Ընդդիմութիւնը սեպտեմբերին կը գնա՞յ խորհրդարան, թէ՞ ոչ։ «Հայաստան» խմբակցութեան քարտուղար Արծւիկ Մինասեանը Sputnik Արմենիայի հետ զրոյցում ասաց, որ այս թեման շեղում է իրենց հիմնական խնդրից` Հայաստանի եւ Արցախի անվտանգութիւնը, պետականութիւնը փրկելու հարցից։
«alikonline.ir» - Իշխան Սաղաթելեանի հարցազրոյցը ԶԼՄ-ներում սխալ էր վերնագրւել։ Սակայն մինչ վերնագիրը կը փոխւէր, շատերը տարածել էին այն եւ բուռն քննարկման թեմա դարձրել։ Արցախի ԱԺ նախագահը նոյնպէս «ներգրաււել» է այս պատմութեան մէջ։
Ընդդիմութիւնը սեպտեմբերին կը գնա՞յ խորհրդարան, թէ՞ ոչ։ «Հայաստան» խմբակցութեան քարտուղար Արծւիկ Մինասեանը Sputnik Արմենիայի հետ զրոյցում ասաց, որ այս թեման շեղում է իրենց հիմնական խնդրից` Հայաստանի եւ Արցախի անվտանգութիւնը, պետականութիւնը փրկելու հարցից։
«Արհեստական ձեւակերպում է` ընդդիմութիւնը կը գնա՞յ խորհրդարան, թէ՞ ոչ։ Ընդդիմութիւնը քանիցս յայտարարել է, որ ԱԺ աշխատանքներին մասնակցելը մէկ նպատակ ունի` սպասարկել Հայաստանի եւ Արցախի ազգային անվտանգութեան օրակարգերը, շահերն առաջ մղել, որի գլխաւոր խոչընդոտը գործող իշխանութիւնն է։ Այս օրակարգով մենք միշտ էլ ասում ենք, որ ԱԺ-ում անելիք կայ` օրէնսդրական նախաձեռնութիւնների, միջազգային հարթակներում այս հարցերը բարձրացնելու տեսքով, սակայն ոչ երբեք պարգեւավճարներ տալու թեմայով գնալ ԱԺ»,- ընդգծեց Մինասեանը։
Նրա խօսքով` նախորդ 1 տարւայ ընթացքում բազմիցս ասել են, որ ընդդիմադիրների բերած` ՀՀ-ի ու Արցախի անվտանգութեանը վերաբերող բոլոր հարցերով գործող իշխանութիւնը կա՛մ բացայայտ արհամարհանք է ցուցաբերել, կա՛մ օգտւել է իր քանակական մեծամասնութիւնից` հրաժարւելով գնալ քննարկմանը։ Ամենափայլուն օրինակը, ըստ Մինասեանի, յունիսի 3-ին էր, երբ մեծամասնութիւնն ուղղակի հրաժարւեց գնալ ԱԺ նիստին եւ քննարկել այն կարմիր գծերը, որոնք անհրաժեշտ են Թուրքիայի եւ Ադրբեջանի հետ յարաբերութիւնների ժամանակ։
Յաւելենք, որ նախօրէին «Հայաստան» խմբակցութեան պատգամաւոր Իշխան Սաղաթելեանը հարցազրոյց էր տւել, որը հրապարակւել էր հետեւեալ վերնագրով. «Ընդդիմութիւնը սեպտեմբերին կը գնայ խորհրդարան, բայց իր օրակարգով»։ Հարցազրոյցը տարածւել էր նաեւ ՀՅԴ պաշտօնական կայքում։ Աւելի ուշ հարցազրոյցի վերնագիրը փոխել են։ Երէկ Արցախի ԱԺ նախագահ Արթուր Թովմասեանը յայտարարութիւն է տարածել` ողջունելով ՀՀ ԱԺ ընդդիմադիր խմբակցութիւնների՝ սեպտեմբերին խորհրդարան վերադառնալու եւ պատգամաւորական աշխատանքը շարունակելու որոշումը։ Դրանից յետոյ «Հայաստան» խմբակցութեան պատգամաւորները սոցցանցերում գրառումներ են անում եւ նշում` ցաւալի է, որ նման մակարդակում սուտ տեղեկութիւն է տարածւում, թէ իբր իրենք սեպտեմբերին ԱԺ են գնալու։
