ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Գեղամ Մանուկեանը գրում է.
«ՈՒՇԱԴՐՈՒԹԻՒՆ. ՀՀ գլխաւոր դատախազութեան պաշտօնական գրութեամբ հերքւում է Հայրենիքի զանգւածային դաւաճանութեան մասին նիկոլի յայտարարութիւնները: Այս մասին, օրերս արւած հարցումիս ի պատասխան, յայտնել են Դատախազութիւնից։ Նշել են՝ «2020 թւականի սեպտեմբերի 27-ից մինչեւ նոյեմբերի 9-ը ԱԱԾ քննչական դեպարտամենտում պետական դաւաճանութեան յօդւածով ՔՐԷԱԿԱՆ ՈՐԵՒԷ ԳՈՐԾ ՉԻ ՅԱՐՈՒՑՒԵԼ»։
«alikonline.ir» - ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Գեղամ Մանուկեանը գրում է.
«ՈՒՇԱԴՐՈՒԹԻՒՆ. ՀՀ գլխաւոր դատախազութեան պաշտօնական գրութեամբ հերքւում է Հայրենիքի զանգւածային դաւաճանութեան մասին նիկոլի յայտարարութիւնները: Այս մասին, օրերս արւած հարցումիս ի պատասխան, յայտնել են Դատախազութիւնից։ Նշել են՝ «2020 թւականի սեպտեմբերի 27-ից մինչեւ նոյեմբերի 9-ը ԱԱԾ քննչական դեպարտամենտում պետական դաւաճանութեան յօդւածով ՔՐԷԱԿԱՆ ՈՐԵՒԷ ԳՈՐԾ ՉԻ ՅԱՐՈՒՑՒԵԼ»։
Հարցումիս շարժառիթն այլ էր։ Կը յիշեն շատերը՝ պատերազմի ամենաբեկումնային օրերին, երբ կոտրւեց առաջնագիծը՝ այդքան շատ չարչրկւած ու հոկտեմբերի 5-6-ին Նիկոլի գովազդւած հակայարձակում կոչւածի, իսկ իրականում՝ Լելեթեփէյի գործողութեան տապալումից անմիջապէս յետոյ, հոկտեմբերի 8-ին անակնկալ նա գրառում արեց, թէ առաջնագծում յայտնւել են պանիկա, խառնաշփոթ տարածող մարդիկ։ Զանգւածային մերկապարանոց մեղադրանքների կոչ արեց, ապա դիմեց «…մեր այն հայրենակիցներին, ովքեր ունեն համանման տեղեկութիւններ, կոչ եմ անում դիմել Ազգային անվտանգութեան ծառայութիւն… Դաւաճանները չպէտք է տեղ ունենան մեր շարքերում եւ մեր հերոսական գեներալների, սպաների, զինւորների, կամաւորների, ազատամարտիկների թիկունքը պէտք է մաքրել համանման տարրերից…»:
Նոյն օրը կինը, որն Արցախում էր, յետ չմնալով ամուսնուց, շտապեց գիշերով գրառում անել դաւաճանութեան մասին։ Սրան էլ յաջորդեց ԱԱԾ-ն. «առաջնորդի» յայտարարութեան հիման վրայ՝ հաղորդագրութիւն տարածեց, թէ կայ ձերբակալւած արցախցի։
Այդ օրը ԱԱԾ երիտասարդ նորանշանակ պետ, անփոխարինելի Քեարամեանը պաշտօնազրկւեց անյայտ պատճառներով, բայց մնաց Արցախում։ (Դա քննարկման թեմա է արդէն շուրջ 2 տարի, բայց այլ հարց է)։
Նիկոլի գրածից, դրան յաջորդած ԱԱԾ հաղորդագրութիւնից արդէն անցել է շուրջ երկու տարի: Օրերս ԱԱԾ-ն մերժել է հարցմանս մէջ նշւած տեղեկութիւնը տրամադրել՝ պատճառաբանելով, թէ նախաքննական գաղտնիք է (ամէն դէպքում հարցը հետապնդում եմ), բայց յատկանշական է, որ նոյն հարցերին ի պատասխան՝ ՀՀ գլխաւոր դատախազութիւնը յայտնել է, որ այդ ընթացքում պետական դաւաճանութեան յօդւածով քրէական գործեր չեն յարուցւել։ Հետեւաբար՝ առիթներ չեն եղել։
Ուղղակի նիկոլին պէտք էր նման մթնոլորտ ձեւաւորել, թէ բոլորը դաւաճան են, ինքը՝ «հարիֆը, խեղճն ի՞նչ անի»։ Կինը շտապել էր ամուսնուն բարոյական աջակցութիւն ցուցաբերել։ Դէ արդէն վաղուց հայ հետախոյզի ուսադիրները նիկոլական ծառաների պալատական հանդերձանքով փոխած ԱԱԾ ծառայողները թութակի նման կրկնել էին շեֆի գրած բառերը։ Հանրութեանը կեղծ դաւաճանութիւններով, դաւաճաններով սնուցելու, հանրային տրամադրութիւն արմատաւորելու գործելաոճին արդէն տեւական ժամանակ դարձել է ԱԱԾ աշխատաձեւը։
Պարբերաբար, յատկապէս առաւօտեան ժամերին ԱԱԾ լրատւականը սարսափազդու ձայնով, կրկնւող կադրերով հաւաքւած տեսանիւթով յայտնում է հերթական դաւաճանութեան մասին։ Կադրերն էլ նոր չեն, դեռ 2018-ին գեներալ Մանուէլ Գրիգորեանին իբր «տուշանկոների» համար վատ ռեժիսուրայով հաւաքել էր այդ օրերին յեղափոխական ագիտատոր, այժմ Ալավերդու քաղաքապետ դառնալ ցանկացող ներկայիս ՔՊ-ական պատգամաւորը, որը մինչեւ հիմա չի հերքել։ Իրարայաջորդ «դաւաճանութիւնների» բոլոր դէպքերը մինչեւ երէկ առնչւում էին ՀՀ Զինւած ուժերին։ Զինծառայողներ, պայմանագրայիններ։ Ստալինա-նիկոլական դատավճիռն արձակում էին, բայց յետոյ մոռանում էին ներողութիւն խնդրել, որ նրանցից շատերն արդարացւել են, մեղադրանքը՝ հանւել։ Անգամ որոշները ստացել են կոչումի ու պաշտօնի բարձրացում։
Կարեւորը՝ հասարակութիւնը լսել է լրատւութիւնը, անդադար, չոր, լեւիտանեան ձայնով դատավճիռ-յայտարարութիւնները։ Ու զանգւածային ինքնախարազանում, թէ մեր զինւած ուժերը դաւաճանել են, բոլորը դաւաճանել են, «էն հարիֆը» (նիկոլը) անուժ է եղել այդ ամենի դէմն առնել, ու հիմա ի՞նչ մեղք ունի։ Երկար մտածելու, վերլուծելու համար էլ առիթ չէին տալիս, թէ ինչո՞ւ են բոլոր նման, իբր բացայայտւած դէպքերը թւագրւած նիկոլական կառավարման 2020-2021 թւականներով։ Որեւէ մէկը չի էլ վերլուծում, թէ միգուցէ հանրային մթնոլորտն է անպաշտպան դարձել. ամէն օր հայրենադաւ յայտարարութիւններ ՔՊ-ական պատգամաւորների, պաշտօնեաների, Նիկոլի շուրթերից լսելուց յետոյ թշնամու հետ կապ հաստատելը չի համարւում կարմիր գիծ, դաւաճանութիւն, եղկելի արարք։ Բայց ԱԱԾ հեքիաթն այլեւս դարձել էր շատ անհետաքրքիր, փուչիկը պայթում էր, հիմա ամէն մի խելագարի, սեփական մեղքերը քողարկելու համար արդէն դարձնում են ադրբեջանական լրտես, ինչպէս նախօրէին արեցին վանաձորցի մի խենթ բիձուկի պարագայում։ Միայն պէտք է կարդալ հաղորդագրութիւնը։ Ու այնքան են շտապել հայ հետախոյզները, որ անգամ լուրը տարածելուց յետոյ չեն էլ տեղադրել պաշտօնական կայքում։
Ինչո՞ւ եմ հետաապնդում երկամեայ անցեալ ունեցող այս բոլոր դէպքերը։ Պատասխանը առաւել քան յստակ է՝ հատիկ-հատիկ, փաստ առ փաստ, դրւագ առ դրւագ, ֆէյսբուքեան գրառումներ ու նիկոլական խմբագրումներ իրար կողքի շարելով, հաւաքւում է ՄԵԾ ԴԱՒԱՃԱՆՈՒԹԵԱՆ խճանկարը։ Ու հեռու չէ այն օրը, երբ վերջին մասնիկն է դրւելու միասնական պատկերի մէջ։
Յ.Գ. Բոլոր գրութիւնները՝ հարցումները, պատասխանները, գրառումները կցում եմ։ Յաջորդիւ մէկ այլ թշնամի բացայայտելու մասին նիկոլական յայտարարութիւնը, ի պատասխան հարցմանս, գրաւոր հերքել է արդէն Քեարամեանն ու ՀՀ Քննչական կոմիտէն։ Այդ մասին՝ հետագայում»։
