Հա

Քաղաքական

14/05/2022 - 13:20

«Մենք ազգի գոյութեան եւ պետութեան գոյութեան խնդրի առաջ ենք կանգնած». «Հրապարակ»

2021 թ. յուլիսին Ինդոնեզիայում, Մալայզիայում եւ Սինգապուրում ՀՀ արտակարգ եւ լիազօր դեսպան Ձիւնիկ Աղաջանեանը յետ կանչւեց։ Նա եւս մասնակցում է դիմադրութեան շարժման հանրահաւաքներին։ Հարցին, թէ ինչն է իրեն բերել հրապարակ՝ «Հրապարակ» օրաթերթի լրագրողին, ասաց. «Հայրենիքի հանդէպ մտահոգութիւնը»։

«alikonline.ir» - 2021 թ. յուլիսին Ինդոնեզիայում, Մալայզիայում եւ Սինգապուրում ՀՀ արտակարգ եւ լիազօր դեսպան Ձիւնիկ Աղաջանեանը յետ կանչւեց։ Նա եւս մասնակցում է դիմադրութեան շարժման հանրահաւաքներին։ Հարցին, թէ ինչն է իրեն բերել հրապարակ՝ «Հրապարակ» օրաթերթի լրագրողին, ասաց. «Հայրենիքի հանդէպ մտահոգութիւնը»։

 

- Ի՞նչ էք կարծում, հանրահաւաքներն արդիւնք կը տա՞ն, կը հասնե՞նք իշխանափոխութեան։

- Վստահ եմ, որ ժողովրդի կամքը պիտի գերակայի։

 

- Բայց լայն մասսաների կամքը դեռ չենք տեսնում։

- Երբեք ժողովրդի լայն մասսաները չեն երեւում փողոցում, միշտ էլ լինում է ժողովրդի ձայնն արտայայտող մասսան։

 

- Բայց իշխանութիւնները քանակն են կարեւորում։

- Դէ, դա նաեւ տեխնոլոգիայի մաս է կազմում, երբ փորձում են դրա վրայ որոշակի շեշտադրումներ անել։

 

- Իսկ 2018 թւականին տեխնոլոգիա՞ն էր, որ դրդեց մարդկանց դուրս գալ փողոց։

- Վստահ եմ, որ գերազանցապէս տեխնոլոգիան էր, որը մէկ-երկու օրւայ աշխատանք չէր` տասնամեակների աշխատանք էր։

 

- Իսկ ինչո՞ւ հայրենիքի հանդէպ մտահոգութիւնը մարդկանց չի հանում փողոց, անտարբեր ենք դարձել։

- Ինձ թւում է՝ մենք շատ հարցեր ունենք պարզելու այդ առումով, եւ նաեւ այն վախի, ցաւի, հիասթափութեան, անհանգստութեան տարրերը, որոնք լիարժէքօրէն չեն արտայայտում, եւ, բնականաբար, իրենց պատասխանները կարճ ժամանակում չենք կարող գտնել։

 

- Մի շարք նախկին կամ ներկայ դիւանագէտներ յայտարարութիւն էին տարածել՝ իրենց մտահոգութիւնն արտայայտելով արցախեան խնդրի վերաբերեալ։ Ձեր ստորագրութիւնը չկար այդ ցանկում։

- Ճիշտն ասած՝ ինձ յայտարարութեան մասին ոչ ոք տեղեակ չէր պահել։

 

- Իսկ Դուք միանո՞ւմ էք, համամի՞տ էք այդ տեքստին։

- Մի պարզ ճշմարտութիւն կայ ինձ համար, որ հայրենիքն ինձ համար անքննելի եւ անբաժանելի մաս է, եւ Արցախն այդ հայրենիքի անքակտելի մասն է կազմում։

 

- Դուք Նիկոլ Փաշինեանի գործողութիւններում կամ յայտարարութիւններում ի՞նչ առարկայական վտանգներ էք տեսնում, որոնք մեզ պէտք է ստիպեն փողոց դուրս գալ։

- Ամենամեծ վտանգը երկրի եւ պետականութեան հանդէպ եղած վտանգն է, որն իր հետ կարող է բերել նաեւ ընդհանրապէս մեր ազգի՝ այս տարածքում անվտանգ գոյութեան սպառնալիքին։

 

- Նիկոլ Փաշինեանն ու նրա իշխանութիւնն ինչո՞վ են սպառնում դրան:

- Վարած քաղաքականութեամբ։

 

- Իսկ աւելի կոնկրետ՝ որտե՞ղ էք տեսնում այդ վտանգները։

- Ինձ թւում է՝ շատերն են շատ աւելի մանրամասն դրա մասին խօսել, բացայայտել, իմ կարծիքով՝ ով աչք ունի, տեսնում է, ով ականջ ունի, լսում է, ով միտք ունի, ընկալում է։ Էստեղ մի հոգի աւել ասի նոյն բանը, թէ ոչ, դա տարբերութիւն չի տալու։ Կարեւորը, որ հանրութիւնն իրօք գիտակցի, որ մենք ազգի գոյութեան եւ պետութեան գոյութեան խնդրի առաջ ենք կանգնած, եւ այն բոլոր քայլերը, անկախ նրանից՝ նրանք իշխանութեան ներկայացուցիչն են, թէ ընդդիմութեան, պիտի բերեն միանշանակօրէն ազգի եւ պետութեան ու պետականութիւնների պահպանութեանը։

 

- Մեր երկրի առջեւ ծառացած այս սպառնալիքները միայն գործող իշխանութիւնների եւ անձամբ Նիկոլ Փաշինեանի վարած քաղաքականութեա՞ն հետեւանք են, թէ՞ նաեւ արտաքին քաղաքական ճնշումների։

- Ինձ թւում է, որ արտաքին քաղաքական ոչ թէ ճնշում, այլ մասնակցութիւն կայ, բայց ցանկացած մասնակցութիւն կարելի է չէզոքացնել, եթէ հանդէս ես գալիս հայանպաստ եւ հայաստանանպաստ դիրքերից։

 

- Նիկոլ Փաշինեանը, ըստ Ձեզ, պրոթուրքական եւ պրոադրբեջանակա՞ն վեկտոր է որդեգրել, թէ՞ Արեւմուտքի կամ Ռուսաստանի ազդեցութեան տակ է գործում։

- Դա բազմաշերտ խնդիր է, մէկ խնդիր չէ։

 

- Տեսէք` վերջին ամսում նախ Բրիւսէլ գնաց, ապա` Մոսկւա եւ 30 կէտանոց փաստաթուղթ ստորագրեց, յետոյ մեկնեց Հոլանդիա...

- Կարեւոր չէ՝ ուր է գնում եւ ինչ է ստորագրում, կարեւորը, թէ ինչ գործողութիւններ են իրականացւում։ Մենք տեսնում ենք, չէ՞, որ էսօր մեր սահմաններն էլ են վտանգւած։ Խօսքերով շատ հրաշալի կարելի է արտայայտւել, բայց կարեւորը դրան յաջորդած գործողութիւններն են` խօսքին յաջորդող գործողութիւնները։

 

- Իսկ եթէ իշխանափոխութիւն լինի, հնարաւոր կը լինի՞ ինչ-որ բան յետ բերել կամ շրջել անիւն այլ ուղղութեամբ։

- Վստահ եմ, որ ճիշտ մարդկանց կողմից կառավարման պարագայում մենք հնարաւորութիւն կունենանք ե՛ւ կասեցնել այդ բոլոր վտանգները, ե՛ւ նաեւ շատ աւելի դրական զարգացումների ուղի բռնել։

 

- Դուք այդ ճիշտ մարդկանց տեսնո՞ւմ էք։

- Իհարկէ, մենք շատ լաւ մասնագէտներ ունենք եւ շատ նւիրեալ անձինք, եւ ես վստահ եմ, որ ճիշտ կառավարման պարագայում եւ միայն Հայաստանի, հայրենիքի ու հայ ժողովրդի շահերն աչքի առաջ ունենալու պարագայում կարող ենք ուղղակի սարեր շրջել։

 

- Դուք, օրինակ, վարչապետի թեկնածու ունէ՞ք Ձեր աչքի առաջ։

- Կան մի քանի թեկնածուներ, որոնց շուրջ կարելի է համախմբւել։ Բայց էստեղ կարեւոր չէ վարչապետը, էստեղ կարեւորը թիմն է։ Մենք շատ ենք շեշտը դնում մէկ անձի վրայ, մէկ անձով չի որոշւում, կարծում եմ՝ դա էլ սխալներից մէկն է, որ հանրութեանը փորձում են ուղղորդել այդ մէկ անձի, մէկ փրկչի առումով։ Դա շատ մեծ սխալ է։ Թիմ է աշխատում, համակարգն է հիմքեր եւ հենքեր ստեղծում, այլապէս չի կարող լինել։ Մէկ մարդով չեն կառուցում, բոլորով միասին են կառուցում։

 

- Այդ բոլորի մէջ նախկին իշխանութիւնները կամ նախկին նախագահները մտնո՞ւմ են։

- Բոլորն են մտնում դրա մէջ, բոլորը՝ անխտիր։ Եթէ մենք կարծում ենք, որ մեր ժողովրդի մի մասով կը կարողանանք շտկել... բոլորը պիտի համախմբւեն եւ բոլորը պիտի միանան մեր ազգը եւ պետութիւնը փրկելու գործընթացին։

 

- Բայց ոմանք չեն միանում՝ ասելով, թէ սա նախկինների վերադարձի, իշխանափոխութեան պայքար է` չեն ցանկանում, որ նախկինները վերադառնան։

- Գիտէ՞ք, շատ դէպքերում մարդիկ, երբ որ չեն ուզում ակտիւ քայլեր ձեռնարկել, խուսանաւելու միջոցներ են գտնում։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։