ԵՊՀ Արեւելագիտութեան ֆակուլտետի դեկան, թուրքագէտ Ռուբէն Մելքոնեանը «Փաստ»-ի հետ զրուցել է թուրք-ադրբեջանական տանդեմի կողմից իրականացւող քաղաքականութեան, Արցախի շրջափակման, երկրի առջեւ ծառացած սպառնալիքների ու դրանց հնարաւոր լուծումների մասին:
«alikonline.ir» - ԵՊՀ Արեւելագիտութեան ֆակուլտետի դեկան, թուրքագէտ Ռուբէն Մելքոնեանը «Փաստ»-ի հետ զրուցել է թուրք-ադրբեջանական տանդեմի կողմից իրականացւող քաղաքականութեան, Արցախի շրջափակման, երկրի առջեւ ծառացած սպառնալիքների ու դրանց հնարաւոր լուծումների մասին: Ռուբէն Մելքոնեանը «Փաստ»-ի հետ զրոյցում նախ նշել է, որ մեր դէմ մղւող պատերազմը գլոբալ թուրքական պատերազմ է, եւ թուրք-ադրբեջանական տանդեմը վաղուց արդէն որպէս մէկ ամբողջութիւն է հանդէս գալիս:
«Յատկապէս «Շուշիի հռչակագրից» յետոյ այդ երկու պետութիւնների բանակները, նրանց իրականացրած ագրեսիան արդէն դէ իւրէ ընդհանուր են ու միասնական: Թուրքիան չի էլ թաքցնում իր մասնակցութիւնն Արցախի շրջափակմանը. ակնյայտ է, որ սա թուրքական ձեռագրի բացայայտ դրսեւորում է: Այսինքն, մենք պէտք է գիտակցենք, որ ե՛ւ 2020-ին, ե՛ւ հիմա մեր դէմ պայքարում են թուրք-ադրբեջանական միասնական բանակը, ուժն ու պետութիւնը:
Այս պայմաններում կիսաջայլամային քաղաքականութիւն վարելը, Թուրքիայի հետ բանակցելը, օդային բեռնափոխադրումների բացմամբ ուրախանալը ու դա մեծ ձեռքբերում համարելն ուղղակի ինքնախաբէութիւն է: Նաեւ ինքնախաբէութիւն է չտեսնել, որ էկոահաբեկիչների կազմակերպիչները Թուրքիան եւ Ադրբեջանն են»,-ընդգծեց թուրքագէտը:
Ռուբէն Մելքոնեանի խօսքով, այստեղ նաեւ անկեղծութեան լրջագոյն դեֆիցիտ կայ: «Երբ իրենք իշխանութեան էին տենչում, լաւ հասկանում էին, որ երկրի առջեւ ծառացած խնդիրներից ամենակարեւորն Արցախեան խնդիրն է: Երբ իրենք հասան իշխանութեան, սկսեցին պոպուլիստական վանկարկումներ անել՝ յայտարարելով, թէ «Արցախը Հայաստան է, ե՛ւ վերջ»: Գործընթացը տապալելուց յետոյ հիմա էլ հանդէս են գալիս Ստեփանակերտի ու Բաքւի միջեւ ուղիղ երկխօսութեան մեխանիզմ ստեղծելու առաջարկով:
Այնպէս որ, այս իշխանութիւնը ինքնախաբէութեան մէջ է, լիովին տապալւած է եւ չի արտացոլում Հայաստանի շահերը: Այս իշխանութիւնը միայն ներքին դաշտում ռեպրեսիաներ, հալածանքներ ու տարատեսակ այլ քայլեր անելու ուղղութեան մէջ է ուժեղ: Մէկ էլ խիստ հայեացքով, իրենց երազած քաղաքական գործչի տեղը դնելով ելոյթներ ունենալու հարցում են ուժեղ: Մնացած բոլոր ոլորտներում տապալւած են»,- յաւելեց թուրքագէտը: Ռուբէն Մելքոնեանի դիտարկմամբ, իշխանութիւնը շարունակում է նաեւ պարզունակ մանիպուլեացիաների դիմել, որի վառ դրսեւորումն այն յայտարարութիւնն էր, թէ «աշխարհում չկայ եւ չի եղել մի երկիր, որ ԼՂ-ն չճանաչի որպէս Ադրբեջանի մաս»։
«Փաշինեանի այդ յայտարարութիւնն ուղղւած է ներքին լսարանին, իրեն հաւատացող ինչ-որ զանգւածի: Սա պարզունակ, պրիմիտիւ քաղաքական աճպարարութիւն է, որն անում է Փաշինեանը՝ ձայնի տոնը տարբեր կերպ բարձրացնել - իջեցնելով: Բայց, ամէն դէպքում, մասնագիտական շրջանակներին որեւիցէ համոզիչ եզրայանգում չի կարողանում ներկայացնել, որովհետեւ նշւածն իրականութեան հետ առնչութիւն չունի: Ըստ այդ յայտարարութեան, նախկիններից, ռուսներից յետոյ հիմա էլ մեղաւոր է ամբողջ աշխարհը, որը Արցախը չի ճանաչում: Մենք, ընդհանուր առմամբ, պէտք է փաստենք, որ Հայաստանն արտաքին ու ներքին սպառնալիքի մէջ է: Եթէ մեր արտաքին թշնամիները յստակ են, ապա այս պահի իշխանութիւնները դէ ֆակտօ գործում են Հայաստանի շահերի դէմ: Մեծ հաշւով, Հայաստանը արտաքին ու ներքին թշնամիների կողմից աքցանի մէջ է յայտնւել: Հետեւաբար, յոյս դնել, որ այս իշխանութիւնները կը կարողանան ինչ-որ բան անել Հայաստանի համար, անհեթեթութիւն է»,- ընդգծեց մեր զրուցակիցը: Ռուբէն Մելքոնեանը ստեղծւած իրավիճակում մի քանի լուծումներ է տեսնում:
«Լուծումներից մէկի հիմքում այն գաղափարն է, որ պետականութիւնը գերակայ արժէք է: IQ-ի զրոյական մակարդակ ունեցողները պէտք է զրկւեն ընտրելու իրաւունքից, իրական քաղաքացիները, իրական ժողովուրդը պէտք է իրացնի իր իրաւունքը՝ իշխանութիւնը վերադարձնելով երկրի շահերը ներկայացնող ուժերին, մարդկանց, անհատներին, պրոֆեսիոնալներին: Այն խօսքերը, որ լսում ենք համակարգում մնացած դիւանագէտներից, տարբեր պաշտօնեաներից, թէ «իրենց գործն են անում, քաղաքականացւած չեն», ինքնախաբէութիւն է: Պարոնա՛յք դիւանագէտներ, դուք ո՞ւմ իշխանութեան ներքոյ էք ձեր գործն անում: Այն իշխանութեան, որ Հայաստանի շահերը ստորադասում ու սիստեմատիկ տապալո՞ւմ է, այն իշխանութեան, որի ներկայացուցիչներն ԱԺ-ում յայտարարում են, որ Թուրքիան մեզ համար սպառնալի՞ք չէ, կամ որ Արցախի հարցը լուծւե՞լ է:
Նման պաշտօնեաները ոչ թէ պետականութեան, գաղափարին նւիրւած ծառայողներ, այլ երկչոտ, յարմարւողական կերպարներ են: Նոյնը վերաբերում է նաեւ ռեպրեսիաների հրամանները կատարողներին, այս իշխանութիւններին քծնող կեղծ մտաւորականներին: Երբեւէ իրենք իրենց հաշւետւութիւն տւե՞լ են, թէ ում եւ ինչին են ծառայում: Մեր հազարամեայ պատմութեան ընթացքում եղել են դրածոյ իշխանութիւններ, թագաւորներ, որոնք պատմութեան մէջ յիշւել են ոչ թէ որպէս Հայաստանի իշխանութիւններ, թագաւորներ, այլ ի վնաս երկրի գործող դրածոներ:
Այս իշխանութիւնները պատմութեան մէջ նոյնպէս այդ դրածոյ, երկրի շահերը չներկայացնող հերթական իշխանութիւնն են, որոնք յայտնւելու են պատմութեան այն դարակում, որտեղ միայն ու միայն բացասական, միայն անեծքով յիշւող գործիչները եւ ուժերն են: Ամենալաւ տեղը, որը կարող է ունենալ այս ուժը, պատմութեան մէջ սեւ գոյներով, անեծքով յիշւող քաղաքական ուժերի ու գործիչների կողքին է լինելու: Սա վերաբերում է նաեւ նրանց սատարող կեղծ մտաւորականներին, իբրեւ թէ, պետութեան համար մտածող պաշտօնեաներին»,- ասաց նա:
Իսկ թէ ինչ կը լինի, եթէ իր մատնանշած լուծումները չիրագործւեն, Ռուբէն Մելքոնեանը նշեց. «Չեմ ուզում վատատես լինել այդ հարցում, բայց եթէ ամէն ինչ գնաց այսօրւայ սցենարով, եթէ այս իշխանութիւնները շարունակեն մնալ, շարունակեն իրենց կործանարար քաղաքականութիւնը, ապա Հայաստան պետութիւնը կը կանգնի բուտաֆորիկ պետութիւն դառնալու ճանապարհին: Այդ նախանշաններն, ի դէպ, կան: Օրինակ՝ Բաղրամեան 26-ում նստած մի անձ դաշնամուր է նւագում, տարատեսակ այցելութիւններ է անում եւ որեւիցէ կապ չունի Հայաստանի Հանրապետութեան շահերի, առաւել եւս՝ նախագահի կոչման հետ: Նմանատիպ այլ իրադարձութիւններ ու շատ այլ նշաններ կան, բայց իւրաքանչիւր ազգ, ի վերջոյ, ինքնապաշտպանական բնազդ ունի: Այդ բնազդը կարող է լինել միայն 5, 10 կամ 15 տոկոսի մօտ, բայց այն, միեւնոյնն է, յաղթելու է, պարզապէս ձեռքբերումների մեծ մասը, որոնք որպէս պետութիւն ունեինք, փոշիացած է: Ու եթէ անգամ բնազդը յաղթի, ու մենք վերականգնենք մեր պետականութիւնը, շատ հարցերում պէտք է սկսենք զրոյից, որովհետեւ այս աւերիչ իշխանութիւնը կործանել ու շարունակում է կործանել գրեթէ բոլոր ոլորտները»:
Նա նկատեց՝ տարբեր ազգեր վտանգի դէպքում լիդերների, հարցեր լուծելու ընդունակ ուժերի են բերում. «Մեր պարագայում բոլոր փորձառու գործիչները յայտնւել են լուսանցքում, քրէական գործերի տակ, ու ղեկը տրւել է անփորձ ու ՀՀ շահերը չգիտակցող մի ուժի, որը չի կարող մեր պետական նաւը որեւէ կերպ դէպի խաղաղ նաւահանգիստ տանել: Ես, ամէն դէպքում, հաւատում եմ, որ մեր ինքնապաշտպանական բնազդը յաղթելու է, եւ անգամ 5 տարի գերի լինելով այս ուժին՝ Հայաստանը չի կարող նոյն այդ ուժի ձեռքին կործանման գնալ»:
