Հա

Քաղաքական

11/06/2022 - 14:15

«Հայաստանում փողոցային պայքարն ունեցել է իր ազդեցութիւնն Ադրբեջանի հետ գործընթացների վրայ, ինչը տեսանելի է արտաքին աշխարհին». Գառնիկ Դաւթեան

168.am-ը այս երկու յայտարարութիւնների, ինչպէս նաեւ Փառուխի եւ Քարագլխի վերաբերեալ ադրբեջանական մեդիատիրոյթում առաջ տարւող թէզերի վերաբերեալ զրուցել է Ադրբեջանի հարցերով փորձագէտ Գառնիկ Դաւթեանի հետ։

«alikonline.ir» - Յունիսի 7-ին Ադրբեջանի արտգործնախարար Ջէյհուն Բայրամովը, պատասխանելով Anadolu լրատւական գործակալութեան հարցերին, ասել էր, որ Բաքուն ամենաբարձր մակարդակով յայտարարել է Թուրքիայի եւ Հայաստանի միջեւ յարաբերութիւնների կարգաւորման գործընթացին աջակցելու պատրաստակամութեան մասին։

Միաժամանակ, նա ասել է, թէ Արցախեան երկրորդ պատերազմից յետոյ Ադրբեջանը, ըստ էութեան, «մի կողմ է դրել անցեալի վէրքերը»՝ յայտարարելով «խաղաղութեան» եւ Հայաստանի հետ յարաբերութիւնների կարգաւորման պատրաստակամութեան մասին։

Անդրադառնալով, իրենց ձեւակերպմամբ, «Զանգեզուրի միջանցքի» բացման բանակցութիւններին, Բայրամովը նշել է, որ այս հարցում դեռ կոնկրետ արդիւնքներ չկան։

«Հայաստանը տարբեր պատրւակներով ձգձգում է այս գործընթացը»,- յայտարարել էր ադրբեջանցի պաշտօնեան։

Գրեթւ նոյն ժամանակահատւածում «ՌԻԱ Նովոստի»-ին տւած հարցազրոյցում Արցախի Հանրապետութեան պետնախարար Արտակ Բեգլարեանն ասել էր, որ Եւրոմիութիւնը չպէտք է մասնակցի Արցախի հակամարտութեան կարգաւորմանը, ընդգծելով, որ հաշւի առնելով Մինսկի խմբի համանախագահութեան ձեւաչափը եւ ռուսական խաղաղապահ առաքելութեան արդիւնաւէտ դերը՝ կարծում են, որ հակամարտութեան կարգաւորման հարցը չպէտք է բանակցութիւնների առարկայ դառնայ Եւրոմիութեան համար։

168.am-ը այս երկու յայտարարութիւնների, ինչպէս նաեւ Փառուխի եւ Քարագլխի վերաբերեալ ադրբեջանական մեդիատիրոյթում առաջ տարւող թէզերի վերաբերեալ զրուցել է Ադրբեջանի հարցերով փորձագէտ Գառնիկ Դաւթեանի հետ։

Փորձագէտի խօսքով՝ հաշւի առնելով վերջին զարգացումները, մասնաւորապէս, Հայաստանի կապիտուլեացւած իշխանութեան կողմից վարւող քաղաքականութիւնը՝ Արցախն Ադրբեջանի կազմում թողնելու, նշաձողն իջեցնելու, անկլաւների վերաբերեալ Եւրոպայի խորհրդի նախագահ Շառլ Միշէլի յայտարարութիւնը եւ այդ ֆոնի վրայ Հայաստանում ներքաղաքական զարգացումները որոշակի ազդեցութիւն ունեցել են պաշտօնական Բաքւից հնչող յայտարարութիւնների վրայ եւս.

«Այս պարագայում, բնականաբար, պէտք է հաշւի առնել, որ Հայաստանում ներքաղաքական զարգացումները, նկատի ունեմ փողոցային պայքարը, ունեցել է իր ազդեցութիւնը Ադրբեջանի հետ գործընթացների վրայ, ինչը տեսանելի է արտաքին աշխարհին։ Ադրբեջանի կողմից նման յայտարարութիւնների հիմքում նախեւառաջ պէտք է տեսնել ընդդիմութեան փողոցային շարժումը, որտեղ կոնկրետ ներկայացւում է հայ ժողովրդի այն անհամաձայնութիւնը, որը կապւած է Արցախի՝ Ադրբեջանի կազմում թողնելու, հետագայում որեւէ ձեւով իշխանութեան նշած «անկլաւները» Ադրբեջանին յանձնելու հետ։

Ինչո՞ւ խօսւեց հէնց «միջանցքի» մասին, որովհետեւ Շառլ Միշէլի յայտարարութիւնում այդ երեք կոմպոնենտները կար, այսինքն՝ կար Ղարաբաղի էթնիկ բնակչութիւն, որտեղ կարելի էր ենթադրել, որ Լեռնային Ղարաբաղը գոյութիւն չունի, «անկլաւների» վերաբերեալ ակնարկ եւ «Զանգեզուրի միջանցքի» վերաբերեալ կոնկրետ դիրքորոշում։ Այս ամենի չիրականացումն այս պահին պէտք է դիտարկել ընդդիմութեան շարժման յաջողութեան տրամաբանութեան ներքոյ։ Այսինքն՝ այս շարժումը կարողացել է ժամանակաւորապէս կասեցնել բոլոր այն ապահայկական գործողութիւնները, որոնք վարւում են Նիկոլ Փաշինեանի կառավարութեան կողմից»,- նշեց Գառնիկ Դաւթեանը։

Ինչ վերաբերում է յայտարարութիւններին, որ Եւրոմիութիւնը չպէտք է մասնակցի Արցախի հիմնախնդրի կարգաւորմանը, մեր զրուցակիցը նկատեց՝ այսօր Արցախի անվտանգութիւնը ՊԲ զինւորների հետ ապահովում են ռուս խաղաղապահները, Հարաւային Կովկասում իր ներկայութիւնն ու քաղաքական թելադրանքն ունի Ռուսաստանը։ Հետեւաբար, այս ամէնը համադրելով, պարզ է դառնում, որ Եւրոմիութեան կողմից արւող յայտարարութիւններն առաջին հերթին քաղաքական առումով մարտահրաւէր է Ռուսաստանին։

«Հայաստանի կողմից այս ամէնը լաւ տարբերակ ընկալելն ուղղակիօրէն կը բերի Արցախի հայաթափմանը։ Եւրոմիութիւնն առաջին հերթին ցանկանում է Ռուսաստանին դուրս մղել այս տարածաշրջանից, եւ այդ ամէնն առաջին հերթին պէտք է անի դիւանագիտական ճիշտ քայլերով՝ նախեւառաջ Հայաստանում Եւրոմիութեան դերն աւելի բարձրացնելով։ ԵՄ-ն այս թիրախաւորւած յայտարարութիւններով Ռուսաստանի կողմից ձեռք բերւած յարաբերական խաղաղութիւնը կասկածի տակ է դնում։ Բոլոր այն գործողութիւնները, որոնք միտւած կը լինեն հակառուսականութեանը՝ ուղղակիօրէն կործանարար կը լինեն Հայաստանի ու Արցախի համար։ Հաշւի առնելով, որ այս պահին ուժերի բալանսը խախտւած է, Հայաստանը չունի հզօր բանակ, դրան զուգահեռ՝ ունի կապիտուլեացւած իշխանութիւն՝ Հայաստանը նոր բախման դէպքում տուժելու է։ Բացի այդ, Հայաստանն այսօր չունի սեփական օրակարգ եւ տարբեր ուժերի մօտ իրեն դրսեւորում է այնպէս, որ կողմերին դուր գայ»,- յաւելեց Գ. Դաւթեանը։

Ինչ վերաբերում է Փառուխին եւ Քարագլխին, Գառնիկ Դաւթեանն ընդգծեց, որ ադրբեջանական կողմը երէկ ՌԴ արտգործնախարարի թոյլ տւած սխալը, թէ «վրիպակն» օգտագործում է եւ փորձում ցոյց տալ, որ Քարագլխում իրավիճակի հսկողութիւնն իրենց ձեռքում է, ինչն իրականութիւն է։

«Ադրբեջանը հիստերիա է բարձրացրել, թէ ինչո՞ւ է Լաւրովը նման յայտարարութիւն արել, ինչն արտայայտւեց հակառուսականութեամբ, թէ Ռուսաստանը Ադրբեջանի համար բարեկամ պետութիւն չէ, եւ առհասարակ ռուսները չպէտք է գնան Ադրբեջան, եւ այլն։ Ադրբեջանը փորձեց մանիպուլեացնել եւ Քարագլուխը ներկայացնել, որ ռուսական կողմը անաչառ չէ։ Ադրբեջանական մեդիատիրոյթում եւ սոցցանցերում նման տրամադրութիւններ են տիրում քարոզչական առումով։ Նրանք իրենց հասարակութեանը տրամադրում են, որ կայ խնդիր, որի առաջին մեղաւորը Ռուսաստանն է։ Լաւրովի պարզաբանումից յետոյ էլ այդ քարոզչութիւնը չնւազեց»,- եզրափակեց Գառնիկ Դաւթեանը։

 

Զւարթ Խաչատրեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։