Հա

Քաղաքական

09/09/2022 - 22:00

«Հայաստան» խմբակցութեան յայտարարութիւնը խորհրդարանական գործունէութեան վերաբերեալ

Խորհրդարանական մէկամեայ գործունէութեան փորձը ցոյց է տւել, որ գործադիր իշխանութիւնը եւ իր կցորդ խորհրդարանական մեծամասնութիւնը, խախտելով Սահմանադրութիւնն ու օրէնքները՝ տապալում են Ազգային ժողովի բնականոն աշխատանքը:

Յարգելի՛ հայրենակիցներ,

Խորհրդարանական մէկամեայ գործունէութեան փորձը ցոյց է տւել, որ գործադիր իշխանութիւնը եւ իր կցորդ խորհրդարանական մեծամասնութիւնը, խախտելով Սահմանադրութիւնն ու օրէնքները՝ տապալում են Ազգային ժողովի բնականոն աշխատանքը:

Անվտանգութեան լրջագոյն սպառնալիքներն անտեսելով՝ գործող իշխանութիւնները Ազգային ժողովին պարտադրում են Հայաստանին եւ Արցախին պատուհասած անմիջական վտանգներին անհաղորդ օրակարգեր: Աւելին՝ ՔՊ-ի կողմից ԱԺ կանոնակարգի կոպտագոյն խախտումները, նիստերի վարման միջազգային ստանդարտների անտեսումը, եւ մեծամասնութեան լիազօրութիւնների ակնյայտ չարաշահումները ապալեգիտիմացնում են խորհրդարանի՝ որպէս առաջնային մանդատ ունեցող ներկայացուցչական մարմնի գործունէութիւնը:

Այս պայմաններում՝ ապօրինութիւններով գործող խորհրդարանական մեծամասնութեան դէմ պայքարում շարունակելու ենք կիրառել միջազգային պրակտիկայում ընդունւած քաղաքական բոյկոտի գործիքը, այն է՝ չենք մասնակցելու ոչ առաջնային, յաճախ էլ արհեստական օրակարգերով լեցուն ԱԺ եւ նրա յանձնաժողովների նիստերին։

Ինչպէս բազմիցս յայտարարել ենք, խորհրդարանական նիստերին մեր մասնակցութիւնը պայմանաւորւած է հանրային աջակցութիւն ստացած օրակարգերի առաջմղմամբ, այն է՝

Հայաստանի ու Արցախի անվտանգութիւնը,

օրւայ իշխանութիւնների պաշտօնանկութիւնը

երկրի հզօրացման ազգային-պետական ուղեգծի հաստատումը։

Ի յաւելումն նշւածի ժողովրդի կողմից ստացած մանդատը խմբակցութիւնն օգտագործելու է՝ հանրային իրական հետաքրքրութիւն ու հնչեղութիւն ունեցող թեմաներով լսումների կազմակերպման, գործող իշխանութիւնների ապազգային, հակապետական նախաձեռնութիւնները, նրանց կողմից երկրի սոցիալ-տնտեսական խնդիրները լուծելու անկարողութիւնը, կոռուպցիոն երեւոյթները, դատաիրաւական համակարգի ամենաթողութիւնը, մարդու իրաւունքների եւ ժողովրդավարութեան խախտումները բացայայտելու եւ դրանց դէմ պայքարի ուղղութեամբ:

Խմբակցութիւնն իր ներկայացուցիչների միջոցով շարունակելու է ակտիւ շփումներն ու աշխատանքները արտերկրի մեր գործընկերների ու Հայաստանում հաւատարմագրւած դիւանագիտական ներկայացուցչութիւնների հետ, ինչպէս նաեւ դրանց օգտակարութիւնը եւ արդիւնաւէտութիւնը գնահատելով՝ մասնակցելու է միջազգային հանդիպումներին մեր երկրի շահերը պաշտպանելու, հայ ժողովրդի նկատմամբ կատարւած յանցագործութիւնները բարձրաձայնելու եւ դատապարտելու համար։ Ըստ անհրաժեշտութեան կիրառւելու են նաեւ պետական ու հանրային օրակարգերը սպասարկող խորհրդարանական այլ գործիքները:

Միեւնոյն ժամանակ շարունակելու ենք ակտիւ գործունէութիւն իրականացնել ԱԺ-ից դուրս՝ մեր երկրին սպառնացող վտանգների մասին հանրային լայն շրջանակներին իրազեկելու, քաղաքական գործընթացներում ուղղակի մասնակցութիւն ապահովելու, «Դիմադրութեան» շարժմանը նոր թափ հաղորդելու, ներքին ու արտաքին անվտանգային քաղաքականխնդիրները լուծելու նպատակով։

Յարգելի՛ հայրենակիցներ,

Մենք համոզւած ենք, որ իշխանափոխութիւններն այն անհրաժեշտ նւազագոյն պայմանն է, որի դէպքում է միայն հնարաւոր լուծել մեր երկրի առաջ ծառացած խնդիրները, յաղթահարել մարտահրաւէրները, փակել պարտութեան էջը, դուրս գալ այս նւաստացած վիճակից: Հայաստանը չի կարող աշխարհին ներկայանալ պարտութեան ու խայտառակութեան խորհրդանիշ հանդիսացող դէմքով: Բացառապէս Հայաստանի շահերը ներկայացնող նոր բանակցողը միայն կարող է իրական ու արժանապատիւ խաղաղութիւն ապահովել եւ տանել մեր երկիրը զարգացման ճանապարհով:

 

«Հայաստան» խմբակցութիւն

09.09.22թ.

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։