Հա

Քաղաքական

01/09/2022 - 11:55

«Թէեւ երէկ ես վերադարձայ ազատութեան, արդարութեան վերջնական հաստատման համար պայքարը շարունակւում է». Աւետիք Չալաբեան

«Համախմբում» շարժման անդամ, ընդդիմադիր հասարակական-քաղաքական գործիչ Աւետիք Չալաբեանն իր ֆէյսբուքեան էջում գրում է.

«alikonline.ir» - «Համախմբում» շարժման անդամ, ընդդիմադիր հասարակական-քաղաքական գործիչ Աւետիք Չալաբեանն իր ֆէյսբուքեան էջում գրում է.

«Սիրելի բարեկամներ,

Ինչպէս արդէն շատերդ գիտէք, երէկ ՀՀ Վերաքննիչ դատարանը վերջապէս բեկանեց չորս շաբաթ առաջ Երեւանի առաջին ատեանի դատարանի կողմից ընդունած ծայրայեղ ապօրինի, անհեթեթ որոշումը, եւ թոյլ տւեց ինձ գրաւի դիմաց ազատութեան դուրս գալ։

Սա չափազանց կարեւոր քայլ էր՝ վերականգնելու օրինականութիւնը, եւ խզելու այն ապօրինութիւնների շղթան, որը սկսւել էր այս տարւայ մայիսի 12-ին, մեր բնակարանում ցուցադրական խուզարկումով եւ իմ փաստացի առեւանգումով, եւ շարունակւել էր իր նախադէպը չունեցող դատական ակտերի շարանով, որոնցից իւրաքանչիւրը էլ աւելի աբսուրդային եւ անհիմն էր, քան նախորդը, եւ ընդամէնը նպատակ ունէր ինձ հնարաւորինս երկար անազատութեան մէջ պահել, եւ դրանով մեկուսացնել այն հանրային եւ քաղաքական գործընթացներից, որոնք այդ ընթացքում ծաւալւում էին մեր ինքնիշխանութիւնը եւ ազգային շահերը մաս-մաս յանձնող, պարտւողական վարչակարգի, եւ դրան ընդդիմացող տարբեր ուժերի միջեւ։

Երէկ շատերը ուշադրութիւն էին դարձրել գրաւի խոշոր չափի վրայ՝ այն իսկապէս աւելի շատ նմանւում էր պատանդառութիւնից դուրս գալու փրկագնի, սակայն ի վերջոյ, երկրորդական նշանակութիւն ունէր։ Առաջնայինն այն էր, որ գործող վարչակարգը, նոյնիսկ շարունակաբար անթաքոյց եւ ցինիկ ճնշումներ կիրառելով այս գործում ներգրաււած իրաւապահ համակարգի տարբեր ներկայացուցիչների վրայ, ի վերջոյ ստիպւած եղաւ տեղի տալ օրէնքի ուժի եւ հանրային բողոքի հզօր ալիքի առաջ, եւ համակերպւել նրա հետ, որ այլեւս ընդունակ չի պարտադրել իր կամքը սեփական իրաւունքները գիտակցող, եւ դրանք հետեւողական իրացնող անհատ քաղաքացուն (եւ քաղաքացիներին ընդհանրապէս)։

Այս իմաստով, ես ցանկանում եմ իմ անկեղծ երախտիքը յայտնել Վերաքննիչ դատարանի դատաւոր տիկին Ռուզաննա Բարսեղեանին, որը դիմագրաւելով իսկապէս վիթխարի ճնշումների, մի քանի անգամ փաստացի հարկադրւած լինելով տեղափոխել դատական վճռի ընդունումը եւ հրապարակումը, ի վերջոյ կարողացաւ դրսեւորել անհրաժեշտ սկզբունքայնութիւն եւ իր գործողութիւններով վերականգնեց օրինականութիւնը։

Որոշակի դրւատանքի արժանի նաեւ ՀՀ դատախազութեան դիրքորոշումը, որը տւեալ դէպքում առնւազն երեք անգամ, տարբեր դատական նիստերի ընթացքում, յստակ արտայայտւեց իմ ազատութիւնը վերականգնելու օգտին, եւ դրանով նպաստեց վերջնական վճռի կայացմանը։

Յատուկ շնորհակալութիւն եմ ցանկանում յայտնել այստեղ մեր պաշտպանական խմբի բոլոր անդամներին, որոնք ոչ միայն նախաձեռնողական եւ բարձրորակ իրաւական պաշտպանութիւն էին իրականացնում դատարաններում, այլեւ հանրային հաղորդակցութեան վիթխարի ծաւալի աշխատանք կատարեցին, դրանով մոբիլիզացնելով հանրային կարծիքը եւ նպաստելով օրինականութեան հաստատմանը։

Անկեղծ շնորհակալութիւն եմ ցանկանում յայտնել նաեւ բոլոր այն լրատւամիջոցներին եւ լրագրողներին, որոնք այս ընթացքում օգնեցին լուսաբանելու այս գործը, եւ հասարակութեանը հասու դարձրեցին տեղի ունեցող բոլոր ապօրինութիւններին։ Նոյն կերպ, անչափ շնորհակալ եմ բոլոր այն հանրային, գիտական եւ մշակոյթային գործիչներից, որոնք այս ընթացքում իրենց ձայնը բարձրացրին ի պաշպանութիւն մեր երկրում արդարութեան, ընդդէմ իրաւունքի ոտնահարման եւ «քաղաքական նպատակայարմարութեամբ» պայմանաւորւած ապօրինութեան։

Եւ վերջապէս, բնականաբար, շնորհակալ եմ իմ ընտանիքի բոլոր անդամներից, որոնք այս ընթացքում իրենց վրայ տարան այս ծանր բեռը, եւ անձնապէս մեծ գին վճարեցին իմ ազատութեան համար։

Թէեւ երէկ ես վերադարձայ ազատութեան, արդարութեան վերջնական հաստատման համար պայքարը շարունակւում է։ Դեռեւս շարունակւում է իմ դէմ սկսւած շինծու քրէական գործը, եւ մեր նպատակն է լինելու, մեր պաշտպանական թիմի որդեգրած օրինական միջոցներով, ապացուցել մեղադրանքի ողջ սնանկութիւնը, եւ հասնել իմ վերջնական արդարացման, եթէ դա նոյնիսկ տարիներ տեւի, եւ հետագայ մեծ ջանքեր պահանջի։

Աւելի լայն իմաստով, շարունակւում է պայքարը բոլոր քաղաքական բանտարկեալների ազատութեան, եւ մեր երկրում իրաւունքի գերակայութեան համար, եւ մենք հնարաւոր բոլոր ջանքերը կը գործադրենք, որպէսզի աջակցենք իրենց վրայ այս վարչակարգի ապօրինութիւնների բեռը կրող մեր բոլոր հայրենակիցներին, ինչպէս նաեւ նախաձեռնենեք իրաւական համակարգի այնպիսի բարեփոխումներ, որոնք հետագայում կը նւազեցնեն կամայականութիւնների հնարաւորութիւնն ընդհանարապէս։

Բնականաբար, շարունակւում է պայքարը նաեւ մեր պետութեան ինքնիշխանութեան վերահաստատման, մեր խարխլւած անւտանգութեան եւ ազգային իրաւունքների վերականգման համար, եւ ես աննահանջ, նոր թափով եւ եռանդով միանալու եմ մեր ամենօրեայ աշխատանքներին ու կռւին՝ մինչեւ բոլորիս հանար իրական եւ շօշափելի յաղթանակ։ Այս նպատակով, մօտակայ օրերին, հնարաւորութիւն կունենամ հանդէս գալ առանձին գրառմամբ, եւ շարադրել առաջիկայ մտայղացումները եւ գործնական պլանները։

Մինչ այդ, շնորհակալութիւն եմ յայտնում իւրքանչիւրին, ով այս ընթացքում եղել է մեր կողքին՝ հաւատացել, աջակցել եւ ուժ է տւել։ Ձեր վստահութիւնն ու աջակցութիւնը ամենաթանկ է, ուժ եւ եռանդ է տալիս յաղթահարելու բոլոր փորձութիւնները, եւ միասին առաջ գնալու՝ դէպի մեր հաւաքական իղձերի եւ երազանքների իրականացում։ Աստւած պահապան բոլորիդ, Աստծոյ աջը բոլորիդ ընտանիքների եւ մեր երկրի վրայ»։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։