Հա

Քաղաքական

23/09/2022 - 11:45

«ՄԱԿ-ում Նիկոլ Փաշինեանը վերահաստատեց Արցախից հրաժարւելու իր՝ բազմիցս արտայայտած մօտեցումը». Քաղաքագէտ

Քաղաքագէտ Ստեփան Հասան-Ջալալեանն ուշադրութիւն է հրաւիրում ՄԱԿ-ում Նիկոլ Փաշինեանի ելոյթի այն հատւածին, որտեղ վերջինն օգտագործեց «Լեռնային Ղարաբաղի հայեր» արտայայտութիւնը։

«alikonline.ir» - Քաղաքագէտ Ստեփան Հասան-Ջալալեանն ուշադրութիւն է հրաւիրում ՄԱԿ-ում Նիկոլ Փաշինեանի ելոյթի այն հատւածին, որտեղ վերջինն օգտագործեց «Լեռնային Ղարաբաղի հայեր» արտայայտութիւնը։ Գրում է Panorama.am-ը։

Քաղաքագէտն իր տարածած յօդւածում  ընդգծում է՝ 2022թ. սեպտեմբերի 22-ին ելոյթ ունենալով ՄԱԿ-ի Գլխաւոր ասամբլեայի 77-րդ նստաշրջանում՝ Նիկոլ Փաշինեանն ադրբեջանաարցախեան հակամարտութեան կարգաւորման առնչութեամբ խօսեց ընդամէնն Արցախում ապրող հայութեան իրաւունքների եւ անվտանգութեան երաշխաւորման մասին:    

«Անիրաւացիօրէն եւ անարդարացիօրէն Նիկոլ Փաշինեանը ոչինչ չասաց այն մասին, որ՝

- ադրբեջանաարցախեան հակամարտութիւնը կարգաւորւած չէ եւ այն պէտք է կարգաւորւի համակարտութեան կարգաւորման նպատակով ստեղծւած միջազգային միակ մանդատ ունեցող ԵԱՀԿ Մինսկի խմբի եռանախագահութեան ձեւաչափի շրջանակներում՝ միջազգային իրաւունքի երեք սկզբունքների այն է՝ ազգերի ինքնորոշման, ուժ կամ ուժի սպառնալիք չկիրառելու եւ տարածքային ամբողջականութեան, հիման վրայ:

- Արցախի հայութիւնը իրացրել է միջազգային իրաւական ակտերով սահմանւած ինքնորոշման իր իրաւունքը եւ այն պէտք է ստանայ միջազգային ճանաչում:

- Ադրբեջանն օկուպացրել է Արցախի Հանրապետութեան սահմանադրօրէն ամրագրւած տարածքները եւ պէտք է ազատի դրանք:

Փաստօրէն, կարող ենք արձանագրել, որ ըստ Նիկոլ Փաշինեանի՝ հակամարտութիւնը կարելի է համարել կարգաւորւած, եթէ երաշխաւորւեն Արցախում ապրող հայութեան իրաւունքներն ու անվտանգութիւնը:  

Հաշւի առնելով վերոգրեալը՝ կարող ենք պնդել, որ Նիկոլ Փաշինեանի նման մօտեցումն իր էութեամբ հակաարցախեան է եւ կատարելապէս հակասում է Արցախի ամբողջ, իսկ Հայաստանի հայութեան մեծ մասի դիրքորոշմանը, դէմ է Արցախի ու Հայաստանի Հանրապետութիւնների ազգային, պետական շահերին:     

Արցախի Հանրապետութիւնում, Հայաստանի Հանրապետութիւնում եւ Սփիւռքում բնակւող հայ ժողովուրդն այս պահին ունի մէկ կենսական կարեւորութեան ազգային խնդիր. համազգային ուժերի գերլարմամբ իշխանութիւնից հեռացնել Նիկոլ Փաշինեանին: Իշխանութեամբ օժտւած Նիկոլ Փաշինեանը գոյութենական կամ էքզիստենցիալ սպառնալիք է Հայաստանի Հանրապետութիւնում եւ Արցախի Հանրապետութիւնում բնակւող հայութեան համար»։

Յիշեցնենք, որ Փաշինեանը ելոյթում մասնաւորապէս ասել էր. «Այնուամենայնիւ, Լեռնային Ղարաբաղի հայերը միջազգային հանրութեան աջակցութեան կարիքն ունեն»։

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։