Ոստիկանների սպանութեան նախնական հանգամանքների վերլուծութիւնը թոյլ է տալիս ադրբեջանական կողմի գործողութիւնները որակել որպէս պատերազմական գործողութիւն: Այս մասին ասւում է Արցախի Հանարապետութեան Արտաքին գործերի նախարարութեան յայտարարութիւնում՝ Արցախի Հանրապետութեան ոստիկանութեան աշխատակիցների վրայ ադրբեջանական դիւերսիոն խմբի յարձակման կապակցութեամբ:
«alikonline.ir» - Ոստիկանների սպանութեան նախնական հանգամանքների վերլուծութիւնը թոյլ է տալիս ադրբեջանական կողմի գործողութիւնները որակել որպէս պատերազմական գործողութիւն: Այս մասին ասւում է Արցախի Հանարապետութեան Արտաքին գործերի նախարարութեան յայտարարութիւնում՝ Արցախի Հանրապետութեան ոստիկանութեան աշխատակիցների վրայ ադրբեջանական դիւերսիոն խմբի յարձակման կապակցութեամբ: Գրում է Tert.am-ը:
«Մարտի 5-ին, ժամը 10:00-ի սահմաններում, Ադրբեջանի զինւած ուժերի դիւերսիոն խումբը հատել է շփման գիծը եւ յարձակւել Արցախի Հանրապետութեան ոստիկանութեան անձնագրային եւ վիզաների վարչութեան հերթապահ աւտոմեքենայի վրայ: Յարձակման արդիւնքում ոստիկանութեան երեք անզէն աշխատակից սպանւել է, մէկը՝ վիրաւորւել: Ոստիկանների սպանութեան նախնական հանգամանքների վերլուծութիւնը թոյլ է տալիս ադրբեջանական կողմի գործողութիւնները որակել որպէս պատերազմական գործողութիւն:
Ադրբեջանական դիւերսիոն խմբի ներթափանցումն Արցախի Հանրապետութեան տարածք եւ յարձակումն Արցախի ոստիկանութեան աշխատակիցների վրայ 2020թ. նոյեմբերի 9-ի եռակողմ յայտարարութեան հերթական աղաղակող խախտում է եւ ցոյց է տալիս լարւածութեան աճ հրահրելու ադրբեջանական կողմի ձգտումը:
Աւելի վաղ՝ մարտի 2-ին եւ մարտի 2-ի լոյս 3-ի գիշերը, Արցախի Հանրապետութեան Ասկերանի, Մարտակերտի եւ Մարտունու շրջանների օկուպացւած տարածքներում տեղակայւած ադրբեջանական զինւած ուժերի ստորաբաժանումները նոյնպէս խախտել էին 2020թ․ նոյեմբերի 9-ի եռակողմ յայտարարութեամբ հաստատւած հրադադարը։ Յատկանշական է, որ այդ յարձակումներն իրագործւել են Արցախի եւ Ադրբեջանի ներկայացուցիչների միջեւ Լաչինի միջանցքի բացման վերաբերեալ մարտի 1-ին կայացած շփումներից անմիջապէս յետոյ: Իր գործողութիւններով Բաքուն բացայայտ կերպով ցուցադրում է բանակցութիւնների՝ որպէս որեւէ հարցի լուծում գտնելու միջոցի ժխտում:
Արցախի ժողովրդի համար դիտաւորեալ անտանելի կենսապայմաններ ստեղծելու նպատակով աւելի քան 80 օր շարունակւող շրջափակման ֆոնին իրավիճակի կտրուկ սրումը, որը յանգեցրել է զոհերի, հերթական անգամ վկայում է Ադրբեջանի իրական նպատակների եւ Արցախի էթնիկ զտումն աւարտին հասցնելու մտադրութեան մասին:
Ակնյայտ է, որ միջազգային հանրութեան՝ Ադրբեջանի միջազգային-հակաիրաւական գործողութիւնների կանխմանն ուղղւած համարժէք միջոցներ չձեռնարկելը այդ երկրի իշխանութիւնների կողմից ընկալւել է որպէս նոր ոճրագործութիւններ կատարելու քարտ-բլանշ:
Կոչ ենք անում միջազգային հանրութեանն ընդհանրապէս եւ ադրբեջանա-ղարաբաղեան հակամարտութեան կարգաւորման գործում ներգրաււած կողմերին՝ մասնաւորապէս, վերանայել իրենց մօտեցումները եւ ձեռնարկել գործուն ու միջազգային իրաւունքի նորմերից բխող քայլեր՝ վերջ դնելու Ադրբեջանի ահաբեկչական եւ ցեղասպան քաղաքականութեանը»:
