ՀՀ ԱԺ «Հայաստան» խմբակցութեան պատգամաւոր, ՀՅԴ Գերագոյն մարմնի անդամ Լիլիթ Գալստեանը ֆէյսբուքեան իր էջում գրում է.
«alikonline.ir» - ՀՀ ԱԺ «Հայաստան» խմբակցութեան պատգամաւոր, ՀՅԴ Գերագոյն մարմնի անդամ Լիլիթ Գալստեանը ֆէյսբուքեան իր էջում գրում է.
«ԼՍԵԼՈՎ ԱԽՔ-ԻՆ․ ՆԵՐՔԻՆ ԼՍԱՐԱՆԻՆ ՈՒՂՂՒԱԾ ԲԱՌԱԽԱՂԵՐ /Դուք էք Բաքւին տւել այդպէս խօսելու եւ պարտադրելու իրաւունքը/
Բաքուն շարունակ, միջազգային ամենաբարձր հարթակներում պնդում է, որ երկխօսութեան օրակարգում պէտք է լինի Ղարաբաղի հայերի ինտեգրացիայի հարցը։
Աւելին՝ թէ Ալիեւը, թէ Բայրամովը շարունակ բարձրաձայնում են, որ Լեռնային Ղարաբաղ կոնֆլիկտը, խնդիրը, երեւութն այլեւս չկայ. հանգուցալուծւած է. չկայ այդպիսի քաղաքական միաւոր, չկայ նաեւ կարգավիճակի խնդիր։ Ալիեւն այս մասին յայտարարում է ամենաբարձր քաղաքական հանդիպումներում, սա է նաեւ ԵԱՀԿ կամ ԵԽ խորհրդարանական վեհաժողովներում Բաքւի ներկայացուցիչների հիմնական խօսոյթը։
Ալիեւն այդքան ինքնավստահ է եւ անթաքոյց ցինիկ, որ օրերս յայտարարեց, որ իրենք խնդիրը լուծել են պատերազմով, այսինքն՝ ագրեսիայի ճանապարհով։
Այսպէս խօսում են յաղթածները, այսպէս խօսում են պարտւածի, այսպէս խօսում են բանակցային սեղանին Հայաստանը դեռ ներկայացնող նւաստի հետ։
Այսպէս խօսում են խաղաղութեան մուրացկանի հետ։
Միանշանակ՝ քաղաքագիտական եւ դիւանագիտական նոնսեսն է, երբ պարտւածը՝ պարտութեան մարմնացումն ու պատասխանատուն շարունակում է նստել բանակցութիւնների սեղանի շուրջ։ Ըստ էութեան Հայաստանի գինը սրանց՝ ՔՊ- իշխանութեան գինն է։ Սեփական իշխանութեան համար շարունակ զիջողից կը կորզեն ամէն բան՝ ազգային ինքնասիրութիւնից մինչեւ պետութեան գոյութիւն։
Յիշէք, թէ Հայաստանի պաշտօնական խօսոյթից երբւանից են անհետացել Արցախի կարգավիճակ, ինքնորոշման իրաւունք արտայայտութիւնները, Արցախը պահելու համոզումը, քաղաքական նպատակադրութիւնը։ Ի վերջոյ՝ Արցախի անվտանգութեան երաշխաւորի յանձնառութիւնն են ուրացել։ Սա պարզապէս հակապետական է, դաւաճանութիւնն այլ նկարագիր չի ունենում։
Յիշէք, թէ ամենաբարձր մակարդակներում քանի անգան է նիկոլը որպէս ագրեսորի քաղաքական գնահատական տւել Ադրբեջանին, կամ՝ որպէս խաղաթուղթ օգտագործել միջազգային իրաւունքի հիմնարար սկզբունքները, Հեկսինկիի եզրափակիչ ակտը։
Հիմա, մեր ազգային ողբերգութեան, պարտութեան ու մեռնող ապագայի բարիկադներից ԱԽՔ քարտուղար Արմէն Գրիգորեանն, «Ազատութեան»-ը տւած հարցազրոյցում ասում է, որ «քննարկումները իրաւունքների եւ անվտանգութեան մասին են, եւ միջազգային պայմանաւորւածութիւնները հէնց սրանք էին»։
Մի կողմ թողնենք քողածածկ խօսոյթն ու դիւանագիտական ճամարտակութիւնները, արդիւնքում մնում են Ալիեւի հաստատումները՝ Ադրբեջանի բոլոր քաղաքացիների հանգոյն՝ հաւասար իրաւունքներ եւ անվտանգութիւն, նոյն ինքը՝ ինտեգրացիա... Մնացեալը ներքին լսարանի համար հաշիշ է, դատարկախօսութիւն։
Երբ խորհրդարանում Ա. Միրզոյեանից կամ միւսներից փորձում ենք կորզել, թէ իրաւունքներ ասելով ինչ նկատի ունեն՝ ասւում է ամէն բան, բացի Արցախի կարգավիճակի եւ ինքնորոշման իրաւունքի իրացումը։ Մնացեալը՝ ոչինչ է, ժամավաճառութիւն, բանակցութեան պատրանք, գուցէեւ՝ պետականութեան պատրանք։
Ի դէպ վերջերս նիկոլը շրջանառութեան մէջ նետեց մի սարսափելի գաղափար եւս՝ հայ մարդու լինելիութեան, իսկ հայոց պետականութեան թեականութեան մասին։
Ցաւօք, մեր պետականութիւնն ու գոյութիւնը կը մնան հարցականի տակ, քանի դեռ մեր ճակատագիրը տնօրինում են պարտւածները։
Դուք էք Բաքւին տւել այդպէս խօսելու եւ պարտադրելու իրաւունքը։
Իսկ ապատիկ հասարակութեան աչքի առաջ բզկտւում է սեփական ինքնութիւնը։
Անունն ինչ ուզում էք դրէք... իրաւունք, ինտեգրացիա, անվտանգութիւն, սրանք ժամանակ վաճառող, ներքին լսարանին ուղղւած բառախաղեր են իշխանութեան ձեռքին...»:
