Մարտի 10-ին, ԱՀ պետնախարար Գուրգէն Ներսիսեանը, ընդառաջելով ԱՀ ԱԺ բոլոր խմբակցութիւնների պահանջին, ներկայացել է Ազգային ժողով՝ մարտի 7-ին News.am-ին տւած հարցազրոյցում արտայայտած որոշ մտքերի կապակցութեամբ բացատրութիւններ տալու համար։
«alikonline.ir» - Մարտի 10-ին, ԱՀ պետնախարար Գուրգէն Ներսիսեանը, ընդառաջելով ԱՀ ԱԺ բոլոր խմբակցութիւնների պահանջին, ներկայացել է Ազգային ժողով՝ մարտի 7-ին News.am-ին տւած հարցազրոյցում արտայայտած որոշ մտքերի կապակցութեամբ բացատրութիւններ տալու համար։ Տեղեկացնում է «Ապառաժ»-ը:
Յիշեցնենք որ, հարցազրոյցի ժամանակ պետնախարարն ասել էր․ «Ես որեւէ կերպ չեմ պատկերացնում, թէ երեւանեան եւ ստեփանակերտեան դիրքորոշումների միջեւ կարող են տարբերութիւններ լինել, հակառակը՝ Երեւանը, երբ հարցը վերաբերում է արցախեան խնդրին, առաւելապէս յենւում է արցախեան իշխանութիւնների դիրքորոշման եւ կարծիքի վրայ, որն ամբողջութեամբ արտացոլում է Արցախի ժողովրդի նպատակները»։
Ի պատասխան ԱՀ ԱԺ խմբակցութիւնների ղեկավարների հարցադրմանը՝ նորանշանակ պետնախարարը նշել է, որ իր աշխատակազմի միջոցով արդէն պարզաբանումներ է տւել եւ որպէս հիմք պէտք է ընդունել դրանք: Նա համոզմունք է յայտնել, որ ԱՀ ԱԺ ապրիլի 14-ի յայտարարութիւնը շարունակում է մնալ որպէս Արցախի պաշտօնական դիրքորոշում։
ԱՀ ԱԺ 2022թ. ապրիլի 14-ի յայտարարութեան մէջ ՀՀ իշխանութիւնների վարած քաղաքականութեան վերաբերեալ յատկապէս ասւում է. «Պահանջում ենք, որ Հայաստանի Հանրապետութեան իշխանութիւնները հրաժարւեն իրենց ներկայիս աղէտալի դիրքորոշումից եւ առաջնորդւեն բացառապէս այս արժէքներով: Ոչ մի իշխանութիւն իրաւունք չունի «խաղաղութեան» պատրւակով Արցախի համար անընդունելի կարգավիճակի, ինչպէս նաեւ՝ միջազգայնօրէն ճանաչւած ինքնորոշման իրաւունքի բանակցային նշաձողն իջեցնելու»։
Հանդիպման աւարտին քննարկւել են հանրապետութիւնում շրջափակման հետեւանքով ստեղծւած խնդիրները եւ դրանց մեղմման ուղղութեամբ իրականացւող աշխատանքները:
