Պաշտօնեաների մեծ մասը, յատկապէս տնտեսական ոլորտով զբաղւողները՝ կտրւած լինելով իրականութիւնից, ապրում են վիճակագրական թւերի, «միջինների», «ածանցեալների», «քառակուսի արմատների» եւ այլ կատեգորիաների իրականութիւնում, որոնց դէպքում կարեւորն այն է, որ համակարգչի էկրանին յայտնւող պատկերը գեղեցիկ լինի ու Նիկոլ Փաշինեանին հաճելի լինի այդ խաբկանքը։ Նրանց համար վիճակագրական թւերը կարեւոր են իրական կեանքից, անուն-ազգանուն, հասցէ ու անօթի լինելու դժբախտութիւն ունեցող մարդկանց ճակատագրից։
ՅԱՐՈՒԹԻՒՆ ԱՒԵՏԻՍԵԱՆ
«Մարդիկ միջինում ապրում են անհամեմատ աւելի լաւ, քան մի տարի առաջ, տնտեսական աճը հէնց դա է ցոյց տալիս։ Հաշւի առնելով նաեւ այն ներառականութիւնը, որը կայ այսօր մեր տնտեսական աճի մէջ, կարող ենք ասել, որ մարդկանց մեծ մասն աւելի լաւ է ապրում։ Գործազրկութիւնը տեսել էք, երկու տարւայ ընթացքում 18,6 տոկոսից երրորդ եռամսեակի տւեալները 16,1 է, բայց չորրորդ եռամսեակով մենք գուցէ արդէն երկնիշ գործազրկութեան կեանքից դուրս գանք»,- յայտարարել է Էկոնոմիկայի նախարար Վահան Քերոբեանը՝ որպէս «անհամեմատ աւելի լաւ կեանքի» հիմնաւորումներ ներկայացնելով բազմաթիւ ու բազմապիսի թւեր, այս ցուցանիշի այսքան աճ, այն միւսի այնքան աւելացում, եւ այդպէս շարունակ… Բայց այդ թւերից որեւէ մէկը Էկոնոմիկայի նախարարի «միջինացւած» յայտարարութիւնն այդպէս էլ արժանահաւատ չեն դարձրել։
Տրամաբանութեան հետ Քերոբեանի ունեցած անյաղթահարելի հակասութիւնների մասին խօսում են անգամ նրա հարազատ թիմակիցները։ Բայց քանի որ Հայաստանում դեռեւս անհեթեթութիւն արտաբերելու համար հարկատեսակ չի գործում, Վահան Քերոբեանը շարունակում է շաղակրատել՝ առաջնորդւելով երեւի այն կանխավարկածով, որ լսարանն առնւազն իրենից աւելի ունակութիւններ չունի։ Կամ գուցէ ոչնչով էլ չի առաջնորդւում։ Պարզապէս խօսում է, որովհետեւ... յիշենք հարկատեսակի բացակայութիւնը։
Իրականութիւնն այն է, որ Հայաստանում քաղաքացիների սոցիալական վիճակը չի լաւացել, եւ այն, ինչ ներկայացնում է Վահան Քերոբեանը, զուտ վիճակագրական ԽԱԲԿԱՆՔ է։ Այդ խաբկանքը լղոզելու համար նա օգտագործում է այժմ մոդայիկ «ներառականութիւն» արտայայտութիւնը՝ այդպէս էլ չմասնաւորեցնելով, թէ հասարակութեան յատկապէս որ խաւերին եւ ինչ կշռային յարաբերակցութիւններով է ներառում «միջինում անհամեմատ աւելի լաւ կեանքը»։
Պաշտօնեաների մեծ մասը, յատկապէս տնտեսական ոլորտով զբաղւողները՝ կտրւած լինելով իրականութիւնից, ապրում են վիճակագրական թւերի, «միջինների», «ածանցեալների», «քառակուսի արմատների» եւ այլ կատեգորիաների իրականութիւնում, որոնց դէպքում կարեւորն այն է, որ համակարգչի էկրանին յայտնւող պատկերը գեղեցիկ լինի ու Նիկոլ Փաշինեանին հաճելի լինի այդ խաբկանքը։ Նրանց համար վիճակագրական թւերը կարեւոր են իրական կեանքից, անուն-ազգանուն, հասցէ ու անօթի լինելու դժբախտութիւն ունեցող մարդկանց ճակատագրից։ Իսկ այդ հարցում այդ պաշտօնեաներին մեծագոյն նւէր է մատուցում հէնց «միջին» հասկացութիւնը, որի հրաշագործ ազդեցութեամբ ցանկալի լոյսի ներքոյ կարելի է ներկայացնել ցանկացած երեւոյթ։
Սակայն այդ միջինամոլութիւնը խիստ վտանգաւոր է եւ ամենաշատն է մարդկանց կտրում իրականութիւնից։ Միջինացւած ցուցանիշների վնասի մասին ամենալաւ օրինակը ներկայացրել է հաւանականութիւնների մասնագէտ Նասիմ Թալեբը՝ «ինչպէս սպանել տատիկին» այլաբանական օրինակով, որը յորդորում է անմիջապէս չհամաձայնել սեփական տատիկին միջինում 21°C աստիճանի պայմաններում պահելու առաջարկին, որովհետեւ 21°C-ը նաեւ +60°C-ի եւ -18°C-ի միջինն է։ Հետեւաբար, կարեւորը ոչ թէ միջինացւած նոմինալ թւերն են, որոնք իրականում գրեթէ ոչինչ չեն ասում, այլ բաշխումը։
Այնպէս որ, յաջորդ անգամ Վահան Քերոբեանը նման թւային մանիպուլեացիաներ պէտք է ներկայացնի միայն «միջինում 1.2 մետր խորութիւն ունեցող գետը» անցնելուց յետոյ։
168.am
