Ամենայն Հայոց կաթողիկոս, Ն․Ս․Օ․Տ․Տ. Գարեգին Բ-ն շնորհաւորական ուղերձ է յղել Բանակի օրւայ առթիւ։
«alikonline.ir» - Ամենայն Հայոց կաթողիկոս, Ն․Ս․Օ․Տ․Տ. Գարեգին Բ-ն շնորհաւորական ուղերձ է յղել Բանակի օրւայ առթիւ։
Ուղերձում, մասնաւորապէս, ասւած է.
«Մայր Աթոռ Սուրբ Էջմիածնից Հայոց Բանակի օրւայ առիթով Հայրապետական Մեր օրհնութիւնն ու բարեմաղթանքն ենք բերում Հայոց Բանակի սպաներին ու զինւորներին եւ համայն մեր ժողովրդին:
Հայոց Բանակը կազմաւորւեց մեր անկախութեան վերահաստատման տարիներին, դարձաւ պատւարն ու պահապանը հայոց վերածնեալ պետականութեան, երաշխաւորը մեր ժողովրդի խաղաղ ու անվտանգ կեանքի: Մեր խիզախ զօրավարների ու զինւորների քաջագործութիւններով, նաեւ բանակին սատարող մեր ժողովրդի պայքարով ազատագրւեց Արցախ աշխարհը, եւ արցախահայութիւնը իր անկախ կեանքը կառուցելու հնարաւորութիւնն ունեցաւ։
Արցախեան 44-օրեայ աղէտալի պատերազմը, անցեալ տարւայ սեպտեմբերին Հայաստանի սահմանների նկատմամբ ոտնձգութիւնները, յառնած մարտահրաւէրները եւ պաշտպանական լրջագոյն հիմնահարցերը նոր հրամայականների առջեւ են կանգնեցրել մեր երկիրն ու ժողովրդին։ Այս ծանր իրավիճակում առաջնային եւ հրատապ է բանակի արդիականացումը՝ ժամանակի չափանիշներին ու պահանջներին համապատասխան։ Առաջնային եւ հրատապ է ազգային ողջ ներուժի համախմբումը, որպէսզի Հայոց Բանակը շուտափոյթ յաղթահարի պատերազմի պատճառած աղէտալի հետեւանքները, ամոքում գտնեն անդառնալի կորուստների վէրքերն ու ցաւերը, եւ բացառւեն այնպիսի ողբերգութիւններ, որ ապրեցինք շաբաթներ առաջ։ Հաւատում ենք, որ Հայոց Բանակը պիտի վերագտնի փառքի իր ճանապարհը եւ կարող լինի աննկուն ու յաղթական իրագործել իր սրբազան առաքելութիւնը:
Ի խորոց սրտի աղօթում ենք հայրենիքի պաշտպանութեան համար նահատակութեան պսակն ընդունած բոլոր քաջորդիների համար։ Հայցում ենք Երկնաւորից, որ մխիթարութիւն պարգեւի կորուստներից ու վշտերից բեկւած հոգիներին: Թող Ամենակալն Աստւած Իր պահպանութիւնն ու զօրակցութիւնը շնորհի Հայոց Բանակի քաջարի զինւորներին ու հրամանատարական կազմին, խաղաղութիւն ու բարօրութիւն՝ Հայաստան ու Արցախ մեր հայրենիքին եւ աշխարհասփիւռ մեր ժողովրդին։
«Շնորհք ընդ ձեզ եւ խաղաղութիւն յԱստուծոյ Հօրէ մերմէ եւ ի Տեառնէ Յիսուսէ Քրիստոսէ» (Հռոմ. 1.7) այսօր եւ միշտ. ամէն»։
