Հա

Քաղաքական

27/11/2022 - 08:30

«Չնայած հակամարտող կողմերի՝ ղարաբաղեան հիմնախնդրի հանդէպ հակառակ դիրքորոշումներին` մենք հակւած ենք բանակցային գործընթացը ԵԱՀԿ Մինսկի խմբի հովանու ներքոյ շարունակելուն». Արցախի ԱԺ նախագահ

Չնայած հակամարտող կողմերի ղարաբաղեան հիմնախնդրի հանդէպ հակառակ դիրքորոշումներին, մենք միանշանակ հակւած ենք բանակցային գործընթացը ԵԱՀԿ Մինսկի խմբի հովանու ներքոյ շարունակելուն: Այս մասին «Արցախեան հիմնախնդիրը արդի քաղաքական գործընթացների հոլովոյթում» խորագրով գիտագործնական համաժողովի ժամանակ իր ելոյթում ասել է ԱՀ ԱԺ նախագահ Արթուր Թովմասեանը:

«alikonline.ir» - Չնայած հակամարտող կողմերի ղարաբաղեան հիմնախնդրի հանդէպ հակառակ դիրքորոշումներին, մենք միանշանակ հակւած ենք բանակցային գործընթացը ԵԱՀԿ Մինսկի խմբի հովանու ներքոյ շարունակելուն: Այս մասին «Արցախեան հիմնախնդիրը արդի քաղաքական գործընթացների հոլովոյթում» խորագրով գիտագործնական համաժողովի ժամանակ իր ելոյթում ասել է ԱՀ ԱԺ նախագահ Արթուր Թովմասեանը:

Նա, մասնաւորապէս, ասել է.

«Յարգելի նախագահող

Համաժողովի յարգելի մասնակիցներ, հիւրեր

Ողջունում եմ բոլորիդ Ազգային ժողովի հիւրընկալ օջախում եւ խորապէս կարեւորում «Արցախեան հիմնախնդիրը արդի քաղաքական գործընթացների հոլովոյթում» խորագրով գիտագործնական համաժողովի նախաձեռնումն ու կազմակերպումը:

Մեր օրերում, երբ վտանգւած է Արցախի պետականութիւնը, հակամարտութեան վերջնական լուծման կողքին դրւում է նաեւ Արցախի ժողովրդի ինքնորոշման իրաւունքի իրացման հեռանկարը։

Չնայած հակամարտող կողմերի ղարաբաղեան հիմնախնդրի հանդէպ հակառակ դիրքորոշումներին, մենք միանշանակ հակւած ենք բանակցային գործընթացը ԵԱՀԿ Մինսկի խմբի հովանու ներքոյ շարունակելուն: Մեր այս դիրքորոշումը պէտք է ընկալելի լինի նաեւ Հարաւային Կովկասում իրենց տարածաշրջանային շահերը հետապնդող երկրների համար: Միջազգային հանրութիւնը պարտաւոր է յարգել արցախահայութեան պահանջը, քանզի այն համապատասխանում է միջազգային իրաւունքի հիմնարար սկզբունքներին եւ նորմերին։

Հակամարտութեան կարգաւորումը, տարածաշրջանում տեւական եւ կայուն խաղաղութիւնն անհնար է առանց Ադրբեջանի կողմից օկուպացւած եւ փաստացի Ադրբեջանի վերահսկողութեան տակ յայտնւած տարածքներում հայկական մշակութային եւ հոգեւոր ժառանգութեան պահպանութեան, այդ թւում՝ բոլոր հնարաւոր միջոցներով մշտադիտարկման կազմակերպման՝ կանխելու համար հայերի էթնիկ զտման նպատակով իրականացրած գործողութիւնները:

Ադրբեջանը ցայսօր, խախտելով 2020 թւականի նոյեմբերի 9-ի եռակողմ յայտարարութեան դրոյթները, Արցախի նկատմամբ պարբերաբար ագրեսիւ գործողութիւններ է ձեռնարկում, որոնք որակւում են ինչպէս հայատեացութեան դրսեւորում, այնպէս էլ տարածաշրջանում խաղաղութեան եւ կայունութեան խախտման եւ յատկապէս՝ խաղաղապահ առաքելութեան չէզոքացման նենգ դրսեւորում։

Մենք շարունակելու ենք մեր ջանքերը՝ Արցախի ժողովրդի ինքնորոշման եւ անվտանգութեան համար մղւած Արցախեան ազատամարտի արդիւնքների պաշտպանութեան, խնդրի խաղաղ եւ արդարացի լուծմանը հասնելու ուղղութեամբ:

Մենք կանգնած ենք անցեալից դասեր առնելու, ընդօրինակելու, կատարւածը հանրագումարի բերելու հրամայականի առջեւ: Ներկայ դրութեամբ առաջնահերթ խնդիրը երկրի յուսալի անվտանգութեան ապահովումն է: Կարեւորում ենք յատկապէս ՌԴ կողմից այս հարցի նկատմամբ ընդգծւած վերաբերմունքն ու իրականացւած գործնական քայլերը:

Աշխարհաքաղաքական բարդ ու անկանխատեսելի իրավիճակին եւ արտաքին մարտահրաւէրիներին դիմակայելու համար առաջնային ու կարեւոր գործօն պէտք է հանդիսանան համաժողովրդական համախմբւածութիւնն ու համերաշխութիւնը։

Հաւատացած եմ՝ այսօրւայ գիտաժողովը հետաքրքիր քննարկումների ու եզրահանգումների հարթակ կը հանդիսանայ, ինչը հնարաւորութիւն կընձեռնի քննելու մեր ձեռքբերումներն ու թերացումները, ներկայիս մարտահրաւէրները գիտա-գործնական հարթութեան վրայ ուսումնասիրելու եւ համապատասխան գնահատականներ ու առաջարկներ հաւաքագրելու:

Մեր պայքարը շարունակական է, դիրքորոշումը՝ անփոփոխ:

Կրկին ողջունելով համաժողովի մասնակիցներին՝ մաղթում եմ արդիւնաւէտ ու արգասաբեր աշխատանք:

Շնորհակալութիւն»:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակութիւն © 2011-2022 «ԱԼԻՔ» Օրաթերթ։ Բոլոր իրավունքները պահպանւած են։