Հա

Քաղաքական

28/12/2021 - 12:40

«Փաշինեանը հիմնովին եւ ամբողջապէս սերտաճած է ադրբեջանական շահերին. Փաշինեանն ու իր թիմը րոպէ առաջ պիտի հեռանան». Արթուր Վանեցեան

«Հայրենիք» կուսակցութեան նախագահ, ԱԺ «Պատիւ ունեմ» խմբակցութեան ղեկավար Արթուր Վանեցեանը յայտարարութիւն է տարածել.

«alikonline.ir» - «Հայրենիք» կուսակցութեան նախագահ, ԱԺ «Պատիւ ունեմ» խմբակցութեան ղեկավար Արթուր Վանեցեանը յայտարարութիւն է տարածել.

«Փաշինեանը հիմնովին եւ ամբողջապէս սերտաճած է ադրբեջանական շահերին:

Փաշինեանի ասուլիսը հերթական անգամ բացայայտեց նրա արժեհամակարգը, կամ, աւելի ճիշտ, դրա բացակայութիւնը։ Մինչ բովանդակային անդրադարձը, նշեմ, որ անկախ նրանից՝ Փաշինեանն այդ արտայայտութիւններն արել է մտածւած (պայմանաւորւած) կամ ինչպէս միշտ՝ առանց հետեւանքների մասին մտածելու, սա ծննդեան կապակցութեամբ արւած նւէր էր իր «կիրթ ու կառուցողական» գործընկերոջը՝ Ալիեւին, որը նոյն օրն օկուպացւած Հադրութում ռազմական նոր միաւոր էր հիմնում։

Այստեղ պատահական ոչինչ չկար, սա մինչ այդ ասւած մտքերի, խեղաթիւրման, մանիպուլեացիայի յանցաւոր շղթայի շարունակութիւնն էր: Յիշէք նոյն հանրաքւէի հետ կապւած Փաշինեանի յայտարարութիւնները, յիշէք այս իբրեւ թէ բացայայտումները, որոնց մասին դեռ ԱԺ-ում էր խօսում Փաշինեանը։ Այս մանիպուլեացիաներն ու բանակցային գործընթացի պատմութիւնը խեղաղթիւրւած ներկայացնելը նոր չէ։ Բայց ես մէկ այլ կարեւոր հանգամանքի վրայ ուշադրութիւն կը հրաւիրէի։

Պարզ է, չէ՞, որ այն, ինչ այստեղ մեր հանրութեան համար յայտարարում է Փաշինեանը, լսելի է նաեւ Հայաստանի սահմաններից դուրս, եւ, միաժամանակ, նա նոյնը խօսում է նաեւ միջազգային գործընկերների հետ շփումներում։ Եւ թերեւս Հայաստանի վարչապետի հէնց այսպիսի դիրքորոշումն է պատճառը, կամ պատճառներից մէկը, որ միջազգային փաստաթղթերից աստիճանաբար դուրս են գալիս Արցախի կարգավիճակին, դէօկուպացիային, արցախայայութեան անվտանգութեան երաշխիքներին առնչւող կարեւորագոյն հարցերը։ Եւ սա իսկապէս լուրջ մարտահրաւէր է մեզ համար։

Մէկ այլ կարեւոր հանգամանք. ըստ էութեան, այս ասուլիսը եւ դրան յաջորդած ֆէյսբուքեան գրառումները հերթական անգամ փաստում են, որ Փաշինեանն այսօր բանակցային գործընթացի տարրերը, այդ թւում, մանիպուլեացիայի յստակ կիրառմամբ, մեկնաբանում է շատ աւելի յօգուտ Ադրբեջանի, քան երբեւէ այն մեկնաբանել են նոյնիսկ ադրբեջանցիները։ Սրանով լրջագոյն հարւածի տակ են դրւում, այդ թւում, բանակցային գործընթացի ապագան եւ Հայաստանի ու Արցախի շահերը պաշտպանելու հետագայ հնարաւորութիւնները։

Արդիւնքում, միանշանակ կարող եմ ասել՝ կասկած չկայ՝ Փաշինեանը հիմնովին եւ ամբողջապէս սերտաճած է ադրբեջանական շահերին։ Այո՛, շատ կարեւոր հարց է՝ այդ սերտաճումը եղել է հէնց սկզբից, թէ ընթացքում, բայց այդ հարցը կը պարզի արդէն քննութիւնը՝ այս իշխանութեան հեռացումից անմիջապէս յետոյ։ 

Այսօր մի բան առաւել քան յստակ է՝ Փաշինեանն ու իր թիմը րոպէ առաջ պիտի հեռանան։ Նրանք ոչ միայն ջախջախել են մեր պետութեան եւ պետականութեան հիմքերը, այլ շարունակում են ջախջախել մեր եւ մեր երեխաների, մեր երկրի ապագան՝ իւրաքանչիւր աւել օրով ու ժամով։ Այսօր նրանց յայտարարութիւնների ու գործողութիւնների արդիւնքում հարցականի տակ է դրւում Արցախի, իսկ ժամանակի ընթացքում, վստահ եմ, նաեւ Հայաստանի գոյութեան իրաւունքը։

Ինչ վերաբերում է Արցախից եկող ազդակներին, նախ նշեմ, որ ողջունում եմ ՄԻՊ-երի համատեղ յայտարարութիւնը եւ արագ արձագանգը։ Ես ողջունում եմ նաեւ Արցախի ԱԺ յայտարարութիւնը, որն, անշուշտ, անհրաժեշտ քայլ էր, բայց ուզում եմ նշել նաեւ, որ Արցախի մեր որոշ գործընկերները շատ աւելի վաղ պէտք է կանգնէին սեփական պետութեան սուբիեկտայնութեան պահպանողի ու պաշտպանողի դիրքերում։ Իսկ Արցախի նախագահ Արայիկ Յարութիւնեանի յայտարարութեանը դեռ առիթ կունենանք անդրադառնալու»։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։