Արցախում դէմ չեն Բաքւի հետ երկխօսութեանը, սակայն բանակցութիւնը պէտք է տեղի ունենայ միջազգայնօրէն ճանաչւած հարթակի շրջանակում, իսկ միակ ճանաչւած հարթակը ԵԱՀԿ Մինսկի խումբն է:
«alikonline.ir» - Արցախում դէմ չեն Բաքւի հետ երկխօսութեանը, սակայն բանակցութիւնը պէտք է տեղի ունենայ միջազգայնօրէն ճանաչւած հարթակի շրջանակում, իսկ միակ ճանաչւած հարթակը ԵԱՀԿ Մինսկի խումբն է: Այս մասին ասաց Արցախի ԱԳ նախարար Դաւիթ Բաբայեանը՝ ՀՀ ազգային ժողովի նախագահի ու Արցախի պատւիրակութեան հանդիպումից յետոյ լրագրողների հետ ճեպազրոյցում՝ անդրադառնալով Երեւանից հնչող այն յայտարարութեանը, որ կարեւոր են Ստեփանակերտի եւ Բաքւի միջեւ քննարկումները: Գրում է Yerkir.am-ը։
«Մենք երբեք դէմ չենք եղել Ստեփանակերտ-Բաքու երկխօսութեանը: Ընդհակառակը, երբ 1996 թւականից յետոյ, փաստօրէն, Արցախը դուրս մնաց բանակցային գործընթացի մի հատւածից, մենք միշտ կոչ էինք անում վերականգնել լիարժէք ձեւաչափը: Հիմա այս ձեւաչափի վերականգնումը նոյնպէս մնացել է մեր օրակարգում: Սակայն, այդ բանակցութիւնները չպէտք է տեղի ունենան միջազգային ճանաչւած հարթակից դուրս: Գոյութիւն ունի մէկ միջազգային ճանաչւած հարթակ՝ ԵԱՀԿ Մինսկի խումբը»,- ասաց Բաբայեանը՝ յաւելելով, որ մի շարք փաստաթղթերում նշւած է, որ Արցախը ե՛ւ բանակցութիւնների, ե՛ւ հակամարտութեան կողմ է:
Նա ընդգծեց՝ Ադրբեջանը, սակայն, պատասխանում է, որ չի ուզում, չի բանակցելու որպէս կողմ՝ իրենց հետ:
«Մենք ասում ենք՝ թող վերականգնւի ձեւաչափը, բանակցենք: Բայց, եթէ ինչ-որ մէկը մտածում է, թէ բանակցութիւնները պէտք է ստանան այն երանգը, որ «աբորիգեն ինչ-որ ցեղախումբ»՝ ի դէմս Արցախի, պէտք է փոշմանած գնայ ու «մայր երկրից»՝ Ադրբեջանի, ներողութիւն խնդրի ու խնդրի նորից ընդգրկել իր կազմ՝ չի՛ լինելու»,- նշեց Բաբայեանը:
Նա յաւելեց, որ այս մասին ասել են նաեւ Հայաստանի իշխանութեանը, որոնք, բնականաբար, հասկանում են դա:
