայող գործընթաց է:

Հետեւաբար, ընդդիմութիւնից պէտք է պահանջել ոչ թէ մանդատները վայր դնել կամ բացակայել նիստերից, այլ լիարժէք օգտւել այն գործիքակազմից, որով օժտւած է խորհրդարանական ընդդիմութիւնը: Ընդդիմութիւնից պէտք է պահանջել նաեւ զուգահեռաբար ծաւալել փողոցային պայքար, իսկ հասարակութեանն այդ պայքարի կողքին կանգնելու կոչ անել: Դա է յաջողութեան հասնելու գրաւականը:

 

Yerkir.am

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։