Հա

Քաղաքական

25/06/2022 - 14:30

«Պատերազմից խուսափելու միայն մէկ եղանակ կայ». Վարդան Ոսկանեան

Իրանագէտ Վարդան Ոսկանեանը տելեգրամեան իր ալիքում սկսել է մի շարք՝ «Պատերազմը եւ մենք» խորագրոց։

«alikonline.ir» - Իրանագէտ Վարդան Ոսկանեանը տելեգրամեան իր ալիքում սկսել է մի շարք՝ «Պատերազմը եւ մենք» խորագրոց։

«Շարքի միջոցով կը փորձեմ ոչ շատ երկար, պարզ ձեւակերպւած եւ «ոչ դիւանագիտական» գրառումներով անդրադառնալ, որպէս պետութիւն եւ ազգ, մեր առջեւ ծառացած, ըստ իս, ամենակարեւոր խնդրին՝ պատերազմին եւ մեզ»,- մանրամասնել է ԵՊՀ պրոֆեսորն ու հրապարակել առաջինը։

«Պատերազմը եւ մենք

1. Պատերազմի անխուսափելիութիւնը

Եւ այսպէս, արդեօ՞ք հնարաւոր է խուսափել պատերազմից այնպիսի տարածաշրջանում եւ այնպիսի թշնամու հետ, ինչպիսին Ադրբեջանն է։ Այո՛, հնարաւոր է։ Հնարաւոր է, բայց փաստացի յանձնւելու պարագայում միայն։ Իսկ արդեօ՞ք դա է հայկական պետականութեան հազարամեակների ծրագրի տեսլականը։

Ո՛չ, եւ երիցս ո՛չ։

Հետեւաբար պատերազմից խուսափելու միայն մէկ եղանակ կայ՝ ոչ թէ դրանից վախենալը եւ յանձնւելը, այդպիսով միանշանակօրէն կործանելով մեր նախնիների, մեր եւ մեր սերունդների երազանքը, այլ լայն իմաստով պատերազմին պատրաստ լինելը։

Կարող է հարց առաջանալ, իսկ ինչո՞ւ չի կարելի «տեխնիկական» իմաստով լուծել հայ-ադրբեջանական հիմնահարցը, դիցուք, զիջելով ինչ-որ տարածք, համաձայնելով Ադրբեջանի պահանջներին եւ այլն։ Չի կարելի շատ պարզ եւ միանշանակ պատճառով՝ խնդիրը չունի նման «տեխնիկական» լուծում, քանզի հակամարտութիւնը գոյաբանական է՝ նաեւ դիմացի կողմից ձեւակերպւած շատ յստակ՝ «պէտք է լինենք կա՛մ մենք, կա՛մ դուք» տրամաբանութեամբ։

Հետեւաբար պէտք է արձանագրել ելակէտային հետեւեալ հանգամանքները ճշգրիտ ուղղութեամբ ընթանալու համար՝

1. հայ-ադրբեջանական հակամարտութեան խնդիրը գոյաբանական է, ուստի չունի «տեխնիկական» լուծում,

2. պատերազմից կարելի է խուսափել միայն Հայաստանի պետականութեան «խաղաղ ոչնչացման» թշնամական ծրագիրն անվերապահօրէն ընդունելու դէպքում,

3. պատերազմից կարելի է խուսափել կամ չխուսափելով յաղթական պատերազմ մղել միայն բոլոր իմաստներով դրան լիարժէք պատրաստ լինելու պայմաններում։

Ըստ այդմ, ընտրանքները, մեղմ ասած, այդքան էլ բազմազան չեն, ինչպէս եւ Մերձաւոր Արեւելքի շատ երկրների պարագայում, ուստի հնարաւորին արագ կամ նոյնիսկ անյապաղ մենք՝ որպէս պետութիւն եւ ազգ, առաջինը հէնց ինքներս մեզ պէտք է քաջութիւն ունենանք խոստովանելու «Բարի գալուստ մերձաւորարեւելեան իրականութիւն», իսկ այդ իրականութիւնից բխող հիմնական մարտահրաւէրը՝ այսինքն անխուսափելի պատերազմին պատրաստ լինելը, դարձնենք պետական եւ ազգային ամենաառաջնային օրակարգ»։

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։