Հա

Քաղաքական

07/10/2022 - 16:30

Արցախի Հանրապետութեան Ազգային Ժողովի խմբակցութիւնների յայտարարութիւնը

ԴԺՀ-ի, ԼԺՀ-ի, Խերսոնի եւ Զապորոժէի մարզերի ՌԴ-ին վերամիաւորման մասին.

ԴԺՀ-ի, ԼԺՀ-ի, Խերսոնի եւ Զապորոժէի մարզերի ՌԴ-ին վերամիաւորման մասին.

Նկատի ունենալով Ռուսաստանի Դաշնութեան կողմից Դոնեցկի Ժողովրդական Հանրապետութեան եւ Լուգանսկի Ժողովրդական Հանրապետութեան անկախութեան ճանաչումը եւ դրան յաջորդած 2022 թ. սեպտեմբերի 30-ին վերոյիշեալ երկրամասերի, Խերսոնի եւ Զապորոժէի մարզերի վերամիաւորումը ՌԴ-ին՝ ԱՀ ԱԺ խմբակցութիւնները արձանագրում են, որ Լեռնային Ղարաբաղի Հանրապետութիւնը 1991թ. իրաւական առումով անթերի իրացրել է ինքնորոշման իր իրաւունքը՝ միջազգային իրաւունքի նորմերին, ժողովրդավարութեան սկզբունքներին եւ այդ ժամանակ գործող ԽՍՀՄ օրէնսդրութեանը համապատասխան: Միջազգային հանրութիւնը Ադրբեջանը ճանաչել էր որպէս անկախ պետութիւն ԽՍՀՄ ներքին օրէնսդրութեամբ որոշւած սահմաններում: Ըստ այդ օրէնսդրութեան՝ Ադրբեջանի անկախութեան ձեռք բերման ժամանակ Լեռնային Ղարաբաղը տւեալ երկրի հետ որեւէ առնչութիւն չունէր, այլապէս նա չէր ընդգրկւի ՄԱԿ-ի կազմում, ուստի Ադրբեջանի տարածքային ամբողջականութիւնը ոչ մի կապ չունի Լեռնային Ղարաբաղի Հանրապետութեան հետ:

Ընդունելով ՄԱԿ կանոնադրութեան առաջին յօդւածում ամրագրւած ժողովուրդների իրաւահաւասարութեան եւ ինքնորոշման սկզբունքը եւ Արդարադատութեան միջազգային դատարանի 2010թ. յուլիսի 22-ի վճիռը, ըստ որի միջազգային իրաւունքը չի արգելում այնպիսի անկախութեան հռչակումը, ինչպիսին Կոսովոյում էր, ԱՀ ԱԺ խմբակցութիւնները կոչ են անում ԵԱՀԿ Մինսկի խմբի համանախագահ երկրներին՝ Ռուսաստանի Դաշնութեանը, Ամերիկայի Միացեալ Նահանգներին, Ֆրանսիային եւ ՄԱԿ անդամ միւս 190 պետութիւններին ճանաչել Լեռնային Ղարաբաղի Հանրապետութիւնը, դրանով իսկ ի չիք դարձնելով նրա բնակչութեան առջեւ ծառացած գոյաբանական լրջագոյն սպառնալիքները:

 

«Ազատ Հայրենիք-ՔՄԴ»

«Միասնական Հայրենիք»

«Արդարութիւն»

«Հայ Յեղափոխական Դաշնակցութիւն»

«Արցախի ժողովրդավարական կուսակցութիւն»

ք․ Ստեփանակերտ

07․10․2022թ․

 

Յարակից լուրեր

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։