ՀՅԴ Արցախի ԿԿ ներկայացուցիչ, ԱՀ Ազգային ժողովի «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանի հետ հարցազրոյցով «Ապառաժ»-ը ամփոփել է 2022 թւականը:

«alikonline.ir» - ՀՅԴ Արցախի ԿԿ ներկայացուցիչ, ԱՀ Ազգային ժողովի «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանի հետ հարցազրոյցով «Ապառաժ»-ը ամփոփել է 2022 թւականը:

- Ի՞նչ ակնկալիքներ ունէիք անցնող տարուց, արդեօ՞ք կանխատեսելի էին այս տարւայ դժւարութիւնները։ ՀՅԴ Արցախի կառոյցի համար ինչպէ՞ս կը բնորոշէիք տարին։

- Եթէ հակիրճ, ապա՝ չիրականացած սպասումների տարի էր։ Անցնող տարին եղաւ նախորդ տարւայ իներցիոն շարունակութիւնը։ Մինչդեռ, մեր առջեւ ծառացած մարտահրաւէրներն աչքի առաջ ունենալով, սպասում էինք, որ պէտք է արւեն արմատական փոփոխութիւններ։ Դա ոչ թէ միայն սպասելիք էր, այլեւ տրւել էր սահմանադրական փոփոխութիւնների գործընթացի մեկնարկը, որն իր յետեւից պիտի բերէր համակարգային փոփոխութիւններ։ Դժւարութիւնները կանխատեսելի էին եւ սպասելի, եւ հէնց դա մեզ դնում էր վճռական որոշումների ու քայլերի հրամայականի առջեւ։

ՀՅԴ արցախեան կառոյցի համար տարին բնութագրելի է նոյն բնութագրիչներով, ինչ Արցախի ողջ ժողովրդի համար, որովհետեւ մեր կազմակերպական միաւորները, մեր ընկերները այս ժողովրդի մի մասնիկն են եւ հաւասարապէս կրում են ժողովրդին բաժին ընկած բոլոր դժւարութիւնները, նոյնիսկ աւելին, քանի որ դաշնակցականը կրում է իր վրայ լրացուցիչ կազմակերպական եւ բարոյական պատասխանատւութիւն եւ դրանից բխող յաւելեալ պարտականութիւններ։ Այս իմաստով, տարին մեր կառոյցի համար յաւելեալ պարտականութիւնների եւ աշխատանքների տարի էր՝ փորձելու որոշ չափով թեթեւացնել մեր ժողովրդի բեռը:

- Ինչպէս նշեցիք, այս տարւայ ընթացքում սահմանադրական փոփոխութիւններ էին նախատեսւում: Արդեօ՞ք դրանք արդիական են նաեւ այսօր։

- Նախ պէտք է նշել, որ սահմանադրական փոփոխութիւններ նախաձեռնել է Արայիկ Յարութիւնեանը: 2022թ. յունւարի 3-ին նա իր մօտ է հրաւիրել խորհրդարանական ուժերի ներկայացուցիչներին եւ յայտնել իր մտադրութեան մասին՝ այն հիմնաւորելով անվտանգային, ինչպէս նաեւ իշխանութեան գերկենտրոնացման, ԱԺ եւ նախագահական միաժամանակեայ ընտրութեան ոչ նպատակայարմարութեան, իշխանութեան վստահութեան պակասի պատճառներով: Մենք նշել ենք, որ կայ այդպիսի խնդիր, առկայ է իշխանութիւն-հասարակութիւն անջրպետ: Պատերազմում պարտութիւն կրած ցանկացած իշխանութիւն, լինի դա ՀՀ-ում, թէ Արցախում, պէտք է հրաժարական տայ, որովհետեւ պարտւած իշխանութիւնը պարուրւած է հոգեբանական պարտւողի բարդոյթով՝ անկախ դրանում իր ունեցած մեղքի գիտակցւած լինելու, թէ անգործութեան պատճառներից, եւ չի կարող կասեցնել յետպատերազմեան պարտութիւնների թափանիւը:

Վերադառնալով Արցախին՝ նշենք, որ Սահմանադրութեան փոփոխութեան հարցով քաղաքական ուժերի միջեւ կար համախոհութեան մթնոլորտ։ Ստեղծւեց սահմանադրութեան հայեցակարգային յանձնաժողով, եւ քաղաքական ուժերի ներկայացուցիչներն ընդգրկւեցին այդ յանձնաժողովի կազմում: Ըստ ընդունւած հայեցակարգի.

- 2023թ. պէտք է տեղի ունենային արտահերթ խորհրդարանական, 2024թ. արտահերթ նախագահական ընտրութիւններ: Այսպիսով, լուծւում է իշխանութեան նկատմամբ վստահութեան պակասի հարցը եւ 2025թ. նախօրեակին մենք ունենում ենք աւելի երկարաժամկէտ ընտրւած օրէնսդիր եւ գործադիր իշխանութիւն:

- Գերկենտրոնացւած նախագահական համակարգից անցում է կատարւում կիսանախագահական համակարգի: Օրէնսդիր, գործադիր եւ դատական իշխանութիւններն ունենում են աւելի հաւասարակշռւած մօտեցում եւ աւելի արդիւնաւէտ է գործում զսպումների եւ հակակշիռների մեխանիզմը:

Սահմանադրութեան մէջ բազմաթիւ մանր փոփոխութիւններ եւս նախատեսւած էին:

Ցանկանում եմ մանրամասն ներկայացնել սահմանադրական փոփոխութիւնների ընթացքը, քանի որ ԱԺ ամբիոնից խոստացել էի պարզաբանել ողջ գործընթացը։ Արայիկ Յարութիւնեանը, հաշւի առնելով Ադրբեջանի պահւածքը եւ հնարաւոր ընտրութիւնների խափանման հաւանականութիւնը, առաջարկել է նոր ընտրւած խորհրդարանին հանրաքւէից յետոյ լիազօրել որոշ յօդւածներում ձայների 2/3-ով փոփոխութիւններ կատարել: Անկեղծ ասած, քաղաքական ուժերը, մանաւանդ ընդդիմադիր ուժերը, այս մօտեցման կողմնակից չէին, բայց որոշակի անվտանգային խնդիրներ հաշւի առնելով, մենք համաձայնեցինք այդ առաջարկին: Դրանից յետոյ թւով 22 հասարակական կազմակերպութիւններ, որոնցից առնւազն 18-ը ֆինանսաւորւում են պետական բիւջէից, աղմուկ են բարձրացնում եւ յայտարարում, որ իբր խորհրդարանը ցանկանում է իր լիազօրութիւններն ընդլայնել: Մենք գիտենք, որ նման մտահոգութիւններ կան ու չէին կարող չլինել, մեր մօտ էլ նման մտահոգութիւններ են առաջացել: Բայց, ինչպէս արդէն նշեցի, այդ առաջարկութիւնը հնչեցրել է Արայիկ Յարութիւնեանը: Մեր կարծիքով, Արայիկ Յարութիւնեանը գործընթացին մասնակից քաղաքական ուժերի հետ առնւազն անկեղծ չի եղել:

Սահմանադրական փոփոխութիւնների առիթ հանդիսացած պատճառները դեռեւս չեն վերացել. այդ առումով՝ այժմէական են նաեւ այսօր։ Արայիկ Յարութիւնեանը, կասկածներ չյարուցելու համար, յայտարարել է, որ սահմանադրական փոփոխութիւնների գործընթացը իր կողմից յետ կանչւելուց յետոյ նորից շարունակւելու է: Ազգային ժողովին ուղղւած ֆէյսբուքեան անհարկի մեղադրանքներն անհեթեթ են, մանիպուլեացիայի արդիւնք են եւ, վերջին հաշւով, սահմանադրական բարեփոխումներ առաջարկել է Արայիկ Յարութիւնեանը, յետ է կանչել հէնց ինքը: Մենք ուշի ուշով հետեւելու ենք՝ հասկանալու համար՝ սա հերթական մանիպուլեացիա՞ է, թէ՞ ինչ-որ բան փոխելու մտադրութիւն կայ։ Ժամանակը կը տայ այդ հարցի պատասխանը։

- Արցախի ազգային ժողովում այս օրերին քննարկւում է 2023թ. բիւջէի նախագիծը: Նախորդ տարիների համեմատ՝ ՀՅԴ խմբակցութիւնն այնքան էլ ակտիւ մասնակցութիւն չի ունենում քննարկումներին: Ինչո՞վ է պայմանաւորւած այդ հանգամանքը, ի՞նչ դիրքորոշում ունէք բիւջէի նախագծի վերաբերեալ։

- Ինչպէս գիտէք, Ռուբէն Վարդանեանը պետնախարար նշանակւելուց յետոյ յայտարարել է, որ նոր ծրագիր է ներկայացնելու: Հաշւի առնելով ժամանակի սղութիւնը, տեղեկացրել է նաեւ, որ փետրւարի վերջին պատրաստ է լինելու նոր բիւջէի նախագիծը: Մենք առաջարկեցինք այդ դէպքում բիւջէ ընդհանրապէս չընդունել, նոր ծրագրեր ներկայացնել եւ առարկայական քննարկումներ ունենալ: Բայց, հաշւի առնելով այն հանգամանքը, որ կառավարութեան կողմից բիւջֆէի ներկայացումը իմպերատիւ պահանջ է, ներկայացւել է բիւջէ: Մենք չենք ցանկացել մասնակցել մի քննարկման, որն անպտուղ է, որովհետեւ ոչ կառավարութեան կազմն է յայտնի, ոչ ռազմավարութիւնը, ոչ ծրագիրը:

Մենք չենք կարող կողմ կամ դէմ քւէարկել մի բիւջէի, որը փոխւելու է եւ մէկ-երկու ամսւայ կեանք ունի: Դրա համար ՀՅԴ խմբակցութիւնը ձեռնպահ է քւէարկելու:

Աւելացնեմ նաեւ, որ ակտիւօրէն մասնակցելու ենք ներկայացւելիք իրական բիւջէի քննարկումներին:

- Արցախում մի քանի անգամ բազմահազար քաղաքացիների մասնակցութեամբ հանրահաւաքներ կազմակերպւեցին, դուք եւս դրանցից մէկի ժամանակ ելոյթ ունեցաք: Արցախեան հիմնահարցի լուծման ո՞ր փուլում ենք եւ ինչքանո՞վ ենք պատրաստ նոր զարգացումներին։

- Մենք վաղուց արդէն չենք խօսում մեր ազգային-ազատագրական պայքարի մասին: Հիմա համարեա ամէն ինչ կորցրել ենք: Եթէ քաղաքական բանակցութիւնների միջոցով հնարաւոր չլինի վերականգնել Արցախի ինքնիշխանութիւնը, կայ երկու տարբերակ: Կա՛մ մենք պէտք է ազգային-ազատագրական պայքարով հասնենք մեր նպատակին՝ մեր հայրենի հողում արժանապատիւ ապրելուն, կա՛մ պէտք է Արցախը հայաթափւի: Մենք ժամանակին ասում էինք, որ պարտւած իշխանութիւնը պէտք է հեռանայ, որ կարողանանք մէջքներս ուղղենք: Դժբախտաբար Հայաստանում այդ շանսը չօգտագործեցին: Մենք պէտք է միաւորւենք, կանգնեցնենք պարտութիւնների թափանիւը եւ ուժ գտնենք այն հակառակ ուղղութեամբ շարժելու համար:

- Ժողովրդի մէջ տարբեր կարծիքներ են հնչում Արցախի ապագայի հետ կապւած: Այս առումով՝ ի՞նչ է փոխւել 1988թ. համեմատ։

- Մեր հասարակութեան մէջ միշտ խօսւում է մեղաւորների մասին, ու որպէս կանոն՝ մենք առաջին մեղաւորին մեր մէջ չենք տեսնում, փնտրում ենք այլ տեղ: Իհարկէ, արտաքին ազդակները, աշխարհաքաղաքական իրավիճակը շատ կարեւոր է, բայց յիշենք 1988թ., երբ սկսւեց ազգային-ազատագրական շարժումը, քանի տարի մեզ էքստրեմիստ էին անւանում: Այն ժամանակ էլ աշխարհը չէր ընդունում, բայց այն ժամանակ կար քաղաքական կամք, ոգի, ու համախմբւելով՝ մենք տէր կանգնեցինք մեր իրաւունքներին: Դրանից յետոյ աշխարհաքաղաքական իրավիճակի փոփոխութիւնը հնարաւոր դարձրեց մեր ազգային-ազատագրական պայքարի յաջող աւարտը: Այսօր մենք պարտութիւնից յետոյ սկսել ենք սխալ ուղով գնալ, մեղադրում ենք մերթ Արեւմուտքին, մերթ Ռուսաստանին, բայց ինքներս մեզ չենք մեղադրում: Մինչեւ մենք չսթափւենք, մի բռունցք չդառնանք ոի յոյսներս մեզ վրայ դնենք, ոչ մէկը մեր տեղը մեր գործը չի անելու։ Մեր համախմբումից, մեր իրաւունքներին տէր կանգնելու ընթացքում կարող են առաջ գալ նոր դաշնակիցներ: Մենք ենք մեր իրաւունքի եւ մեր վաղւայ օրւայ տէրը:

- Պետնախարար Ռուբէն Վարդանեանը իր հարցազրոյցներից մէկում նշեց, որ մայր Հայաստանն ու Սփիւռքը իրենց ողջ ներուժով չեն կանգնած Արցախի կողքին: Դուք ի՞նչ էք կարծում այս առումով։

- Համամիտ եմ այն տեսակէտին, որ երբ Արցախը SOS է յայտարարում, Հայաստանում եւ Սփիւռքում կատարւողը ադեկւատ համարել չի կարելի: Արցախը, երկու շաբաթից աւելի է, շրջափակման մէջ է, վտանգի ազդանշան է հնչեցրել, եւ համարժէք չէ արձագանգը: Այս առումով՝ ես համամիտ եմ Ռուբէն Վարդանեանի հետ: Իհարկէ, կան արձագանգողներ, օգնողներ, բայց դա բաւարար չէ: Յուսով եմ, որ պարոն Վարդանեանը ժամանակի ընթացքում աւելի հասցէական կը հնչեցնի իր միտքը: Սփիւռքը եւ Հայաստանը միատարր չեն: Մարդիկ կան, որ իրենց ուժերի ներածին չափով պայքարում են, եւ մարդիկ կան, որ դէմ են այս պայքարին: Օրինակ, Հայաստանի իշխանութիւններին չի կարելի համեմատել այն ուժերի հետ, որոնք միշտ Արցախի կողքին են: Կամ՝ Սփիւռքի մի կազմակերպութիւն աջակցում է, միւսը՝ ոչ:

- Շատ է խօսւում միասնականութեան, համախմբւածութեան մասին: Արդեօ՞ք դա այսօրւայ մեր ամենաառաջնահերթ խնդիրն է։

- Ես կասէի՝ ոչ թէ ամենաառաջնահերթ, այլ միակ խնդիրն է: Արցախ-Հայաստան-Սփիւռք միասնական պայքարով մենք կարողացանք հասնել յաջողութեան: Դժբախտաբար, 2018թ. իշխանափոխութիւնից յետոյ Հայաստանի վարչախումբն ամէն ինչ արեց՝ Հայաստանը սեւ-սպիտակի, նախկինների-ներկաների բաժանելու համար, այնուհետեւ, դժբախտաբար, տեղափոխւեց Արցախ, եւ այժմ նոյնը կատարւոմ է Սփիւռքում: Սա դաւադիր ծրագրի իրագործում է, եւ մեր յաջողութեան գրաւականը նորից եռամիասնութեան ձեւաչափը վերականգնելն է: Միայն ողջ ներուժով կը կարողանանք օրէցօր աւելացող մարտահրաւէրներին դիմագրաւել:

Այժմ, երբ Արցախում տարբեր պատրւակներով միասնութիւնը ջլատող քայլեր են արւում, գիտակցաբար թէ անգիտակցաբար ջուր են լցնում թշնամու ջրաղացին: Մենք ինքներս, որպէս ընդդիմադիր քաղաքական ուժ, շատ հարցեր ունենք եւ գործող իշխանութիւնների, եւ պատերազմի վերաբերեալ: Մեզանից ոչ ոք ոչինչ չի մոռացել: Կը գայ ժամանակը եւ մարդիկ պատասխան կը տան իրենց կատարած սխալների համար, բայց հիմա դրա ժամանակը չունենք: Հիմա պէտք է մի կողմ դնենք բոլոր տարաձայնութիւնները եւ միասնական ճակատով դիմագրաւենք։ Նախ, պէտք է ունենանք երկիր, որ հետագայում հնարաւորութիւն ունենանք պատասխանատւութեան կանչել մեղաւորներին:

- ՀՀ-ում բազմահազարանոց ցոյցեր են կազմակերպւել: Յոյս կար, որ դրանք յաջողութեամբ կը պսակւեն: Որո՞նք են, ըստ Ձեզ, հիմնական բացթողումները։

- Մեր հիմնական բացթողումը երեւի այն էր, որ մենք չկարողացանք բացատրել, համոզել մեր ժողովրդին, լսելի դարձնել մեր տեսակէտը, ու ժողովուրդը կուլ գնաց կեղծ խաղաղութեան օրակարգին:

Ցոյցերն ինքնանպատակ չէին: Պարտւած իշխանութիւնը պիտի հեռանայ: Նոյեմբերի 9-ը դարձաւ պարտութիւնների շղթայի ոչ թէ վերջը, այլ սկիզբը: ՀՀ մեր հայրենակիցները, կուլ գնալով այսպէս կոչւած խաղաղութեան կեղծ օրակարգին, չընդունեցին իշխանութիւններին ընտրութեամբ հեռացնելու իրենց հնարաւորութիւնը, եւ ամէն օր՝ թէ ՀՀ-ում, թէ Արցախում, մենք ունենում ենք նորանոր կորուստներ:

Ցաւում եմ, որ անտարբերութիւնը, որը մեր ամենամեծ թշնամին է, տեղ գտաւ հանրութեան մէջ: Շատերը մտածում էին, որ Արցախը տալով կարող են փրկւել՝ չգիտակցելով, որ Արցախը Հայաստանի համար բեռ չէր, Հայաստանի զրահաբաճկոնն էր: Կորցնելով զրահաբաճկոնը, Հայաստանը դարձաւ անպաշտպան, եւ Ջերմուկի, Սոթքի դէպքերը դրա վառ ապացոյցն են: Դժբախտաբար, մինչեւ այսօր էլ դեռ կան մարդիկ, որոնք յոյս ունեն, որ կարելի է ծնկաչոք վիճակում խաղաղութիւն մուրալ: Հայաստանն ու Արցախը մէկ անվտանգային համակարգ են, եւ եթէ ոմանք մտածում են, որ Արցախը տալով կարող են փրկել Հայաստանը, չարաչար սխալւում են. Արցախից յետոյ լինելու է Սիւնիքը, Գեղարքունիքը, Երեւանը: Կամ բոլորս միասին փրկւելու ենք ու կերտելու ենք պետականութիւն, կամ ամէն օր, ամէն ժամ արձանագրելու ենք նոր պարտութիւններ:

- Ինչպէ՞ս էք գնահատում ՀՅԴ-ի եւ ուղեկից կառոյցների գործունէութիւնն Արցախում։

- Պատերազմից յետոյ Դաշնակցութիւնն իր ողջ ներուժով բազմաբնոյթ գործունէութիւն է իրականացրել Արցախում: Պատերազմից անմիջապէս յետոյ Հայ Դատի գրասենեակ բացւեց Արցախում։ Հայ Դատի գրասենեակների միջոցով հնարաւոր է եղել Սփիւռքում, Հայստանում այդ աշխատանքները կոորդինացնել, հնարաւոր հայանպաստ լուծումներ, բանաձեւեր անցկացնել կամ բողոքի ալիք բարձրացնել: ՀՕՄ-ը, ՀՄԸՄ-ն, Համազգային հայ կրթական եւ մշակութային միութիւնը, որպէս ուղեկից կազմակերպութիւններ, ահռելի գործ են կատարել պատերազմից յետոյ երկրին բաժին հասած հումանիտար աղէտը մեղմելու ուղղութեամբ: Միայն ՀՕՄ-ի միջոցով պատերազմից յետոյ 1000 ընտանիք ու բռնի տեղահանւած երկու գիւղերի բնակիչներ չորս ամսւայ դրամական աջակցութիւն են ստացել:

«Արցախֆոնդ» բարեգործական հիմնադրամի միջոցով Դաշնակցութիւնը նպաստել է յետպատերազմեան շրջանում պարենային անվտանգութեան հաստատմանը, մի շարք տնտեսական ծրագրեր է կեանքի կոչել: Այժմ ՀՕՄ-ի միջոցով արեւային ջրատաքացուցիչների ծրագիր է իրականացւում, մոտ 100 սոցիալապէս անապահով ընտանիք արդէն օգտւում է ծրագրից. այն շարունակական է լինելու: Համազգայինի տարբեր խմբակներում աւելի քան 200 երեխաների համար յետպատերազմեան շրջանում արտադասարանական զբաղմունք է ապահովւում:

Ծրագրերը բազմաթիւ են, բոլորը չյիշատակեմ, բայց ՀՅ Դաշնակցութիւնն իր ողջ կարողականութեամբ եւ ուղեկից կազմակերպութիւնների միջոցով մէկ անգամ եւս թէ՛ պատերազմի ընթացքում եւ թէ՛ պատերազմից յետոյ փաստել է, որ Արցախի լինելիութիւնը, հզօրացումը առաջնահերթութիւն են։

Շատերը քննադատում են, որ լինելով ընդդիմութիւն, շատ անգամ իշխանութիւնների հետ համագործակցում ենք՝ առանց հասկանալու, որ ՀՅԴ-ի համար իշխանութիւն կամ ընդդիմութիւն լինելն ինքնանպատակ չէ: Պատռւած նաւակը չեն ճօճում: Վերջին ժամանակահատւածում խորհրդարանական ընդդիմութիւնն աւելի պետականամէտ է եղել, քան իշխանութիւնը, հէնց դրանով էլ մենք առաջնորդւում ենք՝ տեղ-տեղ համագործակցելով իշխանութեան հետ, տեղ-տեղ քննադատելով: Նպատակը մէկն է՝ օր առաջ ամրապնդել պետական ինստիտուտները, պետականութիւնը եւ շարժւել առաջ:

- ՀՅԴ Արցախի կառոյցի անդամներն անցած տարւայ ընթացքում մի շարք հանդիպումներ են ունեցել արտասահմանում։ Ի՞նչ արդիւնքներ կարող էք առանձնացնել։

- Շատ կարեւոր է պատերազմից յետոյ այս իրավիճակում ցոյց տալ, որ Արցախը թէկուզ վիրաւոր պայքարում է, բայց կայ։ Այս հարցում շատ կարեւոր է Հայաստանի ու Սփիւռքի աջակցութիւնը: ԱՀ ԿԳՄՍ փոխնախարար Լեռնիկ Յովհաննիսեանը ԱՀ ԱԳ նախարարի հետ բազմաթիւ հանդիպումներ էն ունեցել ԱՄՆ-ում՝ թէ համայնքային եւ թէ քաղաքական շրջանակների հետ: Ես Արթուր Թովմասեանի գլխաւորած պատւիրակութեան կազմում հանդիպումներ եմ ունեցել Կիպրոսում եւ Լիբանանում: Կիպրոսում հանդիպել ենք համարեա բոլոր խորհրդարանական ուժերի, այդ թւում՝ նաեւ իշխող կուսակցութեան խմբակցութեան հետ, տեղական ինքնակառավարման մարմինների հետ, ինչպէս նաեւ մասնակցել ենք համայնքային մի շարք միջոցառումների: Լիբանանում հանդիպում ենք ունեցել հայկական համայնքը ներկայացնող ՀՅԴ խորհրդարանական խմբակցութեան հետ, ձեռք են բերւել որոշակի պայմանաւորւածութիւններ, նաեւ համայնքային մի շարք միջոցառումների ենք մասնակցել:

ՀՅԴ Բիւրոյի անդամ Դաւիթ Իշխանեանը մասնակցել է Սոցինտեռնի համագումարին, հանդիպումներ է ունեցել եւրոպական մի շարք երկրների ղեկավարների հետ, այնուհետեւ միացել Արայիկ Յարութիւնեանի գլխաւորած պատւիրակութեանը եւ հանդիպումներ ունեցել Ֆրանսիայի քաղաքական շրջանակների հետ: Քննարկումների առանցքում են եղել Արցախի գոյութեան, պետական ինստիտուտների ամրապնդման եւ մեր ինքնորոշման իրաւունքի ճանաչման հարցերը:

- Ի՞նչ կը ցանկանայիք փոխանցել մեր ընթերցողներին։

- Առիթից օգտւելով՝ ուզում եմ շնորհաւորել մեր հայրենակիցներին ամանորեայ եւ սուրբծննդեան տօների կապակցութեամբ: Այս տարի առանձնայատուկ ենք դիմաւորում Նոր տարին՝ շրջափակման պայմաններում: Միշտ ընդունւած է ասել, որ Նոր տարին յաջողութիւններ է բերում: Որպէս մաղթանք՝ կը ցանկանայի, որ մեր ժողովուրդն իր ուսերից թօթափի սեփական ճակատագրի նկատմամբ անտարբերութիւնը։

Զրուցեց Տաթեւիկ Աղաջանեանը