Տապալելով Շուշիի հռչակագիրը դատապարտող բանաձեւ ընդունելու ՀՀ ԱԺ արտահերթ նիստը՝ քաղաքական մեծամասնութիւնը վաւերացնում է այդ փաստաթուղթը եւ սպասարկում Ադրբեջանի ու Թուրքիայի շահերը՝ ասաց ՀՅԴ Հայաստանի Գերագոյն մարմնի ներկայացուցիչ, ԱԺ փոխնախագահ Իշխան Սաղաթելեանը ԱԺ-ում՝ լրագրողների հետ ճեպազրոյցում։
«alikonline.ir» - Տապալելով Շուշիի հռչակագիրը դատապարտող բանաձեւ ընդունելու ՀՀ ԱԺ արտահերթ նիստը՝ քաղաքական մեծամասնութիւնը վաւերացնում է այդ փաստաթուղթը եւ սպասարկում Ադրբեջանի ու Թուրքիայի շահերը՝ ասաց ՀՅԴ Հայաստանի Գերագոյն մարմնի ներկայացուցիչ, ԱԺ փոխնախագահ Իշխան Սաղաթելեանը ԱԺ-ում՝ լրագրողների հետ ճեպազրոյցում։
«ՀՀ այն քաղաքացիները, ովքեր դեռ կասկածում էին, որ այս իշխանութիւնը որեւէ կապ եւ առնչութիւն չունի Հայաստանի, Արցախի եւ հայ ժողովրդի շահերի հետ, սա եւս մէկ փաստ, որ տեսնեն ու համոզւեն»,-ասաց նա։
Իշխան Սաղաթելեանը յիշեցրեց, որ սա արդէն երկրորդ անգամն է, որ կարեւորագոյն հարցի հետ կապւած քաղաքական մեծամասնութիւնը ձախողեց ԱԺ արտահերթ նիստը։ Ընդդիմութեան առաջին նախաձեռնութիւնը սահմանազատման եւ սահմանագծման առիթով էր, երբ քաղաքական մեծամասնութիւնը պատճառաբանեց, որ յայտարարութեան մէջ կան ներքաղաքական գնահատումներ, եւ այդ պատճառով իրենք չեն մասնակցում ԱԺ արտահերթ նիստին։
Երկրորդ յայտարարութիւնը վերաբերում էր 2021 թ-ի յունիսի 15-ին օկուպացւած Շուշիում Ադրբեջանի եւ Թուրքիայի միջեւ կնքւած ռազմաքաղաքական դաշինքը դատապարտող բանաձեւ ընդունելուն, որն ամբողջութեամբ ուղղւած է Հայաստանի Հանրապետութեան դէմ։ Այդ հռչակագիրը վաւերացւել էր Ադրբեջանի եւ Թուրքիայի խորհրդարանների կողմից, նշեց Իշխան Սաղաթելեանը, եւ ՀՀ Ազգային ժողովն, իբրեւ առաջնային մանդատ ստացած պետական կառոյց, պարտաւոր էր իր վերաբերմունքն արտայայտել այդ հակահայկական փաստաթղթի վերաբերեալ։
««Հայաստան» դաշինքը հանդէս էր եկել յայտարարութեան տեքստով, որտեղ ընդամէնը գրւած էր, որ օկուպացւած Շուշիում գրւած փաստաթուղթը անընդունելի է մեզ համար։ Եւ քաղաքական մեծամասնութիւնը, առանց որեւէ լուրջ փաստարկի բոյկոտեց նիստը, իսկ Արտաքին յարաբերութիւնների յանձնաժողովում բացասական եզրակացութիւն տւեց այս նախագծին»,- արձանագրեց Իշխան Սաղաթելեանը։
Մենք հիմա առաջնորդւում ենք Ադրբեջանի ցանկութիւններով, որը հայկական երկու պետութիւնների ոչնչացումն է․ ասաց ՀՅԴ Հայաստանի Գերագոյն մարմնի ներկայացուցիչ, ԱԺ փոխնախագահ Իշխան Սաղաթելեանը՝ անդրադառնալով Իլհամ Ալիեւի յայտարարութեանը, որ Հայաստանը պէտք է զօրքը դուրս բերի Ղարաբաղից եւ ապահովի կապ Նախիջեանի եւ Ադրբեջանի միջեւ։
Լուծումը, նրա համոզմամբ, այս իշխանութիւններին հեռացնելն է՝ ուրիշ տարբերակ չկայ։
Եթէ սպասեն՝ յաջորդ ընտրութիւնների ժամանակ հեռացնելուն, Իշխան Սաղաթելեանի կարծիքով, արդէն Հայաստան չի լինի։
«Շատ ենք խօսել այդ մասին․ մենք պէտք է վիժեցնենք եւ ձախողենք այս պարտւողական օրակարգը՝ Հայաստանը նոր պատերազմի եւ նոր կորուստների տանելու իրենց քաղաքականութիւնը»,- ասաց Իշխան Սաղաթելեանը։
Այս անելու համար, նրա համոզմամբ, պէտք է կազմակերպել հասարակութեանը եւ ձեւաւորել համազգային շարժում։
