Ադրբեջանի՝ կոշտ ու կտրուկ քայլերից է հէնց մարտի 5-ին տեղի ունեցած դիւերսիոն գործողութիւնը: Այս մասին News.am-ի հետ զրոյցում ասաց ՀՅԴ խմբակցութեան ղեկավար Արթուր Մոսիեանը:
«alikonline.ir» - Ադրբեջանի՝ կոշտ ու կտրուկ քայլերից է հէնց մարտի 5-ին տեղի ունեցած դիւերսիոն գործողութիւնը: Այս մասին News.am-ի հետ զրոյցում ասաց ՀՅԴ խմբակցութեան ղեկավար Արթուր Մոսիեանը:
«Չեն բացառւում, որ առաջիկայում նոյնպէս կը լինեն այդպիսի սադրանքներ: Իսկ դա հնարաւոր է Հայաստանի այդ ՔՊ-ական ղեկավարութեան լուռ համաձայնութեան պայմաններում: Երբեմն տպաւորութիւն է ստեղծւում, որ Ալիեւն ու Փաշինեանը պայմանաւորւած են անում այս ամէնը»,- նշեց Մոսիեանը:
Անդրադառնալով ադրբեջանական կողմի փոխանցմանը, թէ Արցախը կամ ընդունում է ինտեգրացիոն քաղաքականութիւնը, կամ լինելու են կոշտ եւ կտրուկ քայլեր, Մոսիեանն ասաց.
«Այսպիսի կտրուկ քայլերը յանգեցնելու են էսկալացիայի, որովհետեւ արցախցիներն իրենց ասելիքն արդէն ասել են: Մենք որեւէ պարագայում չենք կարող ինտեգրւել Ադրբեջանին: Արցախցին իր ինքնորոշման հարցն արդէն լուծել է: Այս ամէնը Նիկոլի եւ իր վարչախմբի խղճին է, որովհետեւ նրանք Արցախից իրենց ձեռքերը լւացել են եւ տպաւորութիւն է, որ Ալիեւի հետ միասին են այս գործողութիւններն անում»:
Արթուր Մոսիեանն ասաց, որ արցախեան կողմը ադրբեջանական կողմի հետ հանդիպմանը օրակարգային 4 հարցով էր գնացել, որոնց մէջ ներառւած էր Կաշէնի հանքավայրի վերաշահագործումը, ինչը մերժւել է:
Նշենք, որ Արցախի Հանրապետութեան նախագահ Արայիկ Յարութիւնեանը Անվտանգութեան խորհրդի ընդլայնւած նիստին յայտարարել էր, որ ստեղծւած իրավիճակի հումանիտար եւ ենթակառուցւածքային խնդիրները քննարկելու նպատակով ռուս խաղաղապահ զօրակազմի հրամանատարութեան միջնորդութեամբ եւ ներկայութեամբ՝ փետրւարի 24-ին արցախեան կողմը հանդիպել է ադրբեջանական կողմի հետ: Ապա պայմանաւորւածութիւն է ձեռք բերւել երկրորդ հանդիպման կապակցութեամբ, որը տեղի է ունեցել մարտի 1-ին՝ Անվտանգութեան խորհրդի քարտուղար Սամուէլ Շահրամանեանի գլխաւորութեամբ:
«Երկրորդ հանդիպման ժամանակ Ադրբեջանի ներկայացուցիչը փորձել է քննարկել քաղաքական թեմաներ՝ օգտագործելով ինտեգրացիա բառը, սակայն պարոն Շահրամանեանը կանխել է՝ ասելով, որ եթէ պէտք է քննարկեն քաղաքական հարցեր, դա պէտք է լինի Ադրբեջանի կողմից Արցախի անկախութեան ճանաչման թեման: Նա յաւելել է, որ քաղաքական հարցերի քննարկման համար իրենք լիազօրւած չեն եւ տւեալ հանդիպմանը չեն կարող քննարկել այդպիսի հարցեր»,- ասել է Արայիկ Յարութիւնեանը:
Երկրի ղեկավարի խօսքով՝ դրանից յետոյ ադրբեջանական կողմը իր խողովակներով փոխանցել է իրենց, որ կամ ընդունում են ինտեգրացիոն քաղաքականութիւնը, կամ առկայ խնդիրներին որեւէ լուծում չի լինելու, հակառակը՝ լինելու են աւելի կոշտ եւ կտրուկ քայլեր:
