Արցախի Հանրապետութեան խորհրդարանի ղեկավար Արթուր Թովմասեանի գլխաւորած պատւիրակութիւնն նախօրէին այցելել է Մարտունու շրջանի Ճարտար եւ Խնուշինակ համայնքներ՝ բնակիչներին ստեղծւած իրավիճակի եւ այն յաղթահարելու ուղղութեամբ տարւող աշխատանքների մասին տեղեկութիւններ յայտնելու նպատակով:
«alikonline.ir» - Արցախի Հանրապետութեան խորհրդարանի ղեկավար Արթուր Թովմասեանի գլխաւորած պատւիրակութիւնն նախօրէին այցելել է Մարտունու շրջանի Ճարտար եւ Խնուշինակ համայնքներ՝ բնակիչներին ստեղծւած իրավիճակի եւ այն յաղթահարելու ուղղութեամբ տարւող աշխատանքների մասին տեղեկութիւններ յայտնելու նպատակով: Տեղեկացնում է Արցախի ԱԺ-ի պաշտօնական կայքը:
Արթուր Թովմասեանը Արցախի խորհրդարանի ՀՅԴ խմբակցութեան ղեկավար Արթուր Մոսիեանի, պատգամաւոր Արեգ Աւագեանի եւ օպերատիւ շտաբի անդամ, Արցախի նախագահի աշխատակազմի կառավարութեան գործերի կառավարչութեան պետ Արայիկ Լազարեանի ուղեկցութեամբ հանդիպումներ է ունեցել Մարտունու շրջանի Ճարտար եւ Խնուշինակ համայնքների բնակիչների հետ:
Հանդիպմանը ԱԺ նախագահը նշել է, որ Արցախի բռնակցումը Ադրբեջանին կը բերի Արցախի ոչնչացմանը եւ կը հանդիսանայ պատմական, իրաւական, աշխարհաքաղաքական եւ բարոյական ողբերգութիւն հայոց պետականութեան եւ հայ ժողովրդի համար:
«Մենք չափազանց թանկ գին ենք վճարել մեր ազատութեան եւ անկախութեան համար եւ մեր պատմութիւնն անարժան կերպով փակելու բարոյական իրաւունք չունենք: Շրջափակումը արցախահայութեանը կանգնեցրել է աննախադէպ աղէտի առջեւ: Վտանգւած է Արցախի ժողովրդի լիարժէք կեանքի եւ ապրելու իրաւունքը: Այս դժւարին օրերին առաւել կարեւոր են համերաշխութիւնն ու հանդուրժողականութիւնը միմեանց հանդէպ»,- հանդիպման ընթացքում ընդգծել է ԱՀ Ազգային ժողովի նախագահը:
Այնուհետեւ նա առանձնացրել է շրջափակման ազդեցութիւնը մեղմելու առաջնահերթութիւնները.
«Որպէս օրէնսդիր մարմնի ղեկավար, ինձ համար առաջնային են.
1. Քաղաքացուն տէր կանգնելու պետութեան պարտաւորութիւնները:
2. Սոցիալական նոր ծրագրերի անյապաղ ձեռնարկումը, յատկապէս խոցելի խաւերի, այդ թւում շրջափակման հետեւանքով գործազուրկի կարգավիճակում յայտնւած մեր քաղաքացիների հանդէպ:
3. Տեսակէտը, թէ սոցիալական ծրագրերը ծուլութեան կամ անգործութեան են տանում մարդկանց, անընդունելի է այս իրավիճակում, քանի որ Արցախում ապրող ամէն մի հայ իրականացնում է սուրբ առաքելութիւն՝ ազգային արժանապատւութեան պահպանում»:
Նշւում է, որ հանդիպումն ընթացել է փոխըմբռնման մթնոլորտում: Բնակիչների բարձրացրած հարցերը քաղաքական, գիւղատնտեսութեան, սոցապահովութեան, անվտանգութեան ոլորտներին էին առնչւում: Հարցերի մի մասին տրւել են սպառիչ պատասխաններ, միւսները կը փոխանցւեն օպերատիւ շտաբ:
Արցախի ԱԺ նախագահը եւ նրա գլխաւորած պատւիրակութեան անդամները շնորհակալութիւն են յայտնել համայնքների բնակիչներին ճգնաժամային իրավիճակին պատշաճ կերպով դիմակայելու համար:
