Հայաստանի Արտաքին գործերի նախարարութիւնը յայտարարութիւն է տարածել ադրբեջանական ապատեղեկատւութեան վերաբերեալ։
«alikonline.ir» - Հայաստանի Արտաքին գործերի նախարարութիւնը յայտարարութիւն է տարածել ադրբեջանական ապատեղեկատւութեան վերաբերեալ։
Հաղորդագրութեան մէջ նշւում է.
Պաշտօնապէս շեշտում ենք, որ սոյն տեղեկատւութիւնն ամբողջութեամբ կեղծ է, չունի եւ չի կարող ունենալ որեւէ փաստական հէնք եւ աղերս իրականութեան հետ։
Նմանօրինակ «աղմկոտ բացայայտումներով» Ադրբեջանը փորձում է միջազգային հանրութեան ուշադրութիւնը շեղել՝
1. Մարտի 5-ին իր զինւած ուժերի կողմից իրականացւած ահաբեկչական ակտից, որին զոհ են գնացել Լեռնային Ղարաբաղի ՆԳՆ ոստիկանութեան անձնագրային ծառայութեան երեք աշխատակիցներ, մէկ աշխատակից վիրաւորւել է,
2. Լաչինի միջանցքի առնչութեամբ Արդարադատութեան միջազգային դատարանի՝ իրաւաբանական պարտադիր ուժ ունեցող որոշումն իր կողմից չկատարելու եւ ի հեճուկս այդ որոշման՝ Լաչինի միջանցքը փակ պահելու փաստից,
3. 2020թ․ նոյեմբերի 9-ի եռակողմ յայտարարութեամբ՝ Լաչինի միջանցքի վերաբերեալ իր ստանձնած միջազգային պարտաւորութիւնները չկատարելու փաստից:
Այս ակնյայտ փաստերից միջազգային հանրութեան ուշադրութիւնը շեղելու համար Ադրբեջանը որդեգրել է ապատեղեկատւութեան ու լարւածութեան աճի գործելակերպ՝ փորձելով կեղծ տեղեկատւական հիմքեր ստեղծել ոչ միայն Լեռնային Ղարաբաղի, այլեւ Հայաստանի Հանրապետութեան նկատմամբ նոր ագրեսիա ծաւալելու համար: Ընդ որում, Ադրբեջանն այդ քաղաքականութիւնն «արդարացնելու» համար շարունակում է արեւմուտքում Հայաստանին որպէս ծայրայեղ ռուսամէտ, իսկ Ռուսաստանում՝ ծայրայեղ արեւմտամէտ ներկայացնելու իր քաղաքականութիւնը:
Հայաստանը բազմիցս յայտարարել է, որ որեւէ ռազմամթերք կամ ռազմական նշանակութեան ապրանք Լաչինի միջանցքով չի տեղափոխւել ինչպէս մինչեւ դրա շրջափակումը, այնպէս էլ 2022թ. դեկտեմբերի 12-ից յետոյ։ Աւելին, վերահաստատում ենք, որ Լեռնային Ղարաբաղում Հայաստանի Հանրապետութիւնը բանակ չունի։ Այս տեղեկատւութեան իսկութիւնը ստուգելու համար Լեռնային Ղարաբաղ միջազգային փաստահաւաք առաքելութիւն գործուղելու առաջարկը բազմիցս մերժւել է հէնց Ադրբեջանի բարձրագոյն ղեկավարութեան կողմից:
Վերահաստատելով Հայաստանի՝ տարածաշրջանում խաղաղութեան հասնելու ձգտումը՝ եւս մէկ անգամ ընդգծում ենք Լեռնային Ղարաբաղ եւ Լաչինի միջանցք միջազգային փաստահաւաք առաքելութեան անյապաղ գործուղման անհրաժեշտութիւնը՝ կանխելու Ադրբեջանի կողմից նոր ագրեսիայի սանձազերծումը եւ Լեռնային Ղարաբաղի ժողովրդին էթնիկ զտումների ու ցեղասպանութեան ենթարկելու Ադրբեջանի ակնյայտ նախապատրաստութիւնները:
