Արցախի շրջափակումը ցոյց տւեց, որ հայ մարդը գաղափարների շուրջ քննարկումներ ունենալու մեծ պահանջ ունի:
«alikonline.ir» - Արցախի շրջափակումը ցոյց տւեց, որ հայ մարդը գաղափարների շուրջ քննարկումներ ունենալու մեծ պահանջ ունի:
«Արմէնպրես»-ի հաղորդմամբ՝ այս մասին ասաց մարտի 10-ին՝ «Ապագայ հայկականը» համաժողովին Արցախից տեսակապով միացած «Ապագայ հայկականը» նախաձեռնութեան համահիմնադիր Ռուբէն Վարդանեանը:
«Արցախի շրջափակումը ցոյց տւեց, որ սուտ է, թէ հայը մտածում է միայն ուտելու մասին, հայն ունի գաղափարների շուրջ քննարկումներ մեծ պահանջ: Նա պիտի հաւատայ եւ դրա համար պիտի իմանայ, որ ինքը կարեւոր է՝ որպէս անձ: Դա չես կարող անել խանութները սնունդ լցնելով, կարեւոր է գաղափարը, առանց դրա ոչինչ չի ստացւելու մեզ մօտ»,- ընդգծեց Վարդանեանը:
Ռուբէն Վարդանեանը նշեց, որ կայ պատասխանատւութիւն ե՛ւ զոհւած զինծառայողների, ե՛ւ մեր սերնդի առջեւ. «Մենք նրանց պէտք է փոխանցենք ոչ թէ աւտոմեքենաներ ու տներ, այլ արժանապատիւ հայկական ազգային արժէքներով կեանք»:
Անդրադառնալով նախաձեռնութեանը՝ Վարդանեանն ասաց, որ խորհրդանշանական է այս օրը միջոցառման բացումն իրականացնելը. «Ութ տարի առաջ Նուբար Աֆէյեանի, Վարդան Գրիգորեանի հետ մենք սկսեցինք Աւրորայի մեր երկարաժամկէտ ճանապարհը»:
«Եւ ես վստահ եմ, որ մեր այսօրւայ միջոցառումը, որինց ցաւօք ես չեմ կարող ներկայ գտնւել, շատ կարեւոր դեր է խաղալու ապագայի համար եւ տալու է շատ կարեւոր հարցերի պատասխաններ: Շատ կարեւոր է յարգանքը դէպի գիտելիքը, դէպի աշխատանքը, դէպի ազգային աւանդոյթներն ու արժէքները, ես վստահ եմ՝ առանց դրանց ոչ մի բան չի ստացւի»,- ասաց Վարդանեանը:
