Լաւրովի յայտարարութիւնն այն մասին, որ ՀՀ իշխանութիւններն Արցախի կարգավիճակի հարցի փոխարէն բարձրացնում են Արցախի բնակչութեան իրաւունքների հարցը, իսկ Ադրբեջանն ասում է, որ այդ իրաւունքներն ինքն ապահովելու է, բաւականին մտահոգիչ է։ Սա հէնց Արցախի հարցում նշաձող իջեցնելու՝ Փաշինեանի յայտարարութեան ու պատրաստակամութեան հետեւանքն է։
«alikonline.ir» - Լաւրովի յայտարարութիւնն այն մասին, որ ՀՀ իշխանութիւններն Արցախի կարգավիճակի հարցի փոխարէն բարձրացնում են Արցախի բնակչութեան իրաւունքների հարցը, իսկ Ադրբեջանն ասում է, որ այդ իրաւունքներն ինքն ապահովելու է, բաւականին մտահոգիչ է։ Սա հէնց Արցախի հարցում նշաձող իջեցնելու՝ Փաշինեանի յայտարարութեան ու պատրաստակամութեան հետեւանքն է։ «Փաստինֆօ»-ի հետ զրոյցում նման տեսակէտ հնչեցրեց Արցախի խորհրդարանի ՀՅԴ խմբակցութեան պատգամաւոր Արթուր Մոսիեանը։
«Արցախի բնակչութիւն կամ հայութեան իրաւունքների հարցը չէ, որ պէտք է բարձրացւի տարբեր հարթակներում, այլ Արցախի կարգավիճակի հարցը։ Արցախը պետական կայացած ինստիտուտներով, դէ ֆակտօ գոյութիւն ունեցող հանրապետութիւն է։ Իսկ այն, որ Արցախի կարգավիճակի հարցն առաջ չի տանում Փաշինեանը, երեւի Ալիեւին տւած խոստման շրջանակում է»,- ասում է Մոսիեանը։
Արցախի ԱԺ պատգամաւորը առաջնային է համարում Արցախի կարգավիճակի յստակեցման ուղղութեամբ կատարւող աշխատանքի արդիւնքը, բայց, միեւնոյն ժամանակ, կարեւորում է նաեւ դրան հասնելու համար ընտրւած ճանապարհը։
«Ի վերջոյ, ՀՀ իշխանութիւնները պէտք է կողմնորոշւեն, թէ, այսպէս ասած, յարաբերութիւնների կարգաւորման ո՞ր տարբերակն են ընտրում՝ ռուսակա՞ն, թէ՞ արեւմտեան։ Փաշինեանն ուզում է մի քանի դաշտում խաղալ, բայց դա շատ վտանգաւոր է ու հէնց այդ պատճառով է, որ այս վիճակում ենք այսօր։ ՀՀ իշխանութիւնների այդ քաղաքականութեան հետեւանքով Հայաստանն ու Արցախն Արեւմուտք-Ռուսաստան հակամարտութեան կիզակէտ են դարձել։ Քանի Փաշինեանի վարչակարգը խելքը գլուխը չի հաւաքել կամ չի հեռացւել, մարտահրաւէրները հետզհետէ միայն աւելի են ահագնանալու»,- նշում է պատգամաւորը։
Որպէսզի ստեղծւած խառմաշփոթն աւելի չխորանայ, Մոսիեանի դիտարկմամբ, ՀՀ-ն անյապաղ պէտք է նորից ստանձնի Արցախի երաշխաւորի դերը ու առաջ մղի բացառապէս Արցախի կարգավիճակը յստակեցնելու պահանջը։
