Ակնյայտ է, որ արդէն երկար ժամանակ Նիկոլ Փաշինեանը եւ Հայաստանի գործող իշխանութիւնը չի կարողանում հայկական շահն առաջ մղել եւ ցուցադրական մի քանի յայտարարութիւնները ոչինչ են, երբ դատում ենք արդիւնքներով: Yerevan.Today-ի հետ զրոյցում ասաց ՀՅԴ ԳՄ անդամ, ՀՀ ԱԺ «Հայաստան» խմբակցութեան պատգամաւոր Արծւիկ Մինասեանը:
«alikonline.ir» - Ակնյայտ է, որ արդէն երկար ժամանակ Նիկոլ Փաշինեանը եւ Հայաստանի գործող իշխանութիւնը չի կարողանում հայկական շահն առաջ մղել եւ ցուցադրական մի քանի յայտարարութիւնները ոչինչ են, երբ դատում ենք արդիւնքներով: Yerevan.Today-ի հետ զրոյցում ասաց ՀՅԴ ԳՄ անդամ, ՀՀ ԱԺ «Հայաստան» խմբակցութեան պատգամաւոր Արծւիկ Մինասեանը:
«Գուցէ ռուսաստանեան հանդիպումից առաջ հանրութեան մօտ չափազանցւած էին սպասումները, մանաւանդ, որ դրան նախորդել էր ՌԴ նախագահի խօսքը՝ ուղղւած Հայաստանի գործող իշխանութեանն ու հայ ժողովրդին: Մարդիկ մտածում էին, որ այդ հանդիպման ժամանակ շատ աւելի արդիւնաւէտ պաշտպանական համակարգ կառաջարկւի Հայաստանին: Բայց դատելով նրանից, որ մենք ունենք Նիկոլ Փաշինեանի պէս մի անձի, ակնյայտ էր, որ մենք չէինք կարող միանգամից սպասել նման վարքագիծ:
Բայց շատ կարեւոր էր, որ ՌԴ-ն, ինչպէս նաեւ աշխարհը տեսաւ, որ խօսքը, որն ուղղւում էր ժողովրդին, վերջինս պատրաստ է մոբիլիզացւել, եւ արցախեան հանրահաւաքը դրա ամենավառ ապացոյցն էր: Շատերը գնահատում են, թէ իբր արցախեան հանրահաւաքում քաղաքական գնահատական չկար, բայց դա այդպէս չէ, շատ յստակ կարմիր թելով անցնում էր, որ որեւէ հայկական իշխանութիւն չի կարող եւ չպէտք է որեւէ ձեւով կասկածի տակ դնի Արցախի ինքնորոշման իրաւունքը:
Հիմա հերթը մերն է՝ ՀՀ քաղաքացիներինը, բովանդակ հայ ժողովրդինը եւ նոյեմբերի 5-ի հանրահաւաքի իմաստը հէնց սա է, որպէսզի մենք ազգովի կարողանանք համախմբւել եւ կոչ ուղղել աշխարհին, գերտէրութիւններին ու նաեւ թուրք-ադրբեջանական սանձարձակ պահւածքին, որ հայ ժողովուրդը յանձնւելու պատրաստ չէ, հայ ժողովուրդը պայքարելու է իր իրաւունքների համար եւ Արցախի ինքնորոշման իրաւունքն այլընտրանք չունի»:
