168 TV-ի «Ռեւիւ» հաղորդաշարի եթերում պատմական գիտութիւնների դոկտոր Հայկ Դեմոյեանը Նիկոլ Փաշինեանի կողմից արւած «Արեւելեան Ադրբեջան» ձեւակերպումը համարեց պետականութեան դէմ ուղղւած յանցագործութիւն:
«alikonline.ir» - Արդէն մէկ շաբաթ է՝ ադրբեջանական Զինւած ուժերն ամենօրեայ ռեժիմով կրակ են բացում հայ-ադրբեջանական դիրքերի ուղղութեամբ՝ շարունակելով օկուպացւած պահել 2021 թւականից ի վեր Հայաստանից օկուպացւած տարածքները, սակայն դա չի խանգարել Նիկոլ Փաշինեանին յայտարարել. «Արեւելեան Ադրբեջանի եւ Նախիջեւանի միջեւ կապն ապահովելու նպատակով հայ-ադրբեջանական սահմանին 3 անցակէտերի բացման վերաբերեալ ՀՀ կառավարութեան որոշման նախագիծը մի քանի ամիս պաշտօնապէս շրջանառութեան մէջ է։ Հայաստանի կառավարութիւնը սպասում է Ադրբեջանի դրական արձագանգին»։
168 TV-ի «Ռեւիւ» հաղորդաշարի եթերում պատմական գիտութիւնների դոկտոր Հայկ Դեմոյեանը Նիկոլ Փաշինեանի կողմից արւած «Արեւելեան Ադրբեջան» ձեւակերպումը համարեց պետականութեան դէմ ուղղւած յանցագործութիւն՝ ընդգծելով.
«Արեւելեան Ադրբեջան եզրոյթի օգտագործումը մեզ համար ողբերգութիւն է, որովհետեւ դա անում է Ադրբեջանը, որտեղ տպւում են գրքեր եւ քարտէզներ, որտեղ Արեւմտեան Ադրբեջան է ներկայացւում մեր այսօրւայ Հայաստանը, իսկ Արեւելեան՝ այսօրւայ Ադրբեջանը։ Օգտագործելով Արեւելեան Ադրբեջան եզրոյթը՝ Փաշինեանը հաստատում է Ալիեւի ասածը, թէ մենք ապրում ենք Արեւմտեան Ադրբեջանում. սա ե՛ւ տգիտութիւն է, ե՛ւ յատուկ ծրագիր։ Կրկնում եմ՝ Արեւելեան Ադրբեջան ձեւակերպումն Ադրբեջանն է օգտագործում՝ այսօրւայ Հայաստանի մշակութային արժէքներն իր գրքերում ներկայացնելով՝ որպէս իր միւս մասին պատկանող արժէքներ, այնպէս որ՝ Փաշինեանի ասած Արեւելեան Ադրբեջան ձեւակերպումը վտանգաւոր եւ յանցագործ ձեւակերպում է»։
Նշենք, որ ի պատասխան Նիկոլ Փաշինեանի՝ Հայաստանի տարածքով դէպի Նախիջեւան կապւելու վերաբերեալ Ադրբեջանին ուղղւած հրաւէրի՝ Փաշինեանի թւիթերեան գրառումից ժամեր անց պատասխանեց Ադրբեջանի ԱԳՆ-ն՝ յայտնելով.
«Հայաստանը պէտք է դադարի պատճառաբանութիւններ փնտրել՝ խուսափելու «Զանգեզուրի միջանցքը» ճանապարհների/երկաթուղիների հետ կապելու պարտաւորութիւնից՝ համաձայն 2020 թւականի նոյեմբերի եռակողմ յայտարարութեան: Անիրատեսական տարբերակ առաջարկելը` միաժամանակ անտեսելով 20 ամսւայ քննարկումները, լաւագոյն քաղաքականութիւնը չէ»։
Հայկ Դեմոյեանն անդրադարձաւ նաեւ Փաշինեանի կողմից շրջանառւող մէկ այլ թէզի՝ Խաղաղութեան դարաշրջանին՝ դա համարելով պարզապէս մոլագարութիւն։
«Մոլագար պէտք է լինել, որ 44-օրեայ պատերազմից ու Ադրբեջանում հայի նկատմամբ ամէն օր գեներացւող ատելութիւնից յետոյ դեռ համարձակւել խօսել խաղաղութեան մասին. մոլագարութիւն է, որովհետեւ հայատեացութիւնն ու պատերազմն Ալիեւի համար ամենացանկալի միջոցն են սեփական իշխանութիւնն ամրապնդելու եւ միլիարդաւոր գումարներ իւրացնելու համար. յիշէք՝ պատերազմը նաեւ էկոնոմիկա է»,- ասաց Դեմոյեանը։
Նա կոչով դիմեց հայ ժողովրդին խաղաղութիւն, բայց իրականում պատերազմ բերող թղթով, այսպէս կոչւած՝ «Խաղաղութեան պայմանագրով» կերակրող գործող ՀՀ իշխանութեանը՝ ասելով.
«Այս իշխանութեանը կոչ եմ անում խաղաղութեան թուղթ ասւածը դնել մի կողմ եւ Ալիեւին յիշեցնել, թէ ի՞նչ ճակատագիր ունեցան ադրբեջանական առաջին հանրապետութեան պարագլուխները, որոնք հայակեր էին ու կազմակերպել էին, օրինակ, Շուշիի կոտորածը։ Ալիեւի հետ պէտք է խօսել ոչ թէ խաղաղութեան, այլ պատժի լեզւով ու պատժի անհրաժեշտութեան մասին»,- ասաց Դեմոյեանը։
Նա միեւնոյն ժամանակ ընդգծեց, որ դժւար է խօսել պատժի մասին այն դէպքում, երբ իշխանութիւնն իրեն լաւ է զգում պարտւածի կարգավիճակում։
«Պարտւածի սեւ դափնիները դուր են գալիս Փաշինեանի իշխանութեանը, բայց չէ՞ որ պարտւածի հոգեբանութեամբ ապրողն առաջին հերթին դաւաճանում է սեփական ազգի բանակը, որը ոչ թէ պարտւելու, այլ յաղթելու համար է»,- ասաց նա։
Աղաւնի Սուքիասեան
