Արցախի շրջափակման փաստը՝ իր բոլոր ծանր հետեւանքներով հանդերձ, Արցախի ժողովրդի ինքնորոշման հարցում արդիւնք գրանցելու որոշակի հնարաւորութիւններ է ստեղծել։ Ակնյայտ է, որ Լեռնային Ղարաբաղ անւանումն այս ընթացքում բաւականին ակտիւ շրջանառւում է. ԼՂ-ում ստեղծւած վիճակի մասին քննարկումներ են ընթանում տարբեր երկրների խորհրդարաններում, միջազգային կառոյցներում։ «Փաստինֆօ»-ի հետ զրոյցում նման տեսակէտ յայտնեց Արցախի ԱԺ արտաքին յարաբերութիւնների մշտական յանձնաժողովի նախագահ Վահրամ Բալայեանը։
«alikonline.ir» - Արցախի շրջափակման փաստը՝ իր բոլոր ծանր հետեւանքներով հանդերձ, Արցախի ժողովրդի ինքնորոշման հարցում արդիւնք գրանցելու որոշակի հնարաւորութիւններ է ստեղծել։ Ակնյայտ է, որ Լեռնային Ղարաբաղ անւանումն այս ընթացքում բաւականին ակտիւ շրջանառւում է. ԼՂ-ում ստեղծւած վիճակի մասին քննարկումներ են ընթանում տարբեր երկրների խորհրդարաններում, միջազգային կառոյցներում։ «Փաստինֆօ»-ի հետ զրոյցում նման տեսակէտ յայտնեց Արցախի ԱԺ արտաքին յարաբերութիւնների մշտական յանձնաժողովի նախագահ Վահրամ Բալայեանը։
«Արցախի վերաբերեալ բազմաթիւ երկրների պետական, քաղաքական գործիչների խօսոյթն աւելի է բիւրեղանում, դրա մասին են նաեւ ԵԽ լիագումար նիստի յունւարի 18-ի օրակարգում ԼՂ-ում ստեղծւած իրավիճակի վերաբերեալ հարցի քննարկման ներառումը, Հաագայի դատարանում ընթացող գործընթացը։ Այս ամէնը գալիս են եւս մէկ անգամ փաստելու, որ ԼՂ հիմնախնդիրը լուծւած չէ եւ իրօք անհրաժեշտութիւն կայ այն լուծելու»,- նշեց Բալայեանը։
Արցախի ԱԺ արտաքին յարաբերութիւնների մշտական յանձնաժողովի նախագահն այն համոզմունքին է, որ հիմնախնդրի լուծումը բխում է շատ երկրների շահերից. չլուծւած թողնել այն, նշանակում է ստեծել նոր էսկալացիայի հաւանականութիւն, ինչը յղի կը լինի անկանխտեսելի հետեւանքներով նաեւ շահագրգիռ երկրների համար։
Այդ համատեքստում առաջին երկրներից մէկը, որը պէտք է որ շահագրգռւած լինի Արցախի կարգավիճակի յստակեցմամբ, մեր զրուցակցի գնահատմամբ, հարեւան Իրանն է։ 2020թ. պատերազմից յետոյ ստեղծւած իրավիճակից մեծապէս տուժում է նաեւ Իրանը։ Բալայեանը կարծում է, որ Իրանում յստակ կայ այն գիտակցումը, որ Ադրբեջանի կողմից բռնազաւթւած հայկական Կովսականը, Ջրականը ու միւս տարածքներն իր համար եւս բուֆերային գօտի են եղել։
«Միայն այն, որ ամիսների ընթացքում Ադրբեջանը բռնազաւթւած Կովսականում, Վարանդայում երկու օդանաւակայան է կառուցել, արդէն իսկ լուրջ մտահոգութիւններ պէտք է, որ առաջացներ Իրանում։ Բնական է, որ հէնց այնպէս չեն սարքւել այդ օդանաւականները՝ այն էլ փութաջանութեամբ։ Հաւանաբար, այդ տարածքներում Ադրբեջանը ռազմաբազաներ կը հիմնի, ինչը լուրջ վտանգ կը ներկայացնի Իրանի համար եւս»,- ասաց Բալայեանը։
Վերադառնալով «Լեռնային Ղարաբաղ» տերմինի միջազգայնացմանը՝ Բալայեանը համոզւած է, որ իրավիճակը յօգուտ մեզ շրջելու հնարաւորութիւններ կան՝ միայն թէ քաղաքական իմաստութիւն ու կամք է պէտք դրսեւորի, առաջին հերթին, ՀՀ իշխանութիւնը՝ զուգահեռաբար ակտիւացնելով փոխգործակցութիւնն Արցախի իշխանութիւնների հետ։
«Արցախի ու ՀՀ իշխանութիւնների միջեւ համագործակցութեան ակտիւացման խիստ կարիք կայ։ Ու, նախ եւ առաջ, ՀՀ քաղաքական իշխանութիւնը պէտք է մի կողմ թողնի իր որդեգրած պարտողական կեցւածքն ու ցուցաբերի նախաձեռնողականութիւն»,- եզրափակեց Վահրամ Բալայեանը։
