168.am-ի հետ զրոյցում Արցախի Հանրապետութեան ԱԺ «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանը խօսելով բանաձեւի ընդունման եւ դրան յաջորդող քայլերի մասին, նկատեց՝ ցանկացած միջազգային կառոյցի, այդ թւում՝ ԵԽ ընդունած բանաձեւը, անշուշտ, իր ազդեցութիւնն ունենում է։
«alikonline.ir» - Յունւարի 19-ին Եւրոպական խորհրդարանը կողմ քւէարկեց շրջանառութեան մէջ դրւած «Լեռնային Ղարաբաղի շրջափակման մարդասիրական հետեւանքները» բանաձեւի նախագծին։
Բանաձեւը մասամբ ներկայացւել էր հեղինակ ԵԽ պատգամաւորների կողմից ԵԽ լիագումար նիստի ընթացքում, որը նւիրւած էր Բերձորի միջանցքի շրջափակմանը, դրա հետեւանքներին ու ԵՄ հնարաւոր քայլերին։ ԵԽ պատգամաւորներն իրենց սուր ելոյթներով դատապարտեցին Բաքւի ռեժիմի հակամարդկային քաղաքականութիւնը։ Եղան պատգամաւորներ, որոնք մեղադրեցին նաեւ ԵՄ-ին Ադրբեջանի հետ գազային համաձայնագիր ստորագրելու համար։ 16 կէտից բաղկացած բանաձեւում Եւրոպական խոխրհդարանը ափսոսանք յայտնելով Լաչինի միջանցքի շրջափակման եւ դրա պատճառով հումանիտար հետեւանքների կապակցութեամբ, կոչ է անում Ադրբեջանին յարգել եւ իրականացնել 2020 թւականի նոյեմբերի 9-ի եռակողմ յայտարարութիւնը եւ անյապաղ վերաբացել Լաչինի միջանցքը, եւ ամենաէականը՝ Եւրոպական խորհրդարանը «կոչ է անում անյապաղ վերսկսել առանց նախապայմանների Հելսինկեան եզրափակիչ ակտի սկզբունքների վրայ հիմնւած բանակցութիւնները»: Այդ սկզբունքներից են ազգերի ինքնորոշման իրաւունք, տարածքային ամբողջականութիւն եւ ուժի չկիրառում:
168.am-ի հետ զրոյցում Արցախի Հանրապետութեան ԱԺ «Հայ Յեղափոխական Դաշնակցութիւն» խմբակցութեան ղեկավար Արթուր Մոսիեանը խօսելով բանաձեւի ընդունման եւ դրան յաջորդող քայլերի մասին, նկատեց՝ ցանկացած միջազգային կառոյցի, այդ թւում՝ ԵԽ ընդունած բանաձեւը, անշուշտ, իր ազդեցութիւնն ունենում է։
«Խնդիրն այստեղ չէ, այլ այն, որ մենք ինքներս պէտք է հասնենք մեր ճանապարհի բացմանը։ Այսօր միջազգային հանրութիւնն աւելի շատ է խօսում Արցախի ինքնորոշման մասին, քան Հայաստանի իշխանութիւնները։ Եթէ նկատեցիք՝ ԵԽ նիստին պատգամաւորները խօսեցին Արցախի ինքնորոշման իրաւունքի մասին, ինչի մասին ՀՀ իշխանութիւնը վաղուց դադարել է խօսել։ Առհասարակ մենք յաջողութիւն չենք ունենալու այնքան ժամանակ, մինչեւ ՀՀ իշխանութիւնը վերջապէս չհասկանայ, որ Արցախի ինքնորոշման իրաւունքն այլընտրանք չունի, եւ դրան ուղղւած քայլեր կատարի։ Իշխանութիւնը միայն խօսում է բլոկադայի վերացման, Արցախում ապրող հայերի անվտանգութեան եւ այլնի մասին, քանի Հայաստանի իշխանութիւնը կայ, միջազգային ճնշումները չեն կարողանալու մեծ յաջողութիւններ ունենալ։ Իհարկէ, ազդեցութիւն կունենան, բայց ոչ այն ազդեցութիւնը, ինչ կը լինէր, եթէ Հայաստանի իշխանութիւնը կառավարման ղեկին չլինէր»,- շեշտեց Արթուր Մոսիեանը։
Ինչ վերաբերում է Արցախի վրայ ՀՀ իշխանութեան տարբեր ներկայացուցիչների յայտարութիւնների ազդեցութեանը, որոնք որեւէ կերպ չեն տարբերւում Ադրբեջանի ղեկավարութեան յայտարութիւններից, ԱԺ պատգամաւորն ասաց, որ նման յայտարարութիւններն առհասարակ Արցախի խնդրի վրայ բացասաբար են անդրադառնում։
«Ամէն անգամ այդ յայտարարութիւնները թշնամին վերցնում ու օգտագործում է մեր դէմ։ Մենք միշտ ասել ենք, որ Արցախի հարցում Ալիեւի ու Փաշինեանի խօսոյթը նոյնն է։ Ինչ վերաբերում է Արցախի պատկանելութեան հարցին, ապա ՔՊ-ի ու Ալիեւի համար այն նոյն պատկանելութիւնն ունի»,- շեշտեց նա։
Խօսելով Արցախի պետնախարար Ռուբէն Վարդանեանի հնարաւոր հրաժարականի վերաբերեալ խօսակցութիւններից, Արթուր Մոսիեանը միայն կարճ ասաց.
«Նրա նշանակումը եւ Փաշինեանի, եւ Բաքւի սրտով չէ, մնացած մեկնաբանութիւններն աւելորդ են»։
