Միայն միասնականութեամբ ի զօրու կը լինենք յաղթահարելու առկայ ճգնաժամը եւ փորձութիւնների մէջ տարուբերւող մեր երկիրն առաջնորդել դէպի յուսալի խաղաղ ու ապահով կեանքի հանգրւաններ։ Այս մասին ասւում է Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսի ուղերձում, որն երէկ՝ մարտի 10-ին, Երեւանում անցկացւող «Ապագայ հայկականը» նախաձեռնութեան առաջին համաժողովի ժամանակ ընթերցեց Մայր Աթոռի Արտաքին յարաբերութիւնների եւ արարողակարգի բաժնի տնօրէն Նաթան Արքեպիսկոպոս Յովհաննիսեանը։
«alikonline.ir» - Միայն միասնականութեամբ ի զօրու կը լինենք յաղթահարելու առկայ ճգնաժամը եւ փորձութիւնների մէջ տարուբերւող մեր երկիրն առաջնորդել դէպի յուսալի խաղաղ ու ապահով կեանքի հանգրւաններ։ Այս մասին ասւում է Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսի ուղերձում, որն երէկ՝ մարտի 10-ին, Երեւանում անցկացւող «Ապագայ հայկականը» նախաձեռնութեան առաջին համաժողովի ժամանակ ընթերցեց Մայր Աթոռի Արտաքին յարաբերութիւնների եւ արարողակարգի բաժնի տնօրէն Նաթան Արքեպիսկոպոս Յովհաննիսեանը։
«Մայր Աթոռ Սուրբ Էջմիածնից ողջոյն ենք յղում եւ հայրապետական մեր օրհնութիւնը բերում «Ապագայ Հայկականը» նախաձեռնութեան հիմնադիրներին եւ համաժողովի բոլոր մասնակիցներին։ Դուք այսօր համախմբւել էք մեր ժողովրդի ապագայի տեսլականով։ Գոհունակութիւն է մեզ համար, որ նւիրական այս նպատակի շուրջ միաւորւել են մեր ժողովրդի զաւակներն աշխարհի տարբեր երկրներից եւ պատրաստակամ են ջանքեր ներդնել դիմակայելու ներկայումս մեր ազգի առջեւ հառնած մարտահրաւէրներին։ 44-օրեայ պատերազմի հետեւանքով Արցախի շուրջ ստեղծւած իրավիճակը, մեր տարածաշրջանում եւ աշխարհում տեղի ունեցած իրադարձութիւնները մեր հայրենիքը կանգնեցրել են բարդ իրադրութեան առջեւ։ Մեր ժողովուրդը յայտնւել է գոյաբանական սպառնալիքների վտանգի առջեւ։ Վճռորոշ այս իրավիճակում ազգային ներուժի համախմբումը, համահայկական երկխօսութիւնը կարեւոր է եւ հրամայական։ Մեր միասնութեան մէջ է, որ պէտք է ի յայտ գայ մեր իմաստնութիւնն ու զօրութիւնը։ Մեր միասնականութեան մէջ պէտք է դրսեւորւի հայրենիքի ու ազգի շահը մեր անձնականից վեր դասելու գիտակցութիւնը։ Համատեղ ջանքերով պէտք է հոգ տանենք մեր հայրենի երկրի մասին, որը երաշխաւորն է մեր յարատեւութեան։ Այս հաւատով մեր ժողովուրդը հայրենիքում եւ Սփիւռքում պէտք է եռնամուխ լինի հայրենանպաստ եւ ազգօգուտ նախաձեռնութեամբ։ Նոյն նախանձախնդրութեամբ մեր եկեղեցականներն իրականացնում են իրենց առաքելութիւնը։ Հայրապետական մեր գնահատականը բերելով ամենքիդ՝ մաղթում ենք, որ Բարձրեալը զօրավիգ լինի ձեզ հայրենանւէր բոլոր գործերում եւ օրհնի բոլոր ջանքերը, որ նախանձախնդիր կերպով գործադրւեն յանուն Հայաստանի եւ Արցախի խաղաղութեան եւ աշխարհասփիւռ հայութեան լուսաւոր գալիքի»,- ասւում է ուղերձում։
