Հա

Քաղաքական

02/09/2022 - 13:20

Եթէ ինչ-որ մէկին պէտք է դատել, ապա դա Նիկոլ Փաշինեանն է

News.am-ը Արցախի խորհրդարանի «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանի հետ զրուցել է Բրիւսէլում Նիկոլ Փաշինեանի եւ Իլհամ Ալիեւի հանդիպման շուրջ։

«alikonline.ir» - News.am-ը Արցախի խորհրդարանի «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանի հետ զրուցել է Բրիւսէլում Նիկոլ Փաշինեանի եւ Իլհամ Ալիեւի հանդիպման շուրջ։

 

- Պարո՛ն Մոսիեան, օգոստոսի 31-ին Բրիւսէլում Եւրոպական միութեան նախագահ Շառլ Միշէլի միջնորդութեամբ տեղի ունեցաւ Փաշինեան-Ալիեւ հանդիպում, եւ հանդիպումից կարճ ժամանակ անց թէ՛ Հայաստանի կառավարութիւնը, թէ՛ Եւրոպական միութեան նախագահը յայտարարութիւններով հանդէս եկան: Ուշագրաւն այն էր, որ այդ երկու յայտարարութիւններում ԼՂՀ-ի մասին ոչ մի խօսք չկար: Ի՞նչ է սա նշանակում:

- Ամէն անգամ ես ասում եմ, որ Հայաստանի գործող վարչախումբը ձեռքերը լւացել է Արցախից: Այն կեղծ օրակարգը, որը Նիկոլ Փաշինեանը լցրեց խաղաղութեան համապարփակ համաձայնագրի շուրջ, ես չեմ հասկանում ինչ խաղաղութեան մասին է խօսքը, երբ այսօր ե՛ւ Հայաստանի, ե՛ւ Արցախի սահմաններին տիրում է այն իրավիճակը, որ թշնամին մէկ տարուց աւելի Հայաստանի սուվերեն տարածքները հսկում է, եւ խօսել խաղաղութեան օրակարգից, վերջերս էլ դուք գիտէք, որ խորհրդարանի ամբիոնից ասում է այլընտրանք չկայ, բայց դա էլ երաշխիք չէ: Այս ամէնը դժւար է մեկնաբանել, քանի որ սովորական հայի գլխում սա չի տեղաւորւում: Միգուցէ Նիկոլ Փաշինեանը կարողանայ իր պատասխանները մեկնաբանել, որովհետեւ առաւօտեան, կէսօրին եւ երեկոյեան տարբեր բաներ է ասում եւ անում տարբեր բաներ:

 

- Այդ յայտարարութիւններում ակտիւօրէն խօսւում է խաղաղութեան պայմանագրի նախագծի մշակման մասին, եւ կարծես շատ մօտ է թւում խաղաղութեան պայմանագրի կնքումը: Քանի դեռ լուծւած չէ ԼՂՀ-ի հարցը, արդեօ՞ք կարծում էք ճիշտ ժամանակն է խաղաղութեան պայմանագրի կնքումը:

- Խաղաղութիւնը ժողովուրդների միջեւ հաստատւում է կա՛մ հաւասարակշռութեան, կա՛մ պարտադրանքի դէպքում: Այս պարագայում մենք ոչ թէ գործ ունենք խաղաղութեան պայմանագրի, այլ պարտադրանքի հետ: Նոյեմբերի 9-ի կապիտուլեացիոն համաձայնագրից յետոյ, մենք ասել ենք, որ սա դեռ վերջը չի: Անցնող երկու տարիները ցոյց տւեցին, որ դրանից վատ էլ է լինում, եւ համաձայնագրի այն կէտերը, որոնք վերաբերում են գերիներին չի կատարւում փոխարէնը Ադրբեջանը համաձայնագրից դուրս ստանում է յաւելեալ կէտեր, եւ սա Նիկոլ Փաշինեանի, ինչպէս ինքն է ասել, բանաւոր ընկալումների, եւ բանաւոր պայմանաւորւածութիւնների մասին է: Տարբեր առիթներով ասել եմ, որ մինչեւ Փաշինեանը չբացի այդ պայմանաւորւածութիւնների ամբողջ բովանդակութիւնը, մենք չենք կարող իմանալ, եւ ամէն առաւօտ մենք պէտք է սպասենք վատ լուրի: Խաղաղութեան դարաշրջանի մասին մենք ասել ենք, իսկ ո՞ւր մնաց Արցախը: Բնականաբար, Փաշինեանը եւ իր բարձրաստիճան պաշտօնեաները, երեւի բանաւոր պայմանաւորւել են Արցախ չգալը, նրանք Արցախի հետ գործ չունեն եւ Արցախ անունը չեն տայ: Վաղը սեպտեմբերի 2-ն է, եւ Նիկոլ Փաշինեանը Հայաստանի ղեկավարի այն բարձրագոյն աթոռը զբաղեցնող անձն է, որը պատերազմից յետոյ դեռ Արցախ չի այցելել: Չգիտեմ՝ այդ ինչ համաձայնագրի մասին կարող է խօսք լինել, որ Արցախը եւ Արցախի կարգավիճակի հարցը մէջը ներառւած չեն:

 

- Արցախի ԱԺ նախագահը դեռ մէկ ամիս առաջ էր, որ Հայաստանի խորհրդարանական ուժերին հրաւիրել է Արցախ՝ մասնակցելու Արցախի անկախութեան 31-րդ տարեդարձին: Տեղեկութիւններ ունէ՞ք՝ իշխող ուժից այդ հրաւէրը ընդունել են:

- Իշխանութեան մասով տեղեկութիւն չունեմ, գիտեմ, որ «Պատիւ ունեմ» եւ «Հայաստան» դաշինքը ներկայ են լինելու:

 

- Ռուսական լրատւամիջոցները վերջին շրջանում տեսակէտներ են շրջանառում, որ Բրիւսէլը, հայ-ադրբեջանական բանակցային գործընթացը իր ձեռքը վերցնելով, փորձում է Ռուսաստանին դուրս մղել այդ գործընթացից: Եթէ այս սցենարը իրականութիւն դառնայ, ապա արցախցիների ապագան ինչպէ՞ս էք պատկերացնում:

- Ռուսաստանը խաղաղապահների տեսքով Արցախում այլ ներկայութիւն ունի եւ Հայաստանում այլ ներկայութիւն ռուսական ռազմաբազայի տեսքով: Ես չեմ կարողանում պատկերացնել այնպիսի մի իրավիճակ, որ Ռուսաստանը դուրս մղւի այս բանակցութիւններից: Ասւածի վառ ապացոյցը Ռուսաստանի ԱԳՆ-ի կոշտ արձագանգն էր Բրիւսէլում տեղի ունեցած հանդիպմանը, նշելով՝ Բրիւսէլը ոչինչ չի կարող առաջարկել:

 

- Սեպտեմբերի 2-ին Ստեփանակերտում մեծ հանրահաւաք է սպասւում: Մի փոքր խօսենք օրւայ խորհրդի մասին:

- Օրւայ խորհուրդը միասնականութիւնն է, դա էր պատճառը, որ մենք կարողացանք սեպտեմբերի 2-ը կերտել Հայաստան-Սփիւռք-Արցախ եռամիասնութեան շնորհիւ: Դժբախտաբար, 2018 թւականին Նիկոլ Փաշինեանը եկաւ իշխանութեան եւ քանդեց այդ եռամիասնութիւնը:

 

- Եթէ վաղը (սեպտեմբերի 2-ին, Խմբ.) Հայաստանի իշխանութիւններից որեւէ մէկը չլինի Արցախում, Դուք դա ինչպէ՞ս կը բացատրէք:

- Մենք յոյս չունենք, որ Հայաստանի իշխանութիւններից որեւէ մէկը կը լինի:

 

- Պատերազմից գրեթէ երկու տարի անց Շուշիի անկման համար մեղադրւում է ՊԲ նախկին հրամանատար Միքայէլ Արզումանեանը: Տեղեակ ենք, որ օգոստոսի 31-ին նախատեսւած էր Փաշինեան-Ալիեւ հանդիպումը, եւ հէնց այդ օրն էր, որ Արզումանեանին ձերբակալեցին: Երէկ էլ հանդիպումից յետոյ կալանավորւեց: Կապ տեսնո՞ւմ էք ձերբակալման եւ կալանաւորման հետ:

- Ես որեւէ բան պատահական չեմ համարում: Մենք յիշում ենք, թէ ինչպէս ՀՀ երկրորդ նախագահ Ռոբերտ Քոչարեանի դատավարութիւնը տեղի ունեցաւ Շուշին գրաւելու օրը: Փաշինեանի ցանկացած հանդիպումը Ալիեւի հետ ինչ-որ «մասկի շոուներ» են եղել: Ես մի բան գիտեմ, որ Արզումանեանը այդ օղակը չի: Եթէ ինչ-որ մէկին պէտք է դատել այս գործերի համար, ապա դա Նիկոլ Փաշինեանն է: Բայց հիմա Հայաստանում տեղի է ունենում մեղաւորների նշանակման գործընթաց: Մի մարդ խորհրդարանում կանգնում է եւ ասում՝ մենք հպարտ ենք: Բոլորը մեղաւոր են, բացի իրենցից:

 

Յարակից լուրեր

  • Նիկոլ Փաշինեանի կրեդոն՝ «Մաշնես ու ես»
    Նիկոլ Փաշինեանի կրեդոն՝ «Մաշնես ու ես»

    Նիկոլ Փաշինեանի իշխանութեան բազմաթիւ առանձնայատկութիւններից մէկը Հայաստանի ապասուբիեկտայնացմանը զուգահեռ՝ սեփական անձի գերսուբիեկտայնացումն է։

    Նրա իշխանութեան անցած շուրջ 5 տարիների ընթացքում Հայաստանը՝ որպէս պետական կազմաւորում, բովանդակօրէն գրեթէ ամբողջութեամբ կորցրել է իր սուբիեկտայնութիւնը՝ ինչպէս տարածաշրջանային, այնպէս էլ ու առաւել եւս՝ միջազգային քաղաքականութեան ասպարէզում։

  • Միակ դեղամիջոցը՝ Նիկոլ Փաշինեանի իշխանութեան դէմ
    Միակ դեղամիջոցը՝ Նիկոլ Փաշինեանի իշխանութեան դէմ

    Մեր ժամանակների հակասական առանձնայատկութիւններից մէկը տեղեկատւութեան անսահմանութեան պայմաններում ճշմարտութեան գրեթէ տոտալ բացակայութիւնն է։

  • Նիկոլ Փաշինեանի գաղտնի գործակալները
    Նիկոլ Փաշինեանի գաղտնի գործակալները

    Հայ հասարակութեան անտարբերութեան, ամորֆ լինելու մասին թէզը վերջին ժամանակների ամենաթրենդային մեղադրանքներից է։

    Այդ մասին խօսում են բոլորը՝ քաղաքական գործիչները, մտաւորականները, մամուլը, սոցիալական ցանցերը։

  • Հայաստանն առանց դիւանագէտների․ Նիկոլ Փաշինեանի գանգրահեր մարտահրաւէրն ԱԳՆ-ին
    Հայաստանն առանց դիւանագէտների․ Նիկոլ Փաշինեանի գանգրահեր մարտահրաւէրն ԱԳՆ-ին

    Նիկոլ Փաշինեանը հերթական էքսցենտրիկ կադրային նորարարութիւնն է կատարել՝ արտաքին գործերի փոխնախարարի պաշտօնում խեղկատակ նշանակմամբ։ Նախկինում որպէս ակտիւիստ հանդէս եկած երիտասարդը հասցրել է աչքի ընկնել ոչ աւանդական արտաքինով, Արցախի վերաբերեալ հեգնական, իսկ յետոյ՝ ողբերգական իրականութիւն դարձած յայտարարութիւններով եւ հակառուսականութեամբ։ Այս յատկանիշների շարքում ամենաանշառն արտաքինն է՝ մարդ է, ինքն է որոշում՝ ինչ սանրւածքով կամ ինչպիսի գուլպաներով ներկայանալ հանրութեանը։

  • «Դրօշակ»-ի առաջնորդող. Յոյսի ու յուսախաբութեան միջեւ
    «Դրօշակ»-ի առաջնորդող. Յոյսի ու յուսախաբութեան միջեւ

    Բանական հայի համար 2 բան պէտք է ակնյայտ լինի այլեւս․ խաղաղութեան կեղծ կարգախօսի ներքոյ ինքն իրեն պաշտպանելուց հրաժարւելու քաղաքականութիւնը ոչ թէ չէզոքացնում, այլ աւելի է սրում թուրք նւաճողների ագրեսիւութիւնը եւ երկրորդ․ Արցախի յանձնումը ոչ թէ բերելու է թուրք հարեւանների պահանջների բաւարարմանը, այլ անմիջապէս վտանգի տակ է դնելու Զանգեզուրը՝ ինչը եւ ներկայումս տեղի է ունենում։

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։