Հա

Քաղաքական

06/12/2021 - 10:40

Կը յաջողւի՞ արդեօք Փաշինեանին պառակտել Սփիւռքը. ովքե՞ր են պատւիրատուները

Ընդամէնը օրեր առաջ՝ դեկտեմբերի 2-ին, սփիւռքի հարցերով յանձնակատար Զարեհ Սինանեանը «Armenia Today»-ին տրւած հարցազրոյցով բացայայտեց հայկական սփիւռքի պառակտման եւ քայքայման Նիկոլ Փաշինեանի հրէշաւոր պլանը։ Իր հարցազրոյցում վարչապետի յանձնակատարը մասնաւորապէս նշում է. «Սփիւռքում կայ տրոհւածութիւն, եւ դա շատ խորն է… Այս պահին պայքար է գնում հին կառոյցների եւ նոր սփիւռքի ձեւաւորման միջեւ։

Ընդամէնը օրեր առաջ՝ դեկտեմբերի 2-ին, սփիւռքի հարցերով յանձնակատար Զարեհ Սինանեանը «Armenia Today»-ին տրւած հարցազրոյցով բացայայտեց հայկական սփիւռքի պառակտման եւ քայքայման Նիկոլ Փաշինեանի հրէշաւոր պլանը։ Իր հարցազրոյցում վարչապետի յանձնակատարը մասնաւորապէս նշում է. «Սփիւռքում կայ տրոհւածութիւն, եւ դա շատ խորն է… Այս պահին պայքար է գնում հին կառոյցների եւ նոր սփիւռքի ձեւաւորման միջեւ։ Տարբեր տեղերում դա տարբեր կերպ է դրսեւորւում, բայց արմատականօրէն դրանում է խնդիրը»։ Այսինքն, յանձնակատարը փաստում է, որ սփիւռքում ձեւաւորւում են նոր կառոյցներ, որոնք ի սկզբանէ հակադրւած են գոյութիւն ունեցող աւանդական կառոյցներին, եւ նրանց միջեւ առկայ է այնպիսի պայքար, որը պառակտում է սփիւռքը։ Իսկ եթէ աւելի պարզ՝ սփիւռքի յանձնակատարի գրասենեակը նոր եւ արհեստական կառոյցների ձեւաւորմամբ պառակտում է սփիւռքը՝ զրկելու համար Հայաստանին հսկայական մարդկային, մասնագիտական, նիւթական եւ գիտական ռեսուրսից։ Աւելի քան եօթ միլիոնանոց հայկական սփիւռքը տասնամեակներ, իսկ շատ երկրներում նաեւ հարիւրաւոր տարիներ կազմակերպւել, ինքնապահպանւել եւ հայկական է մնացել բացառապէս մի քանի առանցքային կառոյցների շնորհիւ։ Այդ կառոյցներից են Առաքելական Սուրբ Եկեղեցու երկու կաթողիկոսութիւնների թեմերը՝ իրենց դպրոցներով, մշակութային, բարեգործական միութիւններով, ծխական խորհուրդներով։

Սփիւռքի ձեւաւորման, պահպանման եւ զարգացման գործում առանցքային դեր ունի ՀՅ Դաշնակցութեան աշխարհասփիւռ կառոյցը՝ իր կոմիտէներով, ուղեկից եւ քոյր միութիւններով, երիտասարդական ակումբներով, Հայ Դատի յանձնախմբերով եւ գրասենեակներով։ ՀՅԴ հովանու տակ գործող Հայ Մարմնակրթական Ընդհանուր միութիւնը /ՀՄԸՄ/, Հայ Օգնութեան միութիւնը /ՀՕՄ/, Համազգային կրթական մշակութային միութիւնը, ՀՅԴ երիտասարդական եւ ուսանողական միութիւնները իրենց հազարաւոր անդամներով եւ համակիրներով տասնամեակներ շարունակ փոխարինել են պետութեանը՝ ապահովելով սփիւռքի բնականոն կենսագործունէութիւնը։ Խիստ կարեւոր դերակատարութիւն ունեն հայկական համայնքային կազմակերպութիւնները, բազմաթիւ ակումբներ, աւանդական կուսակցութիւնների կրթամշակութային հիմնարկներ եւ այլն։ Այս ցանկում հարկ է առանձնացնել Ռուսաստանի Հայերի միութեանը, որը ներկայութիւն ունի Ռուսաստանի բոլոր հայկական գաղթօջախներում եւ հարիւրաւոր մասնաճիւղերի միջոցով արդէն քսան տարի է կազմակերպում է հայկական համայնքների հայապահպան գործունէութիւնը։ Ռուսաստանի աւելի քան երեք միլիոնանոց սփիւռքում հէնց այս կառոյցի, ՀԱԵ երկու թեմերի եւ համայնքային միութիւնների շնորհիւ է, որ ձեւաւորւում է հայկական օրակարգը։ Ռուսաստանում հայապահպանութեան գործին իրենց մասնակցութիւնն են բերում նաեւ մի շարք մշակութային եւ կրթական կենտրոններ, որոնք աւանդաբար գործել են որպէս «մշակութային ինքնավարութիւններ»։

Այս է այն հիմնական շրջանակը, որն աւելի քան հարիւր տարի ստանձնել է աշխարհասփիւռ գաղթօջախների հայապահպանութեան առաքելութիւնը։ Հէնց այս կառոյցներն է Փաշինեանի յանձնակատարն անւանում «հին» եւ փորձում փոխարինել նորերով։ Բայց Փաշինեանը եւ պատւիրատուները լաւ են հասկանում, որ անզօր են քանդել տասնամեակներով ձեւաւորւած կուռ համակարգերը՝ ամրապնդւած գաղափարական, հոգեւոր, հայրենակցական եւ սոցիալական կապերով։ Յանձնարարութիւնն այլ է՝ հնարաւորինս հեղինակազրկել, թուլացնել գործող կառոյցները՝ արդիւնքում պառակտելով եւ թուլացնելով հայ ազգի հաւաքականութիւնը, զրկելով Հայաստանին երբեւիցէ հզօր ազգ եւ պետութիւն դառնալու հեռանկարից։ Այս ծրագիրն է, որն անշեղօրէն փորձում են իրականացնել թշնամու գործակալները՝ յանձնակատար Սինանեանի ձեռամբ եւ հայութեան լուռ անտարբերութեան ներքոյ։ Կը յաջողւի՞ արդեօք թշնամուն զրկել Հայաստանին սփիւռքից՝ կարծում եմ այո՛, եթէ չընդվզենք ազգովի։ Թշնամու թիրախում հայի եւ հայկականութեան վերարտադրողական օրգաններն են, եւ եթէ նրան յաջողւի խոցել այդ թիրախները՝ սփիւռքը կը դառնայ ամուլ եւ ծերացող համայնքների անմիաբան հանրոյթ։ Ժամանակն է, որ սփիւռքի բոլոր «հին» կառոյցները համախմբւեն եւ համատեղ ուժերով չէզոքացնեն Սինանեանի ձեռամբ իրականացւող այս հրէշաւոր պլանը։ Վաղ թէ ուշ Նիկոլ Փաշինեանն ու իր հայադաւ թիմը կենթարկւեն պատասխանատւութեան, հարկաւոր է հնարաւորինս կանխել քայքայիչ հարւածները։ Շատերին թւում է, թէ Հայաստանին մոխրակոյտի վերածելով կը սպանեն հայի ոգին եւ ազատ ապրելու կամքը, սակայն մոռանում են, որ այն նման է փիւնիկի՝ որ պիտի յառնի մոխիրներից եւ ազդարարի Միացեալ Հայաստանի վերածնունդը…

 

«Հրապարակ» 

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։