Հա

Քաղաքական

21/07/2022 - 12:10

«Ակնյայտ է՝ Արցախը ՀՀ իշխանութեան համար ընդամէնն առեւտրի առարկայ է՝ ի շահ սեփական անձի ու «խաղաղութեան» օրակարգի». Մետաքսէ Յակոբեան

Արցախի Հանրապետութեան ԱԺ «Արդարութիւն» խմբակցութեան պատգամաւոր Մետաքսէ Յակոբեանի խօսքով՝ ԱԽ քարտուղարի այս յայտարարութիւնն իրենց համար բոլորովին անսպասելի չէր։

«alikonline.ir» - ՀՀ անվտանգութեան խորհրդի քարտուղար Արմէն Գրիգորեանը յուլիսի 19-ին «Արմէնպրես»-ին տւած հարցազրոյցում ասել էր, որ սեպտեմբերից Հայաստանից զօրակոչւած ժամկէտային զինծառայողներ չեն լինի Արցախում, Լեռնային Ղարաբաղում զօրակոչիկները կը շարունակեն զօրակոչւել պաշտպանութեան բանակում ծառայելու:

Արցախի Հանրապետութեան ԱԺ «Արդարութիւն» խմբակցութեան պատգամաւոր Մետաքսէ Յակոբեանի խօսքով՝ ԱԽ քարտուղարի այս յայտարարութիւնն իրենց համար բոլորովին անսպասելի չէր։

«Մեզ բոլորովին չի զարմացրել այդ յայտարարութիւնը, իհարկէ, մենք դադարել ենք Արմէն Գրիգորեանին համարել ծնունդով արցախցի։ Ցաւալի է, երբ մարդն Արցախում է ծնւել եւ այդ աստիճանի ատելութիւն ունի, արցախցիներիս մօտ նա դաւաճանների ցանկում առաջին հնգեակում է։

2020 թւականի նոյեմբերի 9-ին Հայաստանի վարչապետը ստորագրելով եռակողմ փաստաթղթի տակ՝ փաստացի հրաժարւեցին Արցախից եւ ըստ էութեան փակեցին Արցախի թեման։ Պատերազմից յետոյ, թերեւս, տարօրինակ էր, թէ ինչո՞ւ են իրենք շօշափում Արցախի թեման, ակնյայտ է, որ Արցախն այսօր նրանց համար ընդամէնը առեւտրի առարկայ է՝ ի շահ սեփական անձի ու «խաղաղութեան» օրակարգի, որը ենթադրում է ստրկութիւն հայ ժողովրդի համար։ Թէպէտ Նիկոլ Փաշինեանն արդէն բացայայտ յայտարարեց, որ խաղաղութիւն էլ չի երաշխաւորում, այսինքն՝ հնարաւոր է պատերազմ։ Այս անձինք հանրային դաշտում ուղղակի տպաւորութիւն են ուզում ստեղծել, որ իրենք ինչ-որ գործընթացների մէջ են»,- 168.am-ի հետ զրոյցում ասաց Մետաքսէ Յակոբեանը։

Շարունակելով թեման, մեր զուցակիցը նկատեց՝ Արմէն Գրիգորեանի այդ յայտարարութիւնն ասւած չէր ներքին լսարանի համար, դրանք ուղղւած էին արտաքին լսարանին, մասնաւորապէս՝ Ադրբեջանին ու Թուրքիային, դրանով իրենց գործընկերներին ցոյց տալով, թէ ամէն բան նորմալ եւ վերահսկելի է։

«Փաստօրէն, այս յայտարարութեամբ ԱԽ քարտուղարը նաեւ ցոյց տւեց, որ Հայաստանի իշխանութիւններն Արցախի հետ որեւէ կապ ու շփում չունեն, թերեւս, այս հարցում նա ազնիւ է, որովհետեւ Հայաստանի ու Արցախի իշխանութիւնների միջեւ կապ չկայ, բացառութեամբ այն «շոուների», որոնք հումանիտար աջակցութեան շրջանակներում են։ Իսկ Հայաստանի ու Արցախի խորհրդարանները որեւէ շփում չունեն միմեանց հետ, չունեն նաեւ գերատեսչութիւններ»,- յաւելեց նա։

Ըստ պատգամաւորի, բազմիցս են ասել, որ նոյեմբերի 9-ի փաստաթուղթը դատավճիռ չէ, այն չի լուծել Արցախի հակամարտութիւնը, պարզապէս հրադադարի շուրջ կնքւած փաստաթուղթ է, որտեղ կողմերը պայմանաւորւում են կարգի բերել իրավիճակը։

«Բոլորն էլ գիտեն, որ սա ժամանակաւոր խաղաղութիւն է։ Այդ փաստաթղթով նախատեսւած առ այսօր Ադրբեջանը որեւէ կէտ չի իրականացրել, իսկ ամենակարեւորը՝ հայ ռազմագերիների վերադարձը Հայաստան, տեղահանւածների վերադարձն իրենց բնակավայրեր։

Հայաստանի իշխանութիւնների այն յայտարութիւնները, թէ Արցախի անվտանգութեան ապահովումը տրւած է ռուս խաղաղապահներին, դա միանշանակ չէ, քանի որ մենք այստեղ հասկանում ենք, որ ռուս խաղաղապահները միայնակ չեն կարող այդ աշխատանքն իրականացնել։ Ռուս խաղաղապահների գործառոյթները լրիւ այլ են, իսկ բանակինը՝ այլ։ Մեր նման երկրում չունենալ բանակ, նշանակում է՝ կա՛մ չունենալ պետականութիւն, կա՛մ յանձնւել։ Հայաստանի կողմից Արցախի անվտանգութեան երաշխաւոր լինելու մասին ի՞նչ խօսք կարող է լինել, երբ առ այսօր Հայաստանից որեւէ պաշտօնեայ Արցախ չի այցելել»,- եզրափակեց Մետաքսէ Յակոբեանը։

 

Զւարթ Խաչատրեան

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։