Իրանի Իսլ. խորհրդարանի նախկին պատգամաւոր, տեխնիկական գիտութիւնների դոկտոր, պրոֆեսոր Կարէն Խանլարեանը ֆէյսբուքեան իր էջում գրում է.
«alikonline.ir» - Իրանի Իսլ. խորհրդարանի նախկին պատգամաւոր, տեխնիկական գիտութիւնների դոկտոր, պրոֆեսոր Կարէն Խանլարեանը ֆէյսբուքեան իր էջում գրում է.
«Օրեր առաջ «Հաւաստի աղբիւր»-ում նշւեց «Ադրբեջան»-ի 1919-1920թթ. ինչ-որ քարտէզի մասին, որն Ալիեւը դէմ է տւել Հայաստանին՝ սահմանագծման եւ սահմանազատման գործընթացում հիմք դարձնելու համար։
Իհարկէ, բազմիցս փնտրտուքներ տեղի ունեցան պարզելու համար, թէ ի՞նչ քարտէզի կամ քարտէզների մասին է խօսքը... «Մուսաւաթ» կուսակցութեան հիմնադիր, Ադրբեջանի Հանրապետութեան խորհրդարանի նախագահ՝ Մամեդ Էմին Ախունդ Մոլլա ալ Աքբեր օղլու Ռասուլզադէն (1884-1955թթ.), հանդիսանում է՝ Շերւանի պատմական անունը «Ադրբեջան»-ի նենգափոխելու գլխաւոր հեղինակներից։ «Ադրբեջան»-ի խորհրդայնացումից յետոյ նա հաստատւել է Անկարայում՝ «Մուսաւաթ»-ի հակահայ ու հակախորհրդային շարժումը ղեկավարելու նպատակով, եւ այդ գծով հետագայում դարձել է Հիտլերի վստահելին՝ Հարաւային Կովկասի հարցերում։ Մամեդ Էմին Ռասուլզադէի հեղինակած «Ադրբեջանի Հանրապետութիւն» վերտառութեամբ աշխատութիւնը հրատարակւել է Ստամբուլում, 1922թ.։
Սոյն աշխատութեան մէջ տեղադրւել է մի քարտէզ՝ իբրեւ թէ «բռնազաւթւած Ադրբեջան»-ից, ընդ որում ոչ միայն Գանձակն ու Արցախն են պատկերացւել «Ադրբեջան»-ի կազմում, այլ նաեւ Նախիջեւանն ու Սիսականն (Սիւնիք) ամբողջապէս, Գեղարքունիքի մարզի մաքուր կէսը՝ Վարդենիսով, Սոթքով ու Շորժայով, Տաւուշի մարզի մի զգալի մասը՝ Դիլիջանով եւ այլն։
(Ռասուլզադէ, Մամեդ Էմին, Ադրբեջանի Հանրապետութիւն (արաբատառ ադրբեջաներէնով), Ստամբուլ, 1922, էջ 167) Նկատի ունենելով սոյն քարտէզի մօտաւոր թւականը, կարծում ենք, որ հէնց այս մասին է եղել բոթաբեր «հաւաստի աղբիւր»-ի ահագոյժ «բացայայտում»-ը...»:
