Հա

Քաղաքական

01/06/2022 - 14:10

«Չխանգարել ո՞ր բանակցողին». «Այլընտրանքային նախագծեր» խումբ

Սեփական աշխատասենեակը կարմիրբերետաւորների ամբողջական դիւիզիայով փակողը ինչպէ՞ս է թշնամուն դէմ դիմաց ապրող արցախցիներին կոչ անում՝ ապրել թշնամու դրօշի եւ հսկողութեան ներքոյ: Դա օգնո՞ւմ է «թէ´ բանակցողին, թէ՛ ընդհանուր գործընթացին»։ Գուցէ օգնում է, եթէ որպէս բանակցող ի նկատի ունենք Ալիեւին, իսկ «ընդհանուր գործըթնացի» տակ՝ մեզ թելադրւող ստորացուցիչ եւ տարրական անվտանգութիւն չապահովող պայմանները»։

«alikonline.ir» - Ալէն Սիմոնեանն ասում է, որ ինքը չի կարող յայտարարել, թէ Արցախը երբեք չի լինելու Ադրբեջանի կազմում. «Ես նման յայտարարութիւններ անելու իրաւունք չունեմ, որովհետեւ բանակցային գործընթաց է հիմա։ Բանակցային գործընթացի ժամանակ նման յայտարարութիւն անել, նշանակում է՝ ինչ-որ փաստի առաջ կանգնեցնել թէ՛ բանակցողին, թէ՛ ընդհանուր գործընթացը։ 

Թերեւս առանց գիտակցելու՝ Ա. Սիմոնեանը բաւականին անյարմար վիճակում դրեց Ն. Փաշինեանին, ըստ էութեան՝ նրան մեղադրելով պաշտօնավարման տարբեր փուլերում չկշռադատւած յայտարարութիւններով բանակցային գործընթացը փակուղի մտցնելու մէջ: Այս մասին յայտարարութիւն է տարածել «Այլընտրանքային նախագծեր» խումբը:

Յայտարարութիւնում նաեւ ասւում է.

«2019 թւականին Ստեփանակերտի Վերածննդի հրապարակում ընթացքի մէջ գտնւող բանակցութիւնների փուլում արւած «Արցախը Հայաստան է եւ վերջ» յայտարարութիւնը որեւէ կերպ չէ՞ր խանգարում ընթացող բանակցութիւններին:

26 տարւայ բանակցային գործընթացը մերժելը եւ տարիների ընթացքում կատարւած հսկայածաւալ դիւանագիտական աշխատանքը զրոյացնելը՝ ասելով, թէ «ես սկսում եմ իմ կէտից», չէ՞ր խանգարում բանակցային գործընթացին:

Բոլոր վերջին հրապարակային ելոյթներում Փաշինեանն ինքնամոռաց կերպով հայ ժողովրդին համոզում է, թէ Արցախը վաղուց Ադրբեջանի կազմում է. սա փաստի առաջ չի՞ կանգնեցնո՞ւմ թէ´ բանակցողին, թէ՛ ընդհանուր գործընթացը։

Մադրիդեան սկզբունքները յամառօրէն նսեմացնելը, դրանց չէզոքացմանն ուղղւած գործունէութիւնը (սկզբունքներ, որոնք այս պահին, ըստ էութեան, միակ փրկօղակն են մեզ համար եւ միջնորդների համար արձանագրւած պարտաւորութիւնը), չե՞ն խանգարում բանակցային պրոցեսին:

Մինչ Ալէն Սիմոնեանը փորձում էր դիւանագիտական պատասխաններ յօրինել, վարչապետ Փաշինեանը բիւջէտային քննարկման ժամանակ ասում է.

«Արցախի ամբողջ կոմունալ ծախսերը փակում է Հայաստանը»։ Արդեօք սա ակնարկ չէ՞ Արցախը որպէս հայութեան հետ ոչ մի կապ չունեցող առանձին մի միաւոր դիտարկելուն, արդեօ՞ք սա հայկական լիւմպէնի վրայ ազդելու փորձ չէ՞։ Վերը նշւած յայտարարութիւնները կարելի՞ է որակել որպէս ներազգային թշնամանքի եւ ազգամիջեան ատելութեան կոչ:

Սեփական կոպիտ սխալների պատճառով բանակցութիւնները տապալելուց եւ պատերազմ բերելուց յետոյ, Հադրութը, Շուշին եւ բազմաթիւ գիւղեր թշնամուն յանձնելուց, խաղաղ երկիրը «վարի տալուց» յետոյ, 30 տարի ստեղծւած բանակը սխալ որոշումների արդիւնքում կազմաքանդ անելուց յետոյ կարելի՞ է գլուխ գովալ արցախցու կոմունալները մարելու փաստով: Դա նոյնն է, որ ծնողը երեխային ծեծելուց, մանկատուն յանձնելուց եւ որբութեան մատնելուց յետոյ գլուխ գովայ, թէ կոնֆետ է տւել: Ումի՞ց պէտք է կոմունալ վերցնէիր, տուն-տեղ, գիւղ-քաղաք, ամուսին, երեխայ կորցրած արցախցո՞ւց։ Թուրքական տանկից 100 մ հեռաւորութեան վրայ ապրող արցախահայի՞ց։

Սեփական աշխատասենեակը կարմիրբերետաւորների ամբողջական դիւիզիայով փակողը ինչպէ՞ս է թշնամուն դէմ դիմաց ապրող արցախցիներին կոչ անում՝ ապրել թշնամու դրօշի եւ հսկողութեան ներքոյ: Դա օգնո՞ւմ է «թէ´ բանակցողին, թէ՛ ընդհանուր գործընթացին»։ Գուցէ օգնում է, եթէ որպէս բանակցող ի նկատի ունենք Ալիեւին, իսկ «ընդհանուր գործըթնացի» տակ՝ մեզ թելադրւող ստորացուցիչ եւ տարրական անվտանգութիւն չապահովող պայմանները»։

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։