Նոր տարւայ սեմին ենք մեր սպասումներով ու յոյսերով, նաեւ անհանգիստ սրտով ու մտահոգութիւններով։ Անցնող տարին մեր ժողովրդի համար զերծ չեղաւ տագնապներից, ունեցանք նոր զոհեր ու կորուստներ։ Հայրենիքը տակաւին կանգնած է անվտանգային մարտահրաւէրների առջեւ. թշնամական նշանառութեան տակ են մեր սահմաններն ու խաղաղ բնակավայրերը։ Արցախաբնակ Մեր զաւակները աննկուն ոգով շարունակում են պայքարել յանուն իրենց անկախ կեանքի իրաւունքի պաշտպանութեան՝ դիմագրաւելով բազում նեղութիւնների՝ նաեւ Լաչինի ճանապարհի արգելափակումով պայմանաւորւած։

Սիրելի բարեպաշտ ժողովուրդ ի Հայաստան, յԱրցախ եւ ի սփիւռս,

Մայր Աթոռ Սուրբ Էջմիածնից Հայրապետական Մեր օրհնութիւնը, սէրն ու բարեմաղթանքներն ենք բերում ամենքիդ։

Նոր տարւայ սեմին ենք մեր սպասումներով ու յոյսերով, նաեւ անհանգիստ սրտով ու մտահոգութիւններով։ Անցնող տարին մեր ժողովրդի համար զերծ չեղաւ տագնապներից, ունեցանք նոր զոհեր ու կորուստներ։ Հայրենիքը տակաւին կանգնած է անվտանգային մարտահրաւէրների առջեւ. թշնամական նշանառութեան տակ են մեր սահմաններն ու խաղաղ բնակավայրերը։ Արցախաբնակ Մեր զաւակները աննկուն ոգով շարունակում են պայքարել յանուն իրենց անկախ կեանքի իրաւունքի պաշտպանութեան՝ դիմագրաւելով բազում նեղութիւնների՝ նաեւ Լաչինի ճանապարհի արգելափակումով պայմանաւորւած։ Այսպիսի դժւարին իրավիճակում մենք չենք կարողացել մեր ազգային ներուժով լիարժէք միաբանւել հայրենիքը զօրացնելու եւ ծանր կացութիւնից դուրս բերելու համար։ Այսօր աշխարհն ալեկոծող աշխարհաքաղաքական սուր դիմակայությունները, որ տեղիք են տւել հոգեւոր, սոցիալական եւ տնտեսական բազմազան խնդիրների, նոյնպէս իրենց անմիջական ներգործութիւնն են ունենում մեր տարածաշրջանում ծաւալւող զարգացումների վրայ։

Այդուհանդերձ, առ Աստւած ապաւինութեամբ Ամանորի այս երեկոյ մենք բարեմաղթանքներ ենք ուղղում միմեանց։ Բարեմաղթանքներ՝ աշխարհի խաղաղութեան, մեր հայրենիքի՝ Հայաստանի եւ Արցախի ապահովութեան ու առաջընթաց կեանքի։ Մեր հոգում առաւելաբար ակնկալիքներն են մեր կորուստների վերականգնման, յառնած խնդիրների յաղթահարման եւ ազգային մեր կեանքի նորոգութեան։

Սիրելիներ, քրիստոնեայի առաքելութիւնն է ապրել յոյսով եւ լինել լաւատես՝ համոզումով, որ, ինչպէս ասում է առաքեալը, «յոյսը երբեք չի ամաչեցնում» (Հռ. 5. 5)։

Պետութիւնները կործանւում են, ժողովուրդները անհետանում ոչ թէ փորձութիւնների ծանրութիւնից, այլ յոյսի սպառումից, ապագայի հանդէպ տեսլականի եւ այն կեանքի կոչելու վճռականութեան բացակայութիւնից: Մեր ժողովրդի յարագնայ երթը եղել է ու պիտի շարունակի մնալ Քրիստոսախարիսխ հաւատքի, յոյսի ու լաւատեսութեան պատմութիւն: Այս վստահութեամբ ապրենք ու գործենք՝ ամրօրէն կառչած մեր ինքնութեանը, մեր լինելիութեան անփոխարինելի գրաւականներին՝ հայրենիքին, մեր լեզւին ու մեր հաւատքին: Հեռու վանենք մեզանից վհատութիւնը, ապազգայնութիւնն ու անտարբերութիւնը եւ յուսառատութեամբ համախմբւենք ազգային ու պետական շահերի շուրջ։ Գիտակցենք, որ այս է ուղին մեր վիրաւոր հայրենիքի ապաքինման, Արցախի մեր ժողովրդի ինքնորոշման իրաւունքի պաշտպանութեան, հայրենիք-սփիւռք միասնականութեամբ լուսաւոր գալիքի երաշխաւորման եւ ազգիս յարատեւութեան։ Ուստի, առաքելական յորդորով «արթո՛ւն լինենք եւ սիրոյ ու հաւատի զրահները յագնենք եւ փրկութեան յոյսի սաղաւարտը դնենք» (Ա Թես. 5. 8-9):

Հայրապետիս աղօթքն է, որ Ամենակարողն Աստւած խաղաղութեան մէջ պահի մեր հայրենիքը եւ անփորձանք՝ հայրենեաց պաշտպան մեր զինւորներին։ Տիրոջ օրհնութիւնն ու մխիթարութիւնն ենք հայցում ծանր կորուստներ կրած ընտանիքներին, ապաքինութիւն՝ վիրաւորներին, շուտափոյթ վերադարձ՝ գերեվարւած ու անյայտ կորած մեր զաւակներին։

Ամանորի սեմին միասնաբար հայցենք Ամենակալից, որ Նոր տարում մեր ժողովրդին ի Հայաստան, յԱրցախ եւ ի սփիւռս պահպանի խաղաղ ու ապահով, սիրով միասնական ու շնորհի հայրենաշէն ու ազգաշահ իրագործումներ։ Թող Տէրը մեր կեանքում առատացնի յոյսը մեր հայրենիքի ու ազգի ապագայի հանդէպ։ Եւ թող Աստծոյ սէրն ու շնորհները այսօր եւ միշտ ուղեկից լինեն մեզ եւ ամենքին:

Օրհնեալ, բարի Նոր տարի։